24. यूहन्ना यीशुनि बपतिस्मा दींता- कहानी

इलीशिबा जां जकर्याहैरा पुत्र यूहन्ना, बड्डा भौ करी अक भविष्यवक्ता बंणी गिया। सै बणां मझ एकि सुनसान जगाय रिहींथ्या, जां जंगली मखीर जां टिड्डिया खाईंथ्या, जां सै ऊंटेरै शिरवा केरै लिकड़ै बंणा करी लाईंथ्या जां अपड़ी कमरी पनि चमड़ैरा पट्टा बन्ही रखींथ्या।

बड़ै सारै मैहणु यूहन्नेरी गल्लै शुणनेरै तेईनी बणां मझ सुनसान जगायनी आईछी गियै। यूहन्नै तैन्हांनि बोलु, “अपड़ै मंन बदला जां अपड़ै पापा केरै तेईनी पश्चाताप करा केईनी कि स्वर्गैरा राज्य निड़ी यौउरा।“

जेख्णी मैहणुवें यूहन्नैरा संदेश शुणा, ता तैन्हां मझां मतै सारै मैहणुवें पश्चाताप केया जां अपड़ै पापा किना मंन फैरा, जां यूहन्नै तैन्हांनि बपतिस्मा दित्ता। युहन्नै तकांणानि बड़ै सारै धार्मिक अगुवै बि यै, पण तैन्हैं अपड़ा मंन ना बदला जां अपड़ै पापा किना पश्चाताप ना केया।

यूहन्नै यहूदी अगुवो सिंउ बोलु, “हे कीड़ै सैयि जैहरीलै मैहणुवो, अपड़ै पापा किना पश्चाताप करा जां अपड़ै मंन बदला। अबै परमेश्वर हरेक मैहणुनी जै अपड़ै पापा किना पश्चाताप ना कांना चांहथा, तैसनि सजा दींणैरै तैईनी बिल्कुल तैयार आ। ठीक तिहींये जिहीं कोई बुट बधिया फल ना दींतु, ता तैस बढी करी आगी मझ फुकि छडतै।”यूहन्नै सै पूरू कियु जै यशायाह भविष्यवक्तेरी किताबी मझ लिखौरू थियु, “तका, मूं बड़ी जल्दी ताउ किना पेहिलै अपड़ा संदेश दींणै बा भेईजणा, जै तिंडै तेईनी मैहणुवां केरै मंना त्यार करैला।”

कुछ धार्मिक अगुवो युहन्नै किना पुच्छु क्या तु सै मसीह आ। यूहन्नै जवाब दित्ता, “आंउ मसीह नां, पण जै मूं बाद ऐईंणै बा आ, सै मूं किना बड़ा सामर्थी आ। आंउ तैसेरी जुत्ती चुकणेरै काबिल बि ना।”

दुवें रौजै, यीशु गलील प्रदेशा मझ यरदन नदिरै किनारै बपतिस्मा लींणा या। जेख्णी युहन्नै सैक्या लधा ता तेनि बोलु, “तका, ऐ परमेश्वरैरा मेम्‍ना जै अपड़ा बलिदान दी करी संसारैरा पाप ऐपु पनि लै लींता।”

पण यूहन्ना ऐ बोलि करी तैस रौकणा लगा, ‘मूं ता तिंडै हत्थै बपतिस्मा लींणैरी जरूरत आ, जां तु मूं किनि या?” यीशु तैस सिंउ बोलु, ‘ ऐम्हीं ता मूं ताउ किना बपतिस्मा लींणा, केईनी कि असुवां ऐम्हीं परमेश्वरैरी ईच्छा पूरी कांनी आ।” तां यूहन्नै तेसनी बपतिस्मा दित्ता, जबकि यीशु कोई पाप ना थ्या कियौरा।

बपतिस्मा लींणा किना बाद जेख्णी यीशु पांणी किना निकोही करि भेईर या, ता परमेश्वरैरा आत्मा कबूतरेरै रूपा मझ उतरी करि तैस पनि पैई गिया। तेसै टैंमा परमेश्वरै स्वर्गा किना गल्ल की जां बोलु, “तु मिंडा प्यारा पुत्र आ। आंउ ताउ सिंउ प्रेम काता, जां आंउ ताउ किना बड़ा खुश आ।”

परमेश्वरै यूहन्नै सिंउ बोलोरू थियु, “पवित्र आत्माय हैट उतरी करी कोसक्यै पनि पैई गांहणु जैसनि ताउ बपतिस्मा दींणा।” सेहै परमेश्वरैरा पुत्र आ परमेश्वर अक्कै आ। पण जेखणी यूहन्नै यीशुनि बपतिस्मा दित्ता, ता तेनि पिता परमेश्वर गल्लै काता शुणा, पुत्र परमेश्वर लधा, जै कि यीशु आ, जां तेनि पवित्र आत्मा लधौरा।