25. शैतानेरै जरियै यीशुरी परीक्षा- कहानी

यीशुरा बपतिस्मा भूंणा किना बाद, पवित्र आत्मा यीशु बणां मझ एकि सुनसान जगायनी लै गिया।तैस जगाय यीशु चाही धियाड़ी चाही राती रिय्हा। चाही रात-धियाड़ी यीशु किछ बि ना खाउ केईनी कि तेनि उपवास थ्या रखोरा, तां शैतान यीशुरी परीक्षा कांना या।

यीशुनि भ्रुख लगी, तां शैतान परखणेरै तेईनी तैस सिंउ बोलणा लगा, “अगर तु परमेश्वरैरा पुत्र आ ता ऐन्हां घौड़ा केरी रोट्टी बंणा दै, ताकि तु खा सकिया!”

पण यीशु शैताना सिंउ बोलु, ‘परमेश्वरेरै वचना मझ ऐ लिखोरू आ, जींतै रींहणानि सिर्फ रोट्टिरी ऐ जरूरत ना भूंती, पण हर एकि वचना पनि जै परमेश्वरेरै मुहां किना निकूंथा, जै तैस पनि चलैला सै जींता रैहला।”

तां शैतान यीशु मंदरेरी चोट्टी पनि लै गिया जां सै मंदरेरी चुमांमणी पनि खड़ैरी दित्ता। जां तैस सिंउ बोलणा लगा, “अगर तु परमेश्वरैरा पुत्र आ ता ऐठां किना थल्लैनि छा मारी दै, केईनी कि पवित्र शास्त्रा मझ परमेश्वरैरा वचन बोलता कि: ‘परमेश्वर ताउ बचांणेरै तेईनी अपड़ै स्वर्गदूतानि हुक्म दैला, जां तैन्हां तु हत्था पनि चुकि लींणा। जां ऐहीं भूंणु कि तिंडै पायड़ानि घौड़ै ला ठौकर बि ना लगणी।”

पण यीशु ऐहीं ना कियु जै शैतानै तैसनि कांनानि बोलु। ऐठणीरी वजाय, यीशु तैस सिंउ बोलु, “पवित्र शास्त्रा मझ परमेश्वर बोलता, कि तु प्रभु अपड़ै परमेश्वरा मेईं परखै।”

फिरी शैतान यीशु बड़ै बड्डै जां उथड़ै पहाड़ा पनि लै गिया जां सारै संसारैरा राज-पाठ जां सारी धन-दौलतिरा रुतबा लुहाई करि, तैस सिंउ बोलणा लगा, “जै अगर तु जेणुं टंकी करी मिंडा आदर जां मिंडी भक्ति करैला, ता मूं ऐ सभ किछ ताउनि दी दींणु।”

तां यीशु तैस सिंउ बोलु, “हे शैतान दूर भौई गा, केईनी कि पवित्र शास्त्रा मझ परमेश्वरैरा वचन बौलता कि तु प्रभु अपड़ै परमेश्वरैरा झुकि करी आदर कर, जां सिर्फ तेसैरी ऐ भक्ति कर।”

यीशु शैतानेरी परीक्षाय किना हार ना मंनी, ऐठणीरै तेईनी शैतान तैठां किना चलि गिया। तां स्वर्गदूत आईछी करी तेसैरी सेवा कांना लगै।