26. यीशु अपड़ा सेवा कार्य शुरू काता- कहानी

शैतानेरी परीक्षाईया केरा नंमा काना किना बाद, यीशु वापिस गलील इलाकै मझ या। ऐहै सै जगा आ जेठि सै रिहींथ्या। पवित्र आत्मा तैसनि बड़ी सामर्थ दींता थ्या, जां यीशु एकि जगाय किना होरी जगायनी गिया जां मैहणुवंनी शिक्षा दित्ती। सभनियें तेसैरै बारै मझ अच्छी गल्लै बोलि।

यीशु नासरत नगरा मझ गिया। ऐ सै ग्राँ आ जेठि सै अपड़ै बचपणा मझ रिहींथ्या। आरामेरी धियाड़ी, सै आराधना कांनेरी जगाय गिया। अगुवो तेसनी यशायाह भविष्यवक्ता केरै संदेशैरी अक किताब दित्ती। सै चांहथै थ्यै कि सै तैस किताबि मझां पढ़िया। फिरी यीशु सैकेई किताब खौली करी तैस मझां अक भाग तैन्हां मैहणुवां केरै तेईनी पढ़ा।

यीशु तैस किताबि मझां पढ़ना लगा “परमेश्वरै मूंनि अपड़ा आत्मा दितौरा ताकि आंउ कंगाला मझ खुशखबरिरा प्रचार करि सकूं। तेनि आंउ ऐठणीरै तेईनी भेईजौरा कि जै गुलाम अत्तै तैन्हां आजाद करूं, जै कांणै अत्तै सै दुबारै फिरी तका सकिया, जां जैन्हां मैहणु दबांतै अत्तै तैन्हांनि छुटकारा दियुं। ऐ सै टैंम भूंणा जेख्णी परमेश्वर असु पनि दयालु भूंणा जां असैड़ी मजत करैला।”

फिरी यीशु बेशी गिया। सारै मैहणु तैस बड़ै ध्यान सिंउ तकांतै थ्यै। तैन्हां पता थ्या कि पवित्र शास्त्रेरा जै भाग तेनि ऐम्हीं पढ़ा सै मसीहरै बारै मझ थ्या। यीशु बोलु, “जै वचन ऐम्हीं मीं तुवाड़ै तेईनी पढ़ा, सै घटनाय इस टैंमा भूंती अत्ती।” सारै मैहणु हैरान थ्यै। तैन्हैं बोलु, “क्या ऐ यूसुफेरा पुत्र ना?”

तां यीशु बोलु, “ऐ सच्च आ कि मैहणु ऐतियै भविष्यवक्तै ना मंनतै जै ग्राँ मझ पआ मोटियोरा भुईया। एलिय्याह भविष्यवक्तेरै टैंमा मझ, इस्राएल देशा मझ बड़ी विधवाय थी। पण जेख्णी साढ़ै त्रा साल झड़ी ना पेयि ता परमेश्वरै एलिय्याह इस्राएल मझ कोसक्यै विधवाईरी मजत कांनेरै तेईनी ना भेईजा। ऐठणीरी वजाय, तेनि एलिय्याह कोसक्ये होरै देशेरी विधवाय किनि भेईजा।”

यीशु बोलणु जारी रखु, “जां एलीशा भविष्यवक्तेरै टैंमा मझ, इस्राएल देशा मझ बड़ै सारै मैहणु कौढ़ेरी बिमारी ला दुखी थ्यै। पण एलीशाय तैन्हां मझां कौ बि ठीक ना केया। तेनि सिर्फ इस्राएलेरै दुश्मणा केरा सेनापति नामान ठीक केया।” पण जै मैहणु यीशुरी गल्लै शुणतै थ्यै सै यहूदी थ्यै। ऐठणीरै तेईनी जेख्णी तैन्हैं सैक्या ऐ बौलता शुणा ता सैक्यै तैस पनि बड़ै गुस्सै भुवै।

नासरतेरै मैहणुवें यीशु पकड़ी लिया जां तैस आराधना कांनेरी जगाय किना ध्रीड़ी करी भेईनी लै गियै। सैक्यै तैस खत्म कांनेरै तेईनी तैस छिढांणेरै तेईनी एकि शपड़ेरै शिरा पनि लै गियै। पण यीशु भीड़ी मझां निकोही गिया जां नासरत नगरा छडि करी चलि गिया।

फिरी यीशु सारै गलील इलाकै मझ गिया, जां अक बड़ी बड्डी भीड़ तैस किनि यैई। सैक्यै ऐतियै बड़ा सारा मैहणुवां लै करि यै जै बड़ै बिमार जां अपंग थ्यै। तैन्हां मझां किछ मैहणु कांणै, किछ लट्टै किछ टांउणै जां किछ टट्टै थ्यै, जां यीशु मसीह सैक्यै सारै ठीक कियै।

ऐठणीरै अलावा, बड़ै सारै ऐतियै मैहणु यीशु मसीह किनि अंणै जैन्हां मझ बुरी आत्माय थी। यीशु मसीह बुरी आत्माईयानि तैन्हां मझां निकोही गांहणैरा हुक्म दित्ता। सै बुरी आत्माय जौरै-जौरे बोलणा लगी, “तु परमेश्वरैरा पुत्र आ!” भीड़िरै मैहणु हैरान थ्यै जां तैन्हैं परमेश्वरैरी स्तुति की।

फिरी यीशु बाराह मड़द चुणै जैन्हांनि तेनि अपड़ै खास चेलै बोलु। तैन्हैं खास चेलै तैस सेईतै यात्रा की जां तैस किना शिक्षा हासिल की।