27. दयालु सामरिरी कहानी

अक धियाड़ी, यहूदी व्यवस्थायरा अक खास जानकार यीशु किनि या। सै सभनियांनी ऐ लुहाना चांहथा थ्या कि यीशु गलत रीति सिंउ शिक्षा दींता थ्या। ऐठणीरै तेईनी तेनि बोलु, “हे गुरू, अनन्त जीवन पांणेरै तेईनी मूं कितु कांनु?” यीशु जवाब दित्ता, “परमेश्वरेरी व्यवस्थाय मझ कितु लिखोरू आ?”

तेनि मैहणु बोलु, “परमेश्वरैरी व्यवस्था बोलती कि अपड़ै परमेश्वरा सिंउ अपड़ै पूरै मंन सिंउ, प्रांण, सामर्थ, जां बुद्धी सिंउ प्रेम रख।” यीशु जवाब दित्ता, “तु इकदम सही आ! अगर तु ऐहीं करिया ता ताउनी जरूर अनन्त जीवन मेईंणा।“

पण सै व्यस्थायरा खास जानकार मैहणुवंनी लुहाना चांहथा थ्या कि तेसैरा जीवन जींणैरा तरीका सही थ्या। ऐठणीरै तेईनी तेनी यीशु किना पुच्छु, “ठीक आ, ता मिंडा पड़ोसी केणु आ?”

यीशु तैस व्यव्थायरै खास जानकारानि अक कहानी शुणाय जां कहानिरै जरियै तैसनी जवाब दित्ता। “अक यहूदी मैहणु थ्या जै एकि सिड़की बतै यरूशलेम किना यरीहो धेरै यात्रा काता थ्या।”

“किछ डाकुवै सैक्या लधा जां तैस पनि हमला करि दित्ता। तैन्हैं तेसैरू सभ किछ लै लियु जां तैन्हैं सैक्या यौउता मारा कि सै मरनेरी हालती मझ भौ गिया। तां फिरी सैक्यै चलि गियै।”

"तैस हादसै किना बाद, तेख्णी ऐ तेनि बत्तै अक यहूदी याजक ऐईंता। तेनि याजकै सैक्या मैहणु सिड़की पनि पियौरा हैरा। जेख्णी तेनि सैक्या मैहणु लधा ता सैक्या सिड़कै किना मुड़ि करी होरी बत्तै चलि गिया। तेनि सैक्या मैहणु जै सिड़कै मझ घायल पियौरा थ्या सै पूरी तराहि सिंउ अंणलधा करी छडा।”

"ऐठां किना कुछ टैंम बाद, अक लेवी तेसै सिड़कै बतै या। (लेवी यहूदिया केरा अक गौत्र थ्या जैन्हैं मंदिरा मझ याजका केरी मजत केईथी।) सै लेवी बि सिड़केरी होरी बत्तै निकोही गिया। तेनि बि सैक्या मैहणु अंणलधा करी दित्ता।”

“होरा जंणा जै तैस सिड़कै पनि या सैक्या सामरियैरा अक मड़द थ्या। (सामरी जां यहूदी योकिया सिंउ नफरत करींथ्यै।) तेनी सामरी सिड़कै पनि सैक्या मैहणु लधा। तेनी हैरू कि सै यहूदी थ्या, पण फिरी बि तेनि तैस पनि बड़ा तरस खा। जां सैक्या तैस किनि गिया जां तेसैरै जख्मा पनि पट्टी बन्हीं।”

“फिरी तेनी सामरी सैक्या मैहणु अपड़ै गधै पनि रखा जां सैक्या तैस सिड़कै किना एकि सरांय मज लै गिया। जेठि तेनि तेसैरी देखभाल कांनी जारी रखी।”

दुईं धियाड़ि, तैस सामरी अपड़ी यात्रा जारी रखणी जरूरी थी। तेनि तैस सरांयरै चोकीदारानि किछ धन दित्ता। तेनि तैस सेईतै बोलु, “ऐस मैहणुरी देखभाल करै। अगर ऐस धंनेरै अलावा तिंडा कुछ होरा धन खर्च भुवा ता वापिस ऐईछी करी मूं तिंडै तैन्हां खर्चा केरा भुगतान करी दींणा।

फिरी यीशु तैस व्यवस्थायरै खास जांणकारा किना पुच्छु, “तुवै कितु सौचतै? ऐन्हां त्रियां मैहणुवां मझां केणुहां मैहणु ऐस मैहणुरा पड़ोसी आ जै मैहणु लुटौरा जां चुत्थौरा थ्या?” तेनी जवाब दित्ता, “ सेहै जै तैस पनि दयालु थ्या।” यीशु तैस सेईतै बोलु, “तु बि गा जां ऐतियु ऐ कर।”