28. धनी जुवान राजा- कहानी

अक धियाड़ि, एकि धनी जुवान राजै यीशु किना आईछी करी पुच्छु, “हे उत्तम गुरू, अनन्त जीवन पांणेरै तेईनी मूं कितु कांनु चेहिंथु?” यीशु तैस सिंउ बोलु, “तु मूंनि उत्तम केईनी बौलता? सिर्फ अक्कै उत्तम आ जां सैक्या परमेश्वर आ। पण अगर तु अनन्त जीवन पांणा चांहथा ता परमेश्वरेरी व्यवस्थायरा पालन कर।”

तेनि राजै पुच्छु, मूं केणुहीं-केणुहीं अज्ञाईया केरा पालन कांनेरी जरूरत आ?” यीशु जवाब दित्ता, “खून मेईं काता, व्याभिचार मेईं काता(मतलब कोसक्यै जनेनी सिंउ शारीरिक सम्बन्ध मेईं बंणाता), चोरी मेईं काता, झूठ मेईं बोलता। अपड़ै मयि-बबैरा आदर करै, जां अपड़ै पड़ोसी सिंउ ऐपु समान प्यार करै।”

पण तेनि जुवान मड़दै बोलु, “आंउ अपड़ै बचपणा किना ऐ ऐन्हां सभनियां अज्ञाईया केरा पालन काता यौउरा। मूं हमेशा जींतै रींहणेरै तेईनी अबै बि कितु कांनेरी जरूरत आ?“ यीशु तैस धेरै नजर की जां तैस सिंउ प्रेम केया।

यीशु जवाब दित्ता, “अगर तु सिद्ध भूंणा चांहथा ता गहि करी अपड़ु सभ किछ बैचि दै जां सै पेईंसा गरीबा मझ बंडी दै, जां ताउनी स्वर्गा मझ धन मेईंणा। तां फिरी मूं पीछै आईछी गहि।”

जै गल्लै यीशु तैस जुवान राजैनि बोली तैन्हां शुणी करी सै जुवान राजा बड़ा उदास भौ गिया, केईनी कि सै बड़ा शैठ थ्या जां सै अपड़ी सारी धन-दौलत दींणी ना थ्या चांहथा। सै मुड़ी करी यीशु किना चलि गिया।

तां यीशु अपड़ै चैला सिंउ बोलु, “परमेश्वरेरै राज्य मझ शैठा मैहणुवां केरू गांहणु बड़ु जादा मुश्किल आ! हाँ, एकि शैठा मड़दानि परमेश्वरेरै राज्य मझ गांहणु तियौतु मुश्किल आ जिहीं कि सिन्हांणिरै पहेनै बतै ऊंटैरू निकूंहणु मुश्किल आ।”

जै यीशु बोलु सैकियु चेलै शुणु ता सैक्यै हैरान रैहि गियै। तैन्हैं बोलु, “अगर ऐ ऐंहीं आ ता परमेश्वरा केणु बचांणा?”

यीशु चैला पनि नजर दित्ती जां बोलु, “मैहणुवां केरै तेईनी अपांणैरा उद्धार कांना असम्भव आ। पण परमेश्वरेरै तेईनी कुछ बि कांनु असम्भव ना।”

पतरसै यीशु सिंउ बोलु, “असै चैलै अपड़ु सभ किछ छडि करी ताउ पीछै चलि यौउरै अत्तै। ता असैड़ा ईनाम कितु भूंणा?”

यीशु जवाब दित्ता, “हरेक मैहणु जेनि मिंडी वजाहि सिंउ घर, भाई, भींण, माँ बब या सम्पत्ति छडौरी आ, सैकियु तैसनि तैठां किना शाउ गुणा जादु मेईंणु, जां अनन्त जीवन बि मेईंणा। पण बड़ै सारै जै पेहिलै अत्तै सैक्यै पिछलै भूंणै जां बड़ै सारै जै पिछलै अत्तै सैक्यै पेहिलै भूंण।”