29. निर्दयी दासेरी कहानी

अक धियाड़ी, पतरसै यीशु किना पुच्छु, “हे स्वामी, मूं अपड़ै भाईनी कियोती बार माफ कांनु चेहिंथु, जेख्णी सै मिंडै खिलाफ पाप काता? क्या सत्त बार माफ कांनु चेहिंथु?” यीशु बोलु, “सत्त बारी ऐ ना, पण सत्थर बार माफ कर!” ऐठणीरे जरियै यीशुरा मतलब ऐक्या आ कि असुवां हमेशा माफ कांनु चेहिंथु। तेठणीरै तेईनी यीशु ऐकैई कहानी शुणांई।

यीशु बोलु, “परमेश्वरैरा राज्य एकि राजै समान आ जै अपड़ै दासा किना लेखा लींणा चांहथा। तेसैरा अक दास 2,00,000 चाँदिरै सिक्का केरा अक बड़ा बड्डा कर्जदार थ्या।”

पण तेनि दासै अपड़ा कर्ज ना चुकाईया, ऐठणीरै तेईनी राजै बोलु, “ऐसैरा कर्ज चुकता कांनेरै तेईनी ऐस मड़दा जां ऐसैरै पुरै परिवारा दासेरै रूपा मझ बैची दिया।”

फिरी सैक्या दास राजेरै सामणै जेणुवां केरै भारै पेया जां बोलु, “छंदै मूं पनि रैहम कर, आंउ अपड़ै कर्जैरी पूरी रकमिरा भुगतान करी देला। राजै तैस दासा पनि दया की, ऐठणीरै तेईनी राजै तेसैरा सारा कर्ज माफ करि दित्ता जां सै दास गांहणा दित्ता।”

पण जेख्णी सै दास राजै किना मिलि करी भेईनी गिया, ता तैसनी तेसैरा अक साउगी दास मेआ जै तेसेरै चोउवा महीनैरी मजदूरिरा कर्जदार थ्या। तेनि दासै सै अपड़ा साउगी दास पकड़ी लिया जां बोलु, “जै ताउ पनि मिंडा कर्जा आ तेसैरा मूनि भुगतान कर!”

“ सैक्या साउगी दास जेणुवां केरै भारै पेया जां बोलु, “छंदै मूं पनि रैहम कर, आंउ अपड़ै कर्जैरी पूरी रकमिरा भुगतान करी देला। पण ऐठणीरी वजाय, तेनी दासै अपड़ा साउगी जैलखानै मझ सुटि दित्ता जेख्णी तेईनी सै तैस कर्जैरा भुगतान ना करी दिया।”

“जै किछ बि तैठि भूं तैस हैरी करी सेक्यै होरै दास बड़ै परैशान भौ गियै। सैक्यै राजै किनी गियै जां तैसनी सभ किछ शुणां दित्तु।”

“राजै सैक्या दास शदा जां तेसनी बोलु, “हे दुष्ट दास! मीं तिंडा कर्जा ऐठणीरे तेईनी माफ केईथ्या केईनी कि तीं मूं सिंउ छन्दै केईथ्यै। ताउ बि तिहीयें कांनु चेहिंथु थियु। राजा यौउता गुस्सै थ्या कि तेनि सैक्या दास जैलखानै मझ सुटि दित्ता जेख्णी तेईनी सैक्या अपड़ै सारै कर्जैरा भुगतान ना करी दिया।”

तां यीशु बोलु, “मिंडा पिता जै स्वर्गा मझ विराजमान आ तुहां सभनियां सिंउ ऐहिंयो करेला अगर तुवै अपड़ै भाईनी अपड़ै दिल्ला किना माफ ना कातै।”