30. यीशु पंजा हजारा मैहणुवंनी रोट्टी खलांता- कहानी

यीशु अपड़ै खास चेलै प्रचार कांननी जां मैहणुवंनी शिक्षा दींणेरै तेईनी अलग-अलग ग्राँनि भेईजै। जेख्णी सैक्यै तैठि वापस पुज्जै जेठि यीशु थ्या ता तैन्हैं तैसनि शुणांउ कि तैन्हैं कितु केईथ्यु। तां यीशु सैक्यै सारै ऐपु सेइतै झीलिरै होरै पासै एकि शांत जगायनी कुछ टैंम सेईतै बेशणेरै तेईनी शदाय। फिरी सैक्यै एकि किश्ती पनि चढ़ी करी झीलिरै होरै पासै चलि गियै।

पण तैठि बड़ै सारै ऐतियै मैहणु थ्यै जैन्हैं यीशु जां तेसैरै चेलै किश्ती पनि गांहथै लधै। तैन्हैं मैहणुवें तैन्हां आघै झीलि पार पुजणेरै तेईनी झीलिरै ब्रखै-ब्रखै दाउड़तै रिय्है। फिरी जेख्णी यीशु जां तेसैरै चेलै झीली पार पुज्जै ता मैहणुवां केरी अक बड़ी बड्डी भीड़ तैन्हां पेहिलै तैठि भाती थी।

तैस भीड़ी मझ जनेनियां जां बच्चा छडी करि लगभग पंजा हजारा किना जादै मड़द थ्यै। यीशु तैन्हां मैहणुवंनी बड़ी भारी तरस यैई। यीशुरै तेईनी सैक्यै मैहणु तैन्हां भ्रैडा सैयि थ्यै जैन्हैरा कोई पुव्हाल ना थ्या। ऐठणीरै तेईनी यीशु तैन्हांनी शिक्षा दित्ती जां तैन्हां मझ जै बिमार मैहणु थ्यै सैक्यै सारै ठीक कियै।

सन्हेरै टैंमा, चेलै यीशु सिंउ बोलु, “अबै बड़ी हांण भौ गैई जां अढा-बढा कोई ग्राँ बि ना। ऐन्हां मैहणुवां ऐठां किना विदा कर ताकि ऐक्यै गहि करी खांणेरै तेईनी किछ लै लिया।”

पण यीशु चैला सिंउ बोलु, “तुवै ऐन्हांनि खांणेरै तेईनी देया!” तैन्हैं जवाब दित्ता, “असै ऐहीं किहीं करी सकतै? असुवां किनी सिर्फ पंज रोट्टी जां दो मछली ऐ अत्ती।”

यीशु अपड़ै चैला सिंउ बोलु कि तुवै भीड़िरा मैहणुवां पंजाह-पंजाह जंणा घहा पनि पांती ला करी बेशाई देया।

तां फिरी यीशु सैकेई पंज रोट्टी जां दो मछली लेई जां स्वर्गा धेरै हैरू, जां तैन्हां रोट्टिया केरै तेईनी परमेश्वरैरा धन्यवाद केया।

फिरी यीशु तैन्हां रोट्टिया जां मछलिया केरै भन्नी-भन्नी करि टुकड़ै कियै। तेनि मैहणुवंनी दींणेरै तेईनी अपड़ा चैला धेरै सैक्यै टुकड़ै दी दित्तै। चेलै तैन्हां रोट्टिया जां मछलिया बंडतै रिय्है, सारै मैहणु खा करी रज्जी गियै, पण तांबी सैकेई रोट्टी ना मुक्की।

तैठां बाद, चेलै सैकेई रोट्टी जां मछली किट्ठी की जै बचि गेईथी, जां तैन्हां बचोरिया रोट्टियै ला बाराह टोकरी होरी भरी गेईथी! सैकेई सारी रोट्टी जां मछली तैन्हां पंजा रोट्टिया जां दुवां मछलिया किना येईथी।