31. यीशु पांणी पनि चलता- कहानी

पंजा हजारा मैहणुवंनी रोट्टी खलांणा किना बाद, यीशु अपड़ै चैलानि किश्ती मझ गांहणेरै तेईनी बोलु। तैन्हांनि तेनि बोलु तुवै झीलिरै होरै पासैनि चलि गहा जबकि सैक्या थौड़ै टैंमेरै तेईनी तैठिऐ रुकि गिया। फिरी चेलै चलि गियै जां यीशु सैकैई मैहणुवां केरी भीड़ विदा की, कि सैक्यै अपड़ै-अपड़ै घरैनि चलि गहिया। ऐठां किना बाद, यीशु प्रार्थना कांनेरै तेईनी ऐकि पर्वता पनि चलि गिया। तैठि से अकेला थ्या, जां तेनि राती बड़ी हांण तेईनी प्रार्थना की।

तैस टैंमा, चेलै अपड़ी किश्ती बहांतै चलौरै थ्यै, पण हवा तैन्हां धेरै बड़ी जौर सिंउ चलौरी थी। रात बड़ी भौ थी गियौरी सैक्यै हालै तेईनी झीली बिच मझ पुजौरै थ्यै।

तैस टैंमा यीशु प्रार्थना कांनी खत्म की जां अपड़ा चैला किनी वापिस चलि पेया। सै किश्ती धेरै गांहणेरै तेईनी पांणी बेहीं चलणा लगा।

तां चेलै सैक्या लधा। सैक्यै बड़ै डरी गियै, केईनी कि तैन्हैं सौचु कि सै कोई भूत आ। यीशु पता थ्या कि सै बड़ै डरी गियै, ऐठणीरै तेईनी तेनि हक दी करी बोलु, “ डरा मेईं आंउ यीशु आ!”

तां पतरसै यीशु सिंउ बोलु, “हे प्रभु, अगर ऐक्या जै पांणी बेहीं चलता सै सच्च मझ तु आ ता मूंनि बि पांणी बेहीं चलि करी ऐपु किनि ऐईंणैरा हुक्म दै।” यीशु पतरसा सिंउ बोलु, “आ!“

फिरी पतरस किश्ती पना उतरी गिया जां यीशु किनि गांहणेरै तेईनी पांणी बेहीं चलणा लगा। पण थौड़ा आघै गहि करी, तेनि अपड़ा टीरा केरी नजर यीशु किना फैरी ली जां पांणिरी छाल्ही जां तैज हवा महसूस कांनी शुरू करि दित्ती।

तां पतरस तैन्हां छाल्हिया जां तैज हवाय धेरै डरि गिया जां पांणी मझ डुबणां लगि पेया जां चिंडै दींणा लगा, “हे प्रभु, मूं बचा!” यीशु तेसै टैंमा अपड़ा हत्थ आघै केया जां सैक्या पकड़ी लिया। तां तेनि पतरसा सिंउ बोलु, “तिंडा विश्वास बड़ा घट आ! तीं सही सलामत मूं किनि पुजणेरै तेईनी मूं पनि भरौसा किना केया?”

तां यीशु जां पतरस किश्ती पनि चढ़ी गियै, तां इकदम हवा चलणी बंद भौ गैयि। पांणी शांत भौ गियु। चेलै हैरान भौ करी यीशु आघै जेणुवां केरै भारै पैई गियै। तैन्हैं यीशुरी आराधना की जां तैस सिंउ बोलु, “सच मझ तु परमेश्वरैरा पुत्र आ।”