32. यीशु बुरी आत्माय किना पीड़ित मैहणु जां एकि बिमार जनेनी ठीक काता- कहानी

यीशु जां तेसैरै चेलै अपड़ी किश्ती मझ तैस इलाकैनि गियै जेठि गिरासेनी मैहणु रिहींथ्यै। सैक्यै तैस इलाकै मझ पुज्जै जां किश्ती मझां उतरी गियै।

तैठि अक मैहणु थ्या जै बुरी आत्माय किना पीड़ित थ्या।

ऐस मैहणु मझ यौउता जौर थ्या कि ऐस कोई बि काबु ना करि सकींथ्या। केही बारी ता मैहणुवें ऐसेरै हत्थ जां पायड़ शंगऐ ला बि बन्हैं, पण सै तैन्हां बि त्रौड़ी छडींथ्या।

सैक्या मैहणु तैस इलाकै मझ कब्रिया मझ रिहींथ्या। ऐक्या मैहणु पूरी रात पूरी धियाड़ी चिंडै दींता रिहींथ्या। सै लिकड़ै ना लाईंथ्या जां रौज अपांणा घौड़ै ला घायल करींथ्या।

सैक्या मैहणु दाउड़ी करी यीशु किनि या जां जेणु टंकि दित्तै। तां यीशु तैस मैहणु अंतरी बुरी आत्माय सिंउ गल्ल की जां बोलु, “ऐस मैहणु मझां भेईर निकोही आ!”

तेनि बुरी आत्माय जौरै चिंड दित्ती, “हे यीशु, परम प्रधान परमेश्वरेरै पुत्र, तिंडा मूं सिंउ कितु कंम? छंदै मूं मेईं सताय!” तां यीशु तैस बुरी आत्माय किना पुच्छु, “तिंडु नाँ कितु आ?” तेनि जवाब दित्ता, “ मिंडु नाँ सैना आ, केईनी कि असै बड़ी अत्ती।” (रोमी सैनाय मझ केही हजार सैनिका केरा अक झुन्ड अक “सैना“ भुईंथी।)

तैन्हैं बुरी आत्माईयै यीशु सिंउ विंनती की, “छंदै असुवां ऐस इलाकै किना भेईर मेईं भेईजै!” तैठि नीड़ ऐ पहाड़ा पनि सूंरा केरा अक झुंड चरता थ्या। ऐठणीरै तेईनी बुरी आत्माईयै यीशु सिंउ विंनति की, “छंदै असुवां ऐन्हां सूंरा मझ भेईजी दै!” यीशु बोलु, “ठीक आ, ऐन्हां मझ चलि गहा!”

फिरी सैकेई बुरी आत्माय तेस मैहणु मझां निकोही करी तैन्हां सूंरा केरे झुन्डा मझ चलि गेई। सै सूंर दाउड़ी करी एकि टिल्लै पना झीली मझ पैई गियै जां सारै डुबि करी मरी गियै। तैस झुन्डा मझ लगभग 2,000 सूंर थ्यै।

तैठी तैन्हां सूंरा केरी देखभाल कांनारै मैहणु थ्यै। तैठि जै किछ बि भूं तैन्हैं सै सभ हैरू जां सैक्यै नगरानि नशी गियै। यीशु तैठि जै किछ बि केईथ्यु नगरा गहि करी तैन्हैं सभनियांनि शुणाउ। तैस नगरेरै मैहणु निकोही यै जां सैक्या मैहणु लधा जैस मझ बुरी आत्माय थी। सै शांति सिंउ, लिकड़ै लाउरै, जां एकि आम मैहणुरै व्यवहारा सैयि बेठौरा थ्या।

सैक्यै मैहणु बड़ै डरौरै थ्यै जां यीशुनि चलि गांहणानि बोलु। फिरी यीशु किश्ती पनि चढ़ी गिया। सैक्या मैहणु जैस मझ बुरी आत्माय थी तेनि यीशु सिंउ बोलु, छंदै मूं बि ऐपु सेईतै ऐईंणा दै।

पण यीशु तैस सिंउ बोलु, “नहीं। आंउ चांहथा कि तु घरै गहि करी सभनियांनि शुणा कि परमेश्वरै तिंडै तेईनी कितु कियु। तैन्हांनि शुणा कि किहीं परमेश्वरै ताउ पनि दया केईथी।

ऐठणीरै तेईनी सै मैहणु चलि गिया जां सभनियांनि ऐठणीरे बारै मझ शुणांउ जै यीशु तेसैरै तेईनी केईथ्यु। तेसैरी कहानी शुणी करी हर मैहणु शुश्त भौ गेईथ्या।

यीशु झीलिरी होरै पासै वापस चलि या। तेसैरै तैठि पुजणा किना बाद, अक बड़ि बड्डी भीड़ तेसैरै चोउवो पासै किट्ठी भौ गैयि जां तैस दबांणा लगि पैयि। तैस भीड़ी मझ अक जनानी थी जैसनी बाराह साला किना खून चलणैरी बिमारी थी, सेकैई ऐस बिमारी किना बड़ी दुखी थी। तेनि अपड़ा सारा पेईंसा डाक्टरी इलाजा पनि ला थ्या दितौरा ताकि सै तैस बिमारी किना ठीक भौ सकिया, पण तेसैरी बिमारी होरी बि बिगड़ी गैयि।

तेनि जनेनी शुणौरू थियु कि यीशु केही बिमार मैहणु ठीक केईथ्यै, “तेनि मंना मझ ठांनी लियु कि अगर आंउ सिर्फ यीशुरै लिकड़ै ऐ छू लियुं ता आंउ ठीक भौ गांहणी!” ऐठणीरै तेईनी सेकैई यीशु पीछै यैई जां तेसैरा कपड़ा छू लिया। जिहीं ऐ तेनि यीशुरा कपड़ा छुत्ता, तेख्णी ऐ खून चलणा बंद भौ गिया।

इकदम ऐ, यीशु पता लगि गिया कि तेस मझां सामर्थ नकौथी। ऐठणीरै तेईनी तेनी पीछै मुड़ि करि पुच्छु, ‘आंउ कुनि छुत्ता?” चेलै जवाब दित्ता, “ऐठि यौउतै सारै मैहणुवें तिंडै चोउवो पासै भीड़ लाउरी आ, जां ताउ शिंडै पूंते अत्तै। ता तीं केईनी पुच्छु कि आंउ कुनि छुत्ता?”

सेकैई जनानी यीशुरै सामणै कंपती जां बड़ी जादी डरौरी अपड़ा जेणुवां केरै भारै बेशि गैयि। तां तेनि तैसनि शुणा दित्तु कि तेनि कितु कियु, जां ऐ बि कि सै ठीक भौ गैयि। यीशु तैस जनेनी सिंउ बोलु, “तिंडै विश्वासै तु ठीक की। शांति सिंउ गा।”