36. यीशुरा रूप बदलियूंणा- कहानी

एकि हफ्तै बाद यीशु, पतरस जां याकूब जां तेसैरा भाई यूहन्ना सेईतै लियै,(ऐक्या यूहन्ना नाँईयेरा चैला सैक्या मैहणु ना जेनि यीशुनि बपतिस्मा दितौरा थ्या।) जां तैन्हां एकांत मझ कोसक्यै उथड़ै पहाड़ा पन लै ग्या।

जेख्णी यीशु प्रार्थना काता थ्या ता तेसैरा चैहरा दिहा सैयि प्रगड़ा भौ गिया। तेसैरै लिकड़ै लाईटी सैयि हच्छै भौ गियै, जिहीं धरती पनि कोई रंग करि सकिया तैस किना बि बधी करी हच्छै।

तां मूसा जां एलिय्याह भविष्यवक्ता प्रकट भुवै। ऐक्यै मड़द इस धरती पनि ऐस टैंमा किना इस साला किना केही शाउ साल पेहिलै रिय्हां करीथ्यै। तैन्हैं यीशु सिंउ तैसेरी मोउतिरै बारै मझ गल्ल की, केईनी कि तैस तुरन्त यरूशलेम मझ मरि गांहणु थियु।

जेख्णी मूसा जां एलिय्याह यीशु सिंउ गल्लै कातै थ्यै तेख्णी पतरसै यीशु सिंउ बोलु, “असेड़ै तेईनी ऐठि भुणु भलु आ। असै त्रा मंडप बणांतै, अक तिंडै तेईनी, अक मूसेरै तेईनी, जां अक एलिय्याहेरै तेईनी।” पण पतरसा ना थ्या पता कि सै कितु आ काता।

जेख्णी पतरस गल्लै काता थ्या, ता ऐकि चमकदार बदऐ हैट आईछी करि सेक्यै ढकि लियै। फिरी तैन्हैं बदआ मझां अक आवाज शुणी। तेनि बोलु, “ऐक्या मिंडा पुत्र आ जैस सिंउ आंउ प्रेम काता। आंउ ऐस किना खुश आ। तेसैरी शुणा।” सैक्यै त्राईयो चेलै डरि गियै जां धरती पनि लेमि गियै।

तां यीशु सै छुत्तै जां बौलु, “डरा मेईं। उट्ठी गहा।” जेख्णी तेन्है चौउवो पासै तकांउ, ता सै जै तेड़ी थ्या सै सिर्फ यीशु थ्या।

यीशु जां सै त्राइयो चेलै पहाड़ा पना हेट उतरी यै। तां यीशु तेन्हा सिंउ बौलु, “एमियां जै ऐठी भूं तेठणिरी चर्चा कौस सिंउ बि मेईं कातै। मुं जल्दी ऐ मरी गंहणु जां फिरी जींती गंहणु। तेड़ा बाद तुहै मेहणुवां सिंउ बौलि सकतै।”