37. यीशु लाजरा मौरा मझां जींतैता- कहानी

लाजर नाँईयैरा अक मैहणु थ्या। तैसेरी दो भींणी थी जैन्हैरू नाँ मरियम जां मार्था थियु। सै सारै यीशुरै बड़ै अच्छै मित्र थ्यै। अक धियाड़ि, कुनिक्यै यीशु सिंउ बोलु कि लाजर बड़ा बिमार थ्या। जेख्णी यीशु ऐ शुणु ता तेनि बोलु, “ऐ बिमारी लाजरेरै मरनै ला खत्म ना भूंणी। ऐठणीरी वजाय, लाजरा मैहणु परमेश्वरैरा आदर कांनेरे तेईनी तियार कांनै।”

यीशु अपड़ै मित्रा सिंउ प्रेम करींथ्या। पण जेठि सै थ्या तेठि सै दुवां धियाड़िया तेईनी भाता रिय्हा। तैन्हां दुवां धियाड़िया किना बाद, तेनि अपड़ै चैला सिंउ बोलु, “आईछा,वापिस यहूदियैनि गांहथै।” चेलै जवाब दित्ता, “पण हे गुरू, ऐम्हीं कुछ टैंम पेहिलै तेठणीरै मैहणु ताउ मारी छडणां चांहथै थ्यै! असैड़ा मित्र लाजर झुलि गियौरा, जां मूं सैक्या ब्यौल्हणा।”

यीशुरै चेलै जवाब दित्ता, “हे प्रभु, अगर लाजर झुलौरा ता सै ठीक भौ गांहणा।” तां यीशु तैन्हां सिंउ खुलि करी बोलि दित्तु, कि “लाजर मरि आ गियौरा। आंउ खुश आ कि आंउ तेठि ना थ्या, ताकि तुवै मूं पनि विश्वास करि सकिया।”

जेख्णी यीशु लाजरेरै ग्राँ पुज्जा ता लाजरा मौरै चोऊर धियाड़ी भौ थी गियोरी। मार्था यीशु सिंउ मिलणा भेईर यैई जां बोलु, “हे प्रभु, अगर तु ऐठि भूंता ता मिंडा भया ना थ्या मरना। पण आंउ विश्वास काती कि जै किछ तु परमेश्वरेरै नाँ किना मगता सै ताउनि मैयि गांहथु।”

यीशु जवाब दिता, पुनरूत्थान जां जीवन आंउ आ। जै कोई मूं पन विश्वास काता अगर सै मरि बि गहिया ता सै मरि करि बि जींता रींहणा। जां जै कौ जींता आ जां मूं पन विश्वास रखता सै अनंतकाल तेईनी ना मरना। क्या तु ऐस गलै पन विश्वास काती?” मार्थाय जवाब दित्ता, “हे प्रभु, आंउ विश्वास काती कि तु परमेश्वरैरा पुत्र मसीह आ।”

तां मरियम यैई। तेनि यीशुरै पैयिड़ा पैई करि बोलु, “हे प्रभु अगर तु इठि भूंता ता मिंडा भया ना थ्या मरना।” यीशु तैस किना पुच्छु, “तुहैं लाजर कोठि आ रखौरा?” तैन्हैं तैसनि शुणांउ, “कब्री मझ। आ जां तका लै।” तां यीशु रूंणा लगा।

सै कब्र अक गुफा थी जेसैरै दुवारा पनि अक बड़ा बड्डा घौड़ थ्या छडौरा। जेख्णी यीशु कब्री पनि पुज्जा तां तेनि बोलु, “ऐस घौड़ा हठाय दिया।” पण मार्थाय बोलु, “लाजरा मौरै चोऊर धियाड़ी भौ गियोरी अत्ति। तैस किना ता अबै शणिंध ऐईंता भूंणा।”

यीशु जवाब दित्ता, “क्या मीं तुहां सिंउ बोलोरू ना थियु कि अगर तुवै मूं पनि विश्वास करेलै ता परमेश्वरैरी सामर्थ तकालै?” ऐठणीरै तेईनी तैन्हैं घौड़ हठाय दित्ता।

तां यीशु खड़ु स्वर्गा धेरै तका करि बौलु, “हे पिता परमेश्वर आंउ तिंडा धन्यवाद काता; कि तीं मिंडी गल शुणि लैई। जां मूं पता थ्या, कि तु सदा मिंडी शुणता, पण मीं ऐठि ऐकियु ऐन्हां मैहणुवां केरी मजत कांनेरै तेईनी बोलु ताकि ऐ मैहणु विश्वास करिया कि तीं आंउ भेईजौरा आ।” ऐ बौलि करि तेनी जौरै हक दी करि बौलु, “हे लाजर, भेईर निकोहि आ।”

फिरी लाजर भेईर चलि या, तेसैरै हत्थ जां पैयिड़ हालै बि कफणै ला बंन्हौरै थ्यै जां तेसैरू मुहां पन कफण पलैटोरू थियु। यीशु मैहणुवां सिंउ बौलु, “ऐस कफणा खौलणेरै तेईनी ऐसैरी मजत करा।” ऐस चमत्कारेरी वजाहि सिंउ बड़ै सारै यहूदियै यीशु पनि विश्वास केया।

पण यहूदिया केरै धार्मिक अगुवै यीशु सिंउ जलन रखणा लगै, ऐठणीरै तेईनी सैक्यै सारै किठियै जां अक योजना बंणाणा लगै कि किही यीशु जां लाजर मारी छडियो।