38. यीशु पकड़वाई गांहथा- कहानी

हर साल, यहूदी मैहणु फसह नाँईंयेरा अक त्यौव्हार मनांईथ्यै। ऐस त्यौव्हारा ऐस खुशी मझ मनांईथ्यै कि केही सदी पेहिलै परमेश्वरै यहूदिया केरै पूर्वज मिस्र दैशेरी गुलामी किना छडाउरै थ्यै। लगभग त्रा साल बाद यीशु खुलै आम प्रचार कांना शुरू केया। यीशु अपड़ा चैला सिंउ बोलु कि सै तैन्हां सिंउ यरूशलेम मझ फसहेरा त्यौव्हार मंनाणा चांहथा, जां ऐ बि कि सै तैठि मारियूंणा।

यीशुरै चैला मझ अक यहूदा नाँईयेरा मैहणु थ्या। यहूदा खास चैला केरी पेईंसा केरी थेईली रखणार थ्या, पण हर बार सैक्या तैस थेईली मझां पेईंसै कढि लिईंथ्या। यीशु जां तेसैरै चेलै यरूशलेम शहरा मझ पुजणा किना बाद यहूदा यहूदी अगुवो किनि गिया। तेनि पेईंसा पनि यीशुरा तैन्हेरै हत्था पकड़वांणेरा साउदा केया। तैस पता थ्या कि यहूदी अगुवे ना मनींथ्यै कि यीशु ऐ मसीह आ। तैस ऐ बि पता थ्या कि सैक्यै ऐस मरी छडणा चांहथै थियै।

महांयाजकेरै बौलणा पनि यहूदी अगुवौऐ यहूदैनी तीह चांदिरे सिक्कै दित्तै कि ताउ यीशु असेड़ै हत्था पकड़वांणा। ऐ बिल्कुल तिहीयें भू जिहीं भविष्यवक्तै बोलोरू थियु। यहूदा मनि गिया जां पेईंसै लै करी चलि गिय। सैक्या यीशु पकड़वांणेरे तेईनी तैन्हैरी मजत कांनेरै तेईनी कौठिक्यां मौकेरी तलाश कांना लगा।

यरूशलेम शहरा मझ यीशु अपड़ै चैला सिंउ फसहैरा त्यौव्हार मना। फसहेरी धामिरै दौरान, यीशु रोट्टी लै करि भन्नी। तेनि बोलु, “ऐस लेया जां खा। ऐक्या मिंडा शरीर आ जै आंउ तुवाड़ै तेईनी दींता। ऐस मिंडि यादी मझ करै।” ऐनि हिसाबै, यीशु बोलु कि मूं तुवाड़ै तेईनी मरि गांहणु, मतलब तैन्हेरै तेईनी तैस अपड़ै शरीरैरा बलिदान चढ़ाय दींणा।

फिरी यीशु अक दाखरसैरा प्याला लेया जां बोलु, “ऐस पी लेया। ऐ नवें वायदैरा मिंडा खून आ जै कि मूं डौलणा ताकि परमेश्वर तुवाड़ै पाप माफ करिया। हर बार ऐस पींतै टैंमा मिंडी यादी मझ ऐहीं करै जै आंउ ऐम्हीं काता आ।”

तां यीशु अपड़ै चैला सिंउ बोलु, “तुहां मझां एकि जणैं आंउ पकड़वांणा।” चेलै शुश्त भौ गियै, जां पुछणा लगै ऐतिया कंम केणु करैला। यीशु बोलु, “मूं पकड़वांणार मैहणु सैक्या भूंणा, जैसनि मूं ऐक्या रोट्टिरा टुकड़ा दींणा।” तां तेनि सैक्या रोट्टिरा टुकड़ा यहूदैनि दित्ता।

तैस रोट्टी लींणा किना बाद, यहूदा मझ शैतान चलि गिया। यहूदा तेख्णी ऐ निकोही करी यीशु पकड़वांणनी यहूदी अगुवो केरी मजत कांनेरै तेईनी चलि गिया। ऐक्या रातिरा टैंम थ्या।

रोट्टी खाना किना बाद, यीशु जां तेसैरे चेलै जैतून पहाड़ा पनि चलि गियै। यीशु बोलु, “तुहां सभनियां आज राती मिंडा साउग छडि दींणा। ऐ लिखौरू आ, कि मूं पुव्हाल मांना जां सारी भ्रेडै तित्तर-भित्तर भौ गांहणी।”

पतरसै जवाब दित्ता, “बेशक बाकि ताउ सभ छडि दिया, पण मूं तिंडा साथ ना छडणा!” तां यीशु पतरसा सिंउ बोलु, “शैतान तुहां सभनियां लै लींणा चांहथा, पण हे पतरस, मीं तिंडै तेईनी प्रार्थना की कि तु विश्वासा मझ पीछै ना हठि गहिया। फिरी बि, अजकि राती कुख्ड़ैरी ल्यौ दींणा किना पेहिलै ताउ त्रा बारी नंमा काना कि तु मूं ना जांणता।”

पतरसै फिरी यीशु सिंउ बोलु, “चाहे आंउ मरि बि गहूँ, तां बि मूं कदि तिंडा नंमा ना कांना कि आंउ ताउ ना जांणता!” बाकि चेलै बि ऐहिंयो ऐ बोलु।

तां यीशु अपड़ा चैला सेईतै गतसमनी नाँईयेरी एकि जगायनी गिया। यीशु अपड़ै चैला सिंउ प्रार्थना कांनेरै तेईनी बोलु ताकि शैतान तैन्हैरी परीक्षा ना करिया। तां यीशु ऐपु प्रार्थना कांननी चलि गिया।

यीशु त्रा बारी प्रार्थना की, “है मिंडै पिता, अगर भौ सकिया ता छंदै ऐक्या दुखैरा प्याला पींणेरै तेईनी मूंनि मेंई दैई। पण अगर मैहणुवां केरै पाप माफ कांनेरै तेईनी अगर होरा कोई चारा ना ता, तिंडीऐ मर्जी पूरी भुईया।” यीशु बड़ा भारी दुखि थ्या जां तेसैरा पसीना खूनेरिया बूंदा सैयि थ्या। तैसनि सामर्थ दींणेरै तेईनी परमेश्वरै अक स्वर्गदूत भेईजा।

हर बारी प्रार्थना कांना किना बाद, यीशु अपड़ा चैला किनि वापिस या, पण सैक्यै झुलि थियै गियौरै। जेख्णी यीशु त्रीं बारी वापिस या तां यीशु बोलु, “बियुझी गहा! मूं पकड़वांणै बा इट्ठि आ।”

यहूदी अगुवो सेईतै, जां सैनिका सेईतै जां एकि बड्डी भीड़ी सेईतै यहूदा आईछी पिया। तैन्हैं तलवारी जां शौठै लियौरै थियै। यहूदै यीशु किनि आईछी करि तेसनि बोलु, “हे गुरू, नमस्कार, “जां तैसनि फोक्कु दित्ता। तेनि यहूदी अगुवोनि बोलौरू थियु कि जैसनि मूं फोक्कु दींणा तैस तुवै पकड़ी लैई। तां यीशु बोलु, “हे यहूदा, क्या तु मूं फोक्कु दी करि पकड़वांणा चांहथा?”

जेख्णी सैक्यै सैनिक यीशु पकड़तै थ्यै, तां पतरसै अपड़ि तलवार पकड़ी जां महांयजकेरै एकि सेवका पनि बहि दित्ती जां तेसैरा अक कंन ऐ बढि दित्ता। यीशु बोलु, “तलवार दूर कर! आंउ अपड़ै बचावेरै तेईनी परमेश्वरा किना एकि स्वर्गदूता केरी सैनायरी विंनती करि सकता। पण मूं अपड़ै पिताऐरी गल्ल मनणी आ।”तां यीशु तैस मैहणुरा कंन ठीक करि दित्ता। तां फिरी सारै चेलै नशि गियै।