39. यीशु पनि मुकद्दमा चलता- कहानी

अबै ऐक्या अधि रातिरा टैंम थ्या। सैक्यै सैनिक यीशु महायाजकेरै घरै लैई यै, केईनी कि सै यीशु किना स्वाल कांना चांहथा थ्या। पतरस दूरां किना तैन्हैरा पीछा काता थ्या। जेख्णी सैनिक यीशु घरा मझ लै गियै, तां पतरस रुकि गिया जां आग सैकणा बेशि गिया।

घरा अंतर, यहूदी अगुवो यीशु पनि मुकद्दमा चला। सैक्यै तेसैरै खिलाफ झूठी गल्ला केरा दोष लांणेरै तेईनी बड़ै झूठै गवाह लै करि यै। हालाँकि, तैन्हेरी गल्लै योकिया मझ सहमत ना थी, ऐठणीरै तेईनी यहूदी अगुवे ऐकियु साबित ना करियु कि सेक्या कौसक्यै गल्लैरा दोषी थ्या। यीशु किछ बि ना बोलु।

अंत मझ, महायाजकै सिद्धै यीशु धेरै तका करि बोलु, “ असुनि शुणा कि क्या तु ऐ जीवित परमेश्वरैरा पुत्र मसीह आ?”

यीशु बोलु, “आंउ आ, जां तुहां आंउ परमेश्वरा सिंउ बेठौरा जां स्वर्गा किना ऐईंता बि तकांणा।” महायाजकै अपड़ै लिकड़ै फाड़ी छडै केईनी कि जै यीशु बोलु सैक्या तैस गल्लै पनि बड़ा गुस्सै थ्या। सैक्या होरै अगुवो पनि क्रिज्जा, “असुवां ऐकियु शुणांणेरे तेईनी होरै गवाहिरी जरूरत ना कि ऐनि मैहणु कितु कियौरू आ! तुहैं ऐपुऐ सैक्या ऐ बोलता शुणौरा कि सै परमेश्वरेरा पुत्र आ। तेसैरै बारै मझ तुवाड़ा कितु विचार आ?”

सारै यहूदी अगुवो महायाजकानि जवाब दित्ता, “सैक्या मरनेरै काबिल आ!” तां तैन्हैं यीशुरै टीरा पनि पट्टी बन्हीं दित्ती, तैस पनि थुक्कु, सैक्या मारा, जां तेसैरा मजाक उड़ा।

जां पतरस, जेख्णी सैक्या घरा भेईर भाता थ्या। तां एकि नौकरेणी छोकरी सैक्या लधा। तेनि तैस सिंउ बोलु, “तु बि यीशु सेईतै थ्या!” पतरसै नंमा करि दित्ता। बाद मझ, एकि होरी छोकरी ऐकैई ऐ गल्ल बोलि, जां पतरसै फिरी नंमा करि दित्ता। अंत मझ, किछ मैहणुवें बोलु, “असुवां पता कि तु यीशु सेइतै थ्या केईनी कि तुवै दोईयो गलील किना अत्तै।”

तां पतरसै बोलु, “अगर आंउ ऐस मैहणु जांणता ता परमेश्वर मूंनि श्राप दिया!” पतरसै इकदम ऐ कसम बि खाई तां एकि कुख्ड़ै ल्यौ बि दित्ती। यीशु पीछै मुड़ि करि पतरसा धेरै तकाउ।

पतरस तैठां किना चलि गिया जां हिक पिटणां जां रूंणा लगा। तेसै टैंमा,यीशु पकड़वांणै बाऐ यहूदै तकाउ कि यहूदी अगुवो यीशुनि मोउतिरी सजा दित्ती। यहूदा बड़ा दुखि भौ गिया जां तेनि आत्म हत्या करि दित्ती।

अबै तैस देशैरा राज्यपाल पिलातुस थ्या। सैक्या रोम देशेरै तेईनी कंम करींथ्या। यहूदी अगुवे यीशु तैस किनि लै करि यै। सै चांहथै थ्यै कि पिलातुस तैसनि मोउतिरी सजा दिया जां तैस मरी छडिया। तां पिलातुसै यीशु किना पुच्छु, “क्या तु यहूदिया केरा राजा आ?”

यीशु जवाब दित्ता, “तीं सच्चै बोलु। पण मिंडा राज्य ऐठि धरतिरा ना। अगर भूंता ता मिंडै दासा मिंडै खिलाफ युद्ध थ्या कांना। आंउ धरती पनि परमेश्वरेरै बारै मझ सच्च शुणांणा यौउरा। हरेक मैहणु जै सच्चा सिंउ प्रेम काता सै मिंडि शुणता।” पिलातुसै बोलु, ता सच्च कितु आ?”

यीशु सिंउ बात-चीत काना किना बाद, पिलातुसै भेईर भीड़ी किनि गहि करि बोलु, “मूं ऐस मझ ऐतिया कोई दोष ना बुझियूंता कि ऐसनि कोई सजा ना दियो कि ऐक्या मारी छडणेरै काबिल भुईया।” पण यहूदी अगुवो जां भीड़ी जौरै हक्क दी करि बोलु, “ तैस क्रूसा पनि चाढ़ी दिया!” पिलातुसै जवाब दित्ता, “सैक्या किछ बि गलत कांनैरा दोषी ना।” पण सैक्यै होरै बि जौरै- जौरै चिंड्डै दींणा लगै। तां पिलातुसै त्रीं बारी बोलु, “सैक्या दोषी ना!”

पिलातुस डरि गिया कि तैस भीड़ि दंगै शुरू करि दींणै, ऐठणीरै तेईनी सै अपड़ै सैनिका केरै जरियै यीशु क्रूसा पनि चाढ़नेरै तेईनी मंनि गिया। रोमी सैनिकै यीशुनि कौड़ै लवाई, जां तैसनि राजै बाऐ लिकड़ै लवाई; जां तेसैरै शिरा पनि कंडा केरू बंणौरू मुकुट रक्खु। तां सैक्यै ऐ बोलि करि तेसैरा मजाक उडांणा लगै, “तका यहूदिया कैरा राजा!” “तका, यहूदिया केरा राजा!” पिलातुस डरि ग्या कि तैसै भिड़ी दंगे शुरु करि दिणै, एठणिरै तैईनि सै अपड़ा सैनका केरै जरियै यीशु क्रूसा पनि चड़नानि मनि ग्या। रोमी सैनकै यीशुनि कोड़ै लई, जां तेसनि राजेरै कपड़ै लुवाऐ, जां तेसेरै शिरा पनि कंडा केरु बणोरू मुकुट रखु। तां सै ऐ बोलि करि तैसेरा मजाक उड़ाणा लगै, “तका यहूदिया कैरा राजा!"