40. यीशु क्रूसा पनि चाढ़ना- कहानी

यीशुरा मजाक उडांणा किना बाद, सैनिक तैस क्रूसा पनि चाढ़नेरै तेईनी लै गियै। तैन्हैं सैक्या क्रूस तैसै किना चुका जैस पनि सैक्या मरना थ्या।

सैक्यै सैनिक यीशु तैस जगाय लै करि यै जैसनी खोपड़िरी जगा बोलींथ्यै जां तेसैरै हत्थ जां पैयिड़ क्रूसा पनि बिन्हीं दित्तै। पण यीशु बोलु, “हे पिता, ऐन्हांनि माफ कर, केईनी कि ऐन्हां ना पता कि ऐक्यै कितु कातै अत्तै।” तैन्हैं अक पट्टी बि तेसैरै शिरा प्रन टंगि दित्ती। तैस पनि लिखोरू थियु, “यहूदिया केरा राजा।” पिलातुसै तैन्हांनि ऐहै लिखणेरै तेईनी बोलौरू थियु।

तां सैनिकै यीशुरै लिकड़ा केरै तेईनी पर्ची सुट्टी। जेख्णी तैन्हैं ऐतियु कियु ता तैन्हैं सैकेई भविष्यवाणी पूरी की जैन्हां मझ लिखौरू थियु, “तैन्हैं तेसैरै लिकड़ै योकिया मझ बंडि लियै, जां तेसैरै लिकड़ा केरै तेईनी पर्ची सुट्टी।”

तैठि दो डाकु बि थ्यै, सैक्यै दोईयो डाकु सैनिकै तेसै टैंमा क्रूसा पनि चाढ़थियै। तैन्हैं सैक्यै यीशुरै दोईयो पासै रखौरै थ्यै। तैन्हां मझां एकि डाकु यीशुरा मजाक उड़ा, पण होरै डाकु बोलु, “क्या ताउ डर ना लगता कि परमेश्वरा ताउनि सजा दींणी? असै बड़ै सारै बुरै कंमा केरै दोषी अत्तै, पण ऐक्या मैहणु निर्दोष आ।” फिरी तेनि यीशु सिंउ बोलु, “जेख्णी तु अपड़ै राज्य मझ ऐईला ता छंदै मूं याद रखै।” यीशु जवाब दित्ता, “आजै तु मूं साउगा स्वर्गलोका मझ भूंणा।”

यहूदी अगुवो जां भीड़ी मझां केहियै मैहणुवें यीशुरा मजाक उड़ा। तैन्हैं यीशु सिंउ बोलु, “अगर तु परमेश्वरैरा पुत्र आ, ता क्रूसा पना हैट उतरी आ जां अपांणा बचा लै! तां असै ताउ पनि विश्वास करेलै।”

तां तैस पूरै दैशैरा असमांण पूरी तराहि सिंउ काआ भौ गिया, बेशक सैक्या धियाड़िरा टैंम थ्या। ऐक्या धियाड़िरै टैंमा काआ भुईथ्या जां त्रियां घण्टा तेईनी ऐत्तिया ऐ रेहिथ्या।

तां यीशु हक्क दी करी बोलु, पूरू भू! हे पिता, आंउ अपड़ि आत्मा तिंडै हत्था दींता।” तां तेनि अपड़ु मुंडक उन्धु कियु जां अपड़ै प्रांण त्यागी दित्तै। जेख्णी सै मुआ ता अक बड़ा बड्डा भुन्जल भुआ। सैक्या बड्डा पड़दा जै परमेश्वरेरी उपस्थिति किना मैहणुवां अलग करींथ्या प्रन किना हैट तेईनी फटि करी दो भाग भौ गिया।

अपड़ी मोउतिरै जरियै, यीशु मैहणुवां केरै तेईनी परमेश्वरा किनी ऐईंणैरी बत्त खौली दित्ती। जेख्णी यीशुरी निगरानी कांनारै एकि सैनिकै जै किछ भुईथियु सै सभ किछ तकाउ तां तेनि बोलु, “पक्का, ऐक्या मैहणु निर्दोष थ्या। जां ऐक्या परमेश्वरैरा पुत्र आ।”

तां यूसुफ जां नीकुदेमुस नाँईयेरै दो यहूदी अगुवे यै। सैक्यै विश्वास करींथ्यै कि यीशु ऐ मसीह थ्या। तैन्हैं पिलातुसा किना यीशुरा शरीर मग्गा। फिरी तैन्हैं तेसैरा शरीर कपड़ै मझ लपैटा। तां तैन्हैं सैक्या एकि शप्पड़ा मझ कौरोरी कब्रि मझ लै नियां जां तैस अंतर रखि दित्ता। तां तैन्हैं तैस कब्रिरू दुवार बंद कांनेरै तेईनी अक बड़ा बड्डा घौड़ खिसकाय छडा।