41. परमेश्वर यीशु मौरा मझां जींतैता- कहानी

सैनिका केरै जरियै यीशु क्रूसा पनि चाढ़ना किना बाद, यहूदी अगुवो पिलातुसा सिंउ बोलु, “तेनि झूठै, यीशु बोलोरू थियु कि तैस त्रा धियाड़ी बाद मौरा मझां जींती गांहणु। कौसक्यै ऐठणीरी सही तरीकै सिंउ निगरानी कांनी पूंणी किहीं कियै तेसैरै चेलै तेसैरी लास चौरी करी लै ना गहिया। अगर तैन्हैं ऐहीं कियु ता तैन्हां बोलणु सैक्या ता मौरा मझां जींती आ गियौरा।”

पिलातुसै बोलु, “कुछ सैनिका लै गहा, जां बड़ी हौश हवासी मझ जिहीं तुहां सही लगतु कब्रिरिरी निगरानी करा।“ ऐठणीरै तेईनी तैन्हैं तैस कब्रिरू दुवारा पनि जै घौड़ रखोरा थ्या तेस पनि अक मौहर ला छडी। तैन्हैं ऐ पक्का कांनेरै तेईनी तैठि सैनिक बेठाय दित्तै कि कोई बि तैसेरी लास चौरी ना सकिया।

यीशुरै मरना किना बाद सब्तेरी मतलब आरामेरी धियाड़ी थी। कोई बि आरामेरी धियाड़ी कंम ना करि सकींथ्या, ऐठणीरै तेईनी यीशुरा कोई बि मित्र कब्रि पनि ना या। पण आरामेरी धियाड़ी बाद दुईं धियाड़ी, भियगा पिचारी सिंउ, कुछ जनेनी यीशुरी कब्री पनि गांहणानि तियार भुई। सै तेसैरै शरीरा पनि होरै बि मसालै लांणा चांहती थी।

तैन्हां जनेनियां पुजणा किना पेहिलै, कब्री पनि अक बड़ा बड्डा भुन्जल भुवा। स्वर्गा किना अक स्वर्गदूत या जां तेनि सैक्या घौड़ जै कब्रिरू दुवारा पनि थ्या जेनि ला कब्र ढकौरी थी सैक्या हठाय दित्ता जां तैस पनि बेशि गिया। ऐक्या स्वर्गदूत चमकीलु प्रगड़ु सैयि थ्या। कब्रि पनि जै सैनिक बेठौरै थ्यै तैन्है सैक्या लधा। सै यौउतै डरि गियै कि मौरा मैहणुवां सैयि जमीनि पनि पैयि गियै।

जेख्णी सै जनेनी कब्रि पनि पुज्जी ता तेनि स्वर्गदूतै तैन्हां सिंउ बोलु, “मेईं डरा। यीशु ऐठि ना। सैक्या मौरा मझां जींति गियौरा, जिहीं तेनि बोलोरू थियु कि मूं जींति गांहणु! कब्रि अंतर तैस तौपा जां तका।” तैन्हैं जनेनियें कब्रि नीड़ जां जेठि यीशुरा शरीर रखौरा थ्या तैठि तौपा जां तकाउ कि तेसैरा शरीर तैठि ना थ्या!

तां तेनि स्वर्गदूतै तैन्हां जनेनियां सिंउ बोलु, “गहि करी तेसैरै चेलानि बोला, ‘यीशु मौरा मझां जींति गियौरा जां तैस तुहां आघै-आघै गलील प्रदेशानि गांहणु।’”

सै जनेनी हरशुन भुई जां बड़ी भारी खुश भुई। सै चैलानि ऐक्या शुभ संदेश शुणांणेरै तेईनी दाउड़ी।

जेख्णी सै जनेनी ऐक्या शुभ संदेश शुणांणेरै तेईनी हालै तेईनी बत्तै मझ थी, तां यीशु तैन्हांनि प्रकट भुवा। सैकेई तेसैरै पैयिड़ा पनि पैयि गेई। तां यीशु बोलु, “मेईं डरा। गहि करी मिंडा चैलानि गलील प्रदेशानि गांहणानि बोला। तैन्हां आंउ तैठि तकांणा।”"