42. यीशु स्वर्गानि वापस चलि गांहथा- कहानी

जैस धियाड़ी परमेश्वरै यीशु मौरा मझां जींता केईथ्या, तेसैरै दो चेलै तैठि नीड़ होरै गाँनि गांहथै थ्यै। गांहथै-गांहथै सैक्यै यीशु सेईतै जै भौरू थियु तेठणीरै बारै मझ गल्ल बात थियै कातै, तैन्हां आशा थी कि सैक्या मसीह थ्या, पण तां बि सैक्या मारी छडथिया। अबै सै जनेनी बोलति अत्ती कि सैक्या फिरी जींती गियौरा। तैन्हां ना थ्या पता कि कौस गल्लै पनि विश्वास कांना।

यीशु तैन्हां किनी आईछी करि तैन्हां सेईतै चलणां लगि पेया, पण तैन्हैं सैक्या पछियांणा ना, तेनि तैन्हां किना पुच्छु कि तुवै कौस बारै मझ गल-बात कातै थ्यै। तैन्हैं तैस सिंउ यीशुरै बारै मझ जै घटना भौरी थी तैठणीरै बारै मझ सभ किछ शुणांउ। तैन्हैं सौचु कि सै कौसक्यै परदेशी सिंउ गल्ल कातै थ्यै जैस कोई पता ना थ्या कि यरूशलेम मझ कितु भौरू थियु।

तां यीशु तैन्हांनि समझाउ कि परमेश्वरैरा वचन मसीहरै बारै मझ कितु बौलता। बड़ै टैंम पेहिलै, भविष्यवक्तै बोलौरू थियु कि बुरै मैहणुवां मसीह दुखी कांना जां मारी छडणा। पण भविष्यवक्तै ऐ बि बोलौरू थियु कि सैक्या त्रीं धियाड़ि जींती गांहणा।

जेख्णी सैक्यै तैस नगरा मझ पुज्जै जेठि सैक्यै दो जणै रुकणा चांहथै थियै, तियो तेईनी लगभग संन्हैरा भौ थ्या गियौरा। तैन्हैं यीशुनि बोलु कि तु असुवां सिंउ बेशि गा, फिरी यीशु तैन्हां सेईतै एकि घरा मझ गिया। सन्हीं सैक्यै रोट्टी खांणा बेशि गियै। यीशु अक रोट्टि लैई जां तैस रोट्टिरै तेईनी परमेश्वरैरा धन्यवाद केया जां फिरी सेकैई भन्नी। तां अजाग्गै तैन्हां पता लगि गिया कि सैक्या यीशु थ्या। पण तेसै टैंमा सै तैन्हेरी नजरी किना गायब भौ गिया।

तैन्हैं दुवें जणै योकिया सिंउ बोलु, “सैक्या यीशु थ्या! ऐठणीरै तेईनी तेख्णी तेनि असुनी परमेश्वरैरा वचन समझाईथ्या ता असै बड़ै खुश थियै!” तां इकदम सैक्यै निकोहि करी यरूशलेमनी चलि गियै। जेख्णी सैक्यै यरूशलेम पुज्जै ता तैन्हैं चैलानि शुणांउ, कि “यीशु जींता आ! असुवें सै लधा!”

जेख्णी चेलै योकिया मझ गल-बात थ्यै कातै तां यीशु इकदम तैस कमरै मझ तैन्हां किनी प्रकट भुवा। तेनि बोलु, “तुहांनि शांति मेईया!” चेलै सौचु कि सैक्या कोई भूत आ, पण यीशु बोलु, “तुवै केईनी अत्तै डरींतै? तुवै ऐहीं किना सौचतै कि ऐ सच मझ आंउ आ, यीशु आ? मिंडै हत्थ जां पैयिड़ तका। भूता किनि ऐतिया शरीर ना भूंता जेतिया मूं किनि आ।” ऐ लुहांनेरै तेईनी कि सैक्या कोई भूत ना, तेनि खांणुनि किछ मग्गु। तैन्हैं तैसनि मछलिरा अक टुकड़ा दित्ता, जां तेनि सैक्या खा लेया।

यीशु बोलु, “मिंडै बारै मझ परमेश्वरैरा वचन जै किछ बि बौलता सै पूरू भूंणु। मीं तुहांनि शुणां थियु दितौरू कि ऐ पूरू भूंणु जरूरी आ।” तां यीशु तैन्हांनि परमेश्वरारा वचन बड़ै अच्छै तरीकै सिंउ समझा। तेनि बोलु, “बड़ै पेहिलै भविष्यवक्तै लिखौरू थियु कि मूं, यानि मसीह दुख सहन कांना पूंणा, मरनु पूंणु जां त्रीं धियाड़ी मौरा मझां जींति गांहणु पूंणु।”

“तैन्हैं भविष्यवक्तै ऐ बि लिखौरू थियु कि मिंडै चैला परमेश्वरेरै वचनेरी घोषणा कांनी। तैन्हां हर मैहणुनि पश्चाताप कांनानि बोलणु। अगर सै ऐहीं कातै ता परमेश्वरा तैन्हेरै पाप माफ कांनै। मिंडा चैला ऐस खुशखबरिरा प्रचार यरूशलेम किना शुरू कांना। तां तैन्हां संसारा मझ सारी जगाय सारी जातिया मझ गांहणु। तुवै मैहणु मिंडि हरेक गल्लेरै जां कंम्मेरै गवाह अत्तै जै मीं बोलु जां कियौरू थियु, जां तैस सारूरै गवाह अत्तै जै मूं सिंउ भूं।”

होरिया चाहिया धियाड़िया केरै दौरान, यीशु अपड़ै चैलानि केही बार प्रकट भुवा। अक बार ता सैक्या एकि ऐ टैंमा पनि पंजा शाउवा किना जादा मैहणुवां पनि प्रकट भुवा! तेनि अपड़ै चैला पनि केहियै तरीकै ला साबित कियु कि सै जींता थ्या, जां तेनि तैन्हांनि परमेश्वरेरै राज्यरै बारै मझ शिक्षा दित्ती।

यीशु अपड़ै चैला सिंउ बोलु, “परमेश्वरै मूंनि स्वर्गा जां धरती पनि हर एकि पनि शासन कांनेरा अधिकार दितौरा। ऐठणीरै तेईनी अबै आंउ तुहां सिंउ बौलता: गहि करि सारी जातिया केरै मैहणुवां चैला बंणा। ऐतियु कांनेरै तेईनी, तुहां तैन्हांनि पिता, पुत्र, जां पवित्र आत्मायरै नाँ किना बपतिस्मा दींणा। जै किछ बि मीं तुहांनि आज्ञा दितौरी आ सैकेई सारी आज्ञाय मंनणी बि तुहां तैन्हांनि शिख्रांणी। याद रखा, मूं हमेशा तुहां सेईतै रीहणुं।”

यीशुरू मरनु जां फिरी मौरा मझां दुबारै जींतियूंणा किना बाद, तेनि अपड़ा चैला सिंउ बोलु, “ज्यो तेईनी कि मिंडा पिता तुहांनि सामर्थ ना दींता तियो तेईनी तुवै यरूशलेम मझ ऐ बेशा। तैस तुहां पनि पवित्र आत्मा भेईजणा जां तुहांनि तैस सामर्थ दींणी।” तां यीशु स्वर्गानि चलि गिया, जां एकि बदऐ सैक्या तैन्हेरी नजरी किना छपा लिया। स्वर्गा मझ यीशु सारिया चीजा पनि शासन कांनानि परमेश्वरेरै देहिंणै पासै बेशि गिया।