43. कलीसियैरी शुरूआत भूंती- कहानी

यीशुरू स्वर्गा गांहणा किना बाद, चेलै यरुशलेम शहरा मझ रूकि गियै जिहीं यीशु तैन्हांनी कांनेरा हुक्म दितौरा थ्या। तेठणीरै विश्वासी मैहणु लगातार सेईतै प्रार्थना कांनानि किट्टै भुईयां करींथ्यै।

हर साल, फसह नामक त्यौव्हारेरै 50 धियाड़ी बाद, यहूदी मैहणु पिन्तेकुस्त नाँईयेरी अक खास धियाड़ी मनाईंथ्यै। पिन्तेकुस्त सैक्या टैंम थ्या जेख्णी यहूदी मैहणु किंणक बढणेरै टैंमा मनाईंथ्यै। सारै संसारा किना यहूदी मैहणु पिंतेकुस्तेरी धियाड़ि सेईतै मनाणेरै तेईनी यरूशलेम शहरा मझ यौउरै थ्यै। इस साला, पिंतेकुस्त मनाणैरा टैंम यीशुरू स्वर्गा गांहणा किना लगभग एकि हफ्तै बाद येईथ्या।

जैस टैंमा सारै विश्वासी मैहणु सेईतै किट्ठै थ्यै, तां जैस घरा मझ सैक्यै थ्यै अचानक सै तैज हवाय ला भरी गियु। तां आगिरै लवाट्टै जेतियु किछ लाधी यू जां किछ विश्वासिया केरै शिरा पनि प्रकट भौ गियु। सैक्यै सारै पवित्र आत्माय ला भरी गियै जां अलग-अलग भाषाईया मझ परमेश्वरैरी स्तुति की। ऐन्हां भाषाईया बौलणेरै तेईनी सैक्यै पवित्र आत्माय तैयार केईथ्यै।

जेख्णी यरूशलेम शहरा मझ रींहणारै मैहणुवें ऐक्या हूला शुणा, ता तैन्हैरी अक भीड़ ऐ तकांणेरै तेईनी सेईतै किट्ठी यैई कि कितु थियु भूंतु। तैन्हैं विश्वासी मैहणु परमेश्वरेरै जरियै जै बड़ै-बड़ै कंम भुवै तैन्हैरी घोषणा कातै शुणै। सैक्यै हैरान थ्यै केईनी कि सैक्यै तैन्हां कंमा केरी घोषणा अपड़ी ऐ भाषाय मझ शुणतै थ्यै।

ऐन्हां मझ किछ मैहणुवें बोलु कि सैक्यै चेलै नशै मझ थ्यै। पण पतरस खड़ा भुवा जां तैन्हां सिंउ बोलु, “मिंडि गल शुणा! ऐक्यै मैहणु नशै मझ नत्तै! ऐठणिरी बजाए, जै तुवै तकांतै अत्तै ऐ सेहै आ जै योएल भविश्यवक्तै बोलौरू थियु कि भूंणु: परमेश्वरै बोलु, ‘अंत मझ मूं अपड़ा आत्मा तुहां पनि उधैंना।‘”

“हे इस्राएली मड़दो, यीशु अक ऐतिया मैहणु थ्या जेनि ऐ लुहानेरै तेइनी कि सैक्या केणु थ्या बड़ै जादै अनोखै कंम केईथ्यै। तेनि परमेश्वरेरी सामर्थी ला बड़ै जादै अदभुत कंम केईथ्यै। तुवै ऐ जांणतै, केईनी कि तुहैं ऐक्यै कंम लधौरै अतै। पण तुहैं सैक्या क्रूसा पनि चाढ़ी दित्ता!”

यीशु मरि गिया पण परमेश्वरै सैक्या मौरा मझां जींता करि दित्ता। ऐनि सैकेई गल्ल पूरी करि दित्ती जै एकि भविष्यवक्तै लिखौरू थियु: ‘तु अपड़ै पवित्र जना शड़ना ना दैला।’ असै गवाह अत्तै कि परमेश्वरै यीशु दुबारै फिरी जींतैरी दित्ता।।

“पिता परमेश्वरै अबै यीशु अपड़ै देहिंणै पासै बेशाय करि तैसनि आदर दित्ता। जां यीशु असेड़ै तेईनी पवित्र आत्मा भेईजा जिहीं तेनि वायदा कियौरा थ्या कि सै भेईजैला। पवित्र आत्मा ऐ तैन्हां कंमा भूंणा दींता जैन्हां तुवै तकांतै अत्तै जां शुणतै अत्तै।”

“तुहैं सैक्या मैहणु, यीशु क्रूसा पनि चाढ़ी दित्ता। पण सच्च मझ जांणी लिया कि परमेश्वरै यीशु सारिया चीजा पनि प्रभु जां मसीह दोईयो ठैहराय दितौरा!”

पतरसेरी गल्लै शुणने बाऐ मैहणु तैसेरी बोलोरिया गल्लै ला अंतर तेईनी पूरै हिलि गेईथ्यै। ऐठणीरै तेईनी तैन्हैं पतरसा जां चैला किना पुच्छु, “हे भाईयो, असुवां कितु कांनु चेहिंथु?”

पतरसै तैन्हांनि जवाब दित्ता, “तुहां मझियां हर मैहणु अपड़ै पापा किना पश्चाताप करिया, जां यीशु मसीहरै नाँ किना बपतिस्मा लिया। तां तैस तुहांनि वरदाना मझ पवित्र आत्मा दींणा।”

पतरसै जै बोलु तैस पनि लगभग 3000 मैहणुवें विश्वास केया जां यीशुरै चेलै बंणि गियै। तैन्हैं बपतिस्मा लेया जां यरूशलेमेरी कलीसियेरै हिस्सा बंणि गियै।

जेख्णी खास चेलै तैन्हांनि शिक्षाय दित्ती ता विश्वासियै लगातार शुणि। सैक्यै हर बारी मिलींथ्यै जां साउगा रोट्टी खाईंथ्यै, जां तैन्हैं हर बारी योकियानि प्रार्थना की। तैन्हैं मिलिकरी परमेश्ववरैरी स्तुति की जां जै किछ बि तैन्हां किनि थियु सै सभ किछ तैन्हैं योकिया मझ बंडि चुंडि कियु। नगरैरा हर मैहणु तैन्हेरै तेईनी अच्छु ऐ बोलींथ्यै। हर रौज, जादै किना जादै मैहणु विश्वासी बंणतै गियै।