44. पतरस जां यूहन्ना एकि भिखारी ठीक कातै- कहानी

अक धियाड़ी, पतरस जां यूहन्ना मंदिरा गियै। तैन्हैं अक अपंग मैहणु भीख मगता पाटका पनि बेठौरा लधा।

पतरसै तैस लट्टै मैहणु धेरै तकाउ जां बोलु, “मूं किनि ताउनी दींणैनि पेईंसै ता नत्तै। पण जै मूं किनि आ आंउ तैस तुहांनि दींता। यीशुरै नाँईयां किना, उठ जां चल-फिर!”

तां इकदम, परमेश्वरै सैक्या लट्टा मैहणु ठीक करि दित्ता। तेनि ओरि-परी चलणु जां छाऐ दींणी शुरू करि दित्ती, जां परमेश्वरैरी स्तुति कांना लगि पेया। मंदिरेरै आंगणा मझ बेठौरै मैहणु हरशुन भौ गेईथ्यै।

तेख्णी ऐ मैहणुवां केरी अक भीड़ तैस मैहणु तकांणा यैई जै ठीक भौ थ्या गियौरा। पतरसै तैन्हां सिंउ बोलु, “ऐक्या मैहणु ठीक आ, पण ऐस गल्लै पनि हैरान मेईं भुवा। असुवें ऐ अपड़ी शक्ति ला ठीक ना केया, जां ऐठणीरै तेईनी ना कि असै परमेश्वरैरा आदर कातै। बल्कि, सैक्या यीशु आ जेनि अपड़ि शक्ति ला ठीक केया, केईनी कि असै यीशु पनि भरौसा कातै।”

“सै तुवै ऐ अत्तै जैन्हैं तैस रोमी राज्यपालानि यीशु मारी छडणानि बोलौरू थियु। तुहैं सै मारी छडा जै जीवन दींता। पण परमेश्वरै सैक्या मौरा मझां जींता केया। तुहैं ना समझु कि तुवै कितु थ्यै कातै, पण जेख्णी तुवै तैन्हां कंमा कातै थ्यै, ता जै भविष्यवक्तै बोलौरू थियु सै पूरू भू। तैन्हैं बोलौरू थियु कि मसीह दुख उठांणा जां मरि गांहणा। परमेश्वरै ऐ सभ किछ ऐहिंयैं भूंणा दित्तु। ऐठणीरै तेईनी, पश्चाताप करा जां परमेश्वरा धेरै फिरा, ताकि सै तुवाड़ै पाप धौ करि साफ करि दिया।”

जेख्णी मंदिरेरै अगुवो पतरस जां यूहन्नेरी अवाज शुणी, ता सैक्यै बड़ै डरि गियै। ऐठणीरै तेईनी तैन्हैं सैक्यै पकड़ि लियै जां जैल्ही मझ सुटि दित्तै। पण जै पतरसै बोलौरू थियु तैस पनि बड़ै सारै मैहणुवें विश्वास केया। यीशु पनि विश्वास कांनारै मैहणुवां केरी गिणती लगभग 5000 भौ गैई।

दुईं धियाड़ी, सैक्यै यहूदी अगुवे पतरसा जां यूहन्नै महायाजका जां होरा धार्मिक अगुवो केरै सामणै लैकरी यै। सैक्यै तैस मैहणु बि लै करि यै जै अपंग थ्या। तैन्हैं पतरसा जां यूहन्नै किना पुच्छु, “कि कुनि अधिकारै ला तुहैं सैक्या अपंग मैहणु ठीक केया?”

पतरसै जवाब दित्ता, “ऐक्या मैहणु जै तुवाड़ै सामणै खड़ा आ सैक्या यीशु मसीहरी सामर्थी ला ठीक कियौरा आ। तुहैं यीशु क्रूसा पनि चाढ़ी दित्ता, पण परमेश्वरै सैक्या फिरी जींता करि दित्ता! तुहैं सैक्या अस्वीकार करि दित्ता, पण यीशुरी सामर्थिरै अलावा उद्धार पांणैरा कोई होरा उपाय ना!”

सैक्यै अगुवे हैरान थ्यै कि पतरसै जां यूहन्नै बड़ि हिम्मती सिंउ गल्ल बात केईथी। तैन्हैं हैरू कि सैक्यै साधारण मड़द थ्यै जै कि अनपढ़ थ्यै। पण फिरी बि तैन्हां मैहणुवां याद यैई कि ऐक्यै मड़द यीशु साउगा थ्यै। ऐठणीरै तेईनी तेन्हैं तैन्हां सिंउ बोलु, “असुवां तुहांनि बड़ी जादी सजा दींणी, अगर तुवै इस संसारेरै मैहणुवां सेईतै ऐस मैहणुरै बारै मझ यानि कि यीशुरै बारै मझ कोई होरा संदेश दींतै।”ऐतेई बड़ी सारी गल्लै भूंणा किना बाद, तैन्हैं पतरस जां यूहन्ना गांहणा दित्तै।