45. स्तिफनुस जां फिलिप्पुसैरी- कहानी

पेहिलै मसीही अगुवो मझ स्तिफनुस नाँईयेरा अक मड़द थ्या। सारै मैहणु तेसैरा आदर करींथ्यै। पवित्र आत्माय तैसनि बड़ि सामर्थ जां बुद्धी प्रदान केईथी। स्तिफनुसै बड़ै सारै चमत्कार कियौरै थ्यै। जेख्णी तेनि यीशु पनि भरौसा कांनेरै बारै मझ तैन्हांनि शिक्षा दित्ती ता बड़ै सारै मैहणुवें तैस पनि विश्वास केया।

अक धियाड़ी स्तिफनुस यीशुरै बारै मझ शिक्षा दींता थ्या, जां किछ ऐतियै यहूदी यै जैन्हैं यीशु पनि विश्वास ना थ्या कियौरा, तैन्हैं तैस सिंउ विवाद कांना शुरू करि दित्ता। सैक्यै बड़ै गुस्सै भौ गियै, ऐठणीरै तेईनी सैक्यै धार्मिक अगुवो किनि गियै जां तेसैरै बारै मझ झूठ बोलु। तैन्हैं बोलु, “असुवें स्तिफनुस मूसेरै जां परमेश्वरेरै बारै मझ गल्लै काता शुंणोरा!” ऐठणीरै तेईनी धार्मिक अगुवोऐ स्तिफनुस गिरफ्तार करि लिया जां सै तैस महांयाजका जां यहूदिया केरै होरै अगुवो केरै सामणै लैई यै जां होरै बि झूठै गवाहि यै जां तैन्हैं बि स्तिफनुसेरै बारै मझ झूठ बोलु।

महायाजकै स्तिफनुसा किना पुच्छु, “क्या ऐ मैहणु तिंडै बारै मझ सच्च अत्तै बौलतै?” स्तिफनुसै महायाजकानि जवाब दींणेरै तेईनी बड़ि भारी गल्लै बोलणी शुरू करि दित्ती। तेनि बोलु कि अब्राहमेरै टैंमा किना लैकरि यीशुरै टैंमा तेईनी परमेश्वरै इस्राएलेरै मैहणुवां केरै तेईनी बड़ै भारी अनोखै कंम कियौरै अत्तै। पण मैहणुवें हमेशा परमेश्वरेरी आज्ञायरा पालन ना केया। स्तिफनुसै बोलु, “तुवै मैहणु परमेश्वरेरै खिलाफ हठीलै जां उपद्रव कांनारै अत्तै। तुहैं हमेशा पवित्र आत्मा अस्वीकार केया, जिहीं कि असेड़ै पूर्वजै हमेशा पवित्र आत्मा अस्वीकार केईथ्या जां हमेशा तेसैरै भविष्यवक्तै मारी छडथियै। पण जै तैन्हैं कियौरू थियु तेसेरी तुलनाय मझ तुहैं होरू बि बुरू कियौरू आ! तुहैं मसीह मारी छडा!”

जेख्णी तैन्हैं धार्मिक अगुवो ऐ शुणु, ता सैक्यै यौउतै गुस्सै भुवै कि तैन्हैं अपड़ै कन्न बंद करि दित्तै जां जौरै-जौरै चिन्डै दींणा लगै। तैन्हैं स्तिफनुस ध्रीड़ी करि नगरा किना भेईर लै नियां जां तैस खत्म कांनेरै तेईनी तैस पनि घौड़तिया बज्जी।

जेख्णी स्तिफनुस मरता थ्या, तेनि जौरै हक दित्ती, “हे यीशु नासरी, मिंडि आत्मा ग्रहण कर!” तां सैक्या अपड़ै जेणुवां केरै भारै पैयि गिया जां फिरी दुबारै बोलु, “हे प्रभु ऐक्या पाप तैन्हां पनि मेईं लांता।” तां फिरी सै मरि गिया।

तैस धियाड़ी, यरूशलेम शहरा मझ रींहणारै बड़ै मैहणुवें यीशुरै चैलै सतांणै शुरू करि दित्तै, ऐठणीरै तेईनी विश्वासी मैहणु होरिया जगाईयानि नशि गियै। पण ऐठणीरै बावजूद बि, जेठि-कोठि बि सैक्यै गियै तैन्हैं यीशुरै बारै मझ प्रचार केया।

फिलिप्पुस नाँईयेरा अक मैहणु यीशु मसीहरा विश्वासी थ्या। जिहीं होरनियें बड़ै सारै विश्वासियै केईथियु तिहींये सैक्या बि यरूशलेम शहरा किना नशि गिया। सैक्या सामरियेरै लाकैनि चलि गिया।तैठि तेनि मैहणुवां मझ यीशुरै बारै मझ प्रचार केया। बड़ै सारै मैहणुवें यीशु पनि विश्वास केया जां उद्धार पा लेया। अक धियाड़ि, फिलिप्पुसा किनि परमेश्वरेरी तरफों अक स्वर्गदूत या जां तेनि तैसनि बणां मझ गांहणेरै तेईनी जां एकि सिड़कै पनि चलणेरै तेईनी बोलु। फिलिप्पुस तेदि चलि गिया। जेख्णी सैक्या तैस सिड़कै पनि चलौरा थ्या, ता तेनि अक मैहणु रत्था पनि गांहथा लधा। ऐक्या मैहणु कूश देशैरा अक बड़ा खास अधिकारी थ्या। पवित्र आत्माय फिलिप्पुसा सिंउ बोलु कि गहि करि तैस मैहणु सेईतै-सेईतै चल।

ऐठणीरै तेईनी फलिप्पुस तैस रत्था किनि गिया। तेनि शुणु कि सैक्या कूश देशैरा मैहणु परमेश्वरैरा वचन आ पढ़ता। जै यशायाह भविष्यवक्तै अपड़ि किताबी मझ परमेश्वरैरा वचन लिखौरा थ्या सैक्या तैस पढ़ता थ्या। सैक्या पढ़ता थ्या, “सैक्यै तैस बढियोरी भ्रेडै सैयि लै गियै, जां जिहीं अक मेम्‍ना (मतलब भ्रडैरा बच्चा) शांत भूंता, तिहींये तेनि बि अक शब्द ना बोला। तैन्हैं तैस सिंउ बड़ा ऐयिड़ा बर्ताव केया, जां तेसैरा बड़ा अनादर केया। तैन्हैं तेसैरै प्रांण लै लियै।

फिलिप्पुसै तैस कूशी मैहणु किना पुच्छु, “जै तु पढ़ता क्या तु तैस समझता बि आ?” तेनि कूशी मैहणु जवाब दित्ता, “नहीं। जियो तेईनी केणुक्या मूनि ना समझाईया, तियो तेईनी आंउ ऐस ना समझि सकता। छंदै मूं किनि आईछि करि बेश। फिरि तेनि बोलु, यशायाह ऐ अपड़ै बारै मझ थ्या लिखता कि कौसक्यै होरेरै बारै मझ?”

फिलिप्पुस रत्था पनि चढ़ि करि बेशि गिया। तां तेनि तैस कूश देशैरै मैहणुनि सै शुणांउ जै यशायाह भविष्यक्तै यीशुरै बारै मझ थियु लिखौरू। फिलिप्पुसै परमेश्वरेरै वचना मझां होरनियां वचना केरी बि तेस सिंउ चर्चा की। ऐनि हिसाबै, फिलिप्पुसै तैस कूशी मैहणुनी यीशु मसीहरै बारै मझ शुभ संदेश शुणां।

फिलिप्पुस जां सैक्या कूशी मैहणु चलतै-चलतै पांणी किनि यै। फिरि तेनि कूशी मैहणु बोलु, “तका! ऐठि पांणी आ! क्या अबै आंउ बपतिस्मा लै सकता?” जां तेनि रत्थ चलांणारै सिंउ रत्थ रौकणेरै तेईनी बोलु।

फिरी सैक्यै पांणी मझ चलि गियै, जां फिलिप्पुसै तैस कूशी मैहणुनी बपतिस्मा दित्ता। जेख्णी सैक्यै पांणी मझां भेईर यै, ता पवित्र आत्माय अचानक फलिप्पुस चुक्की करि होरि जगाय पुजा छडा। तैठि फिलिप्पुसै मैहणुवां सिंउ यीशुरै बारै मझ बौलणु जारी रखु।

सैक्या कूशी मैहणु यात्रा काता अपड़ै घरैनि चलि गिया। सैक्या बड़ा खुश थ्या कि सै अबै यीशु मसीह जांणीथ्या।