46. पौलुस मसीही विश्वासी बंणि गांहथा- कहानी

शाऊल नाँईयेरा अक मैहणु थ्या जेनि यीशु मसीह पनि विश्वास ना केईथ्या। जेख्णी सै जुवान थ्या, तेख्णी तेनि स्तिफनुसा मांनारै मैहणुवां केरै लिकड़ा केरी देखभाल केईथी। बाद मझ, तेनि विश्वासी मैहणु सताईथ्यै। तेनि यरूशलेम शहरा मझ घर-घर गहि करी मड़द जाँ जनानी दोईयो पकड़ि करी जेलखाने मझ सुटि दित्थियै। तां महायाजकै शाऊलानि दमिश्क नगरा मझ गांहणैरी अनुमति दित्ती। तेनि तेठणीरै मसीहियानि गिरफ्तार कांनानि जां तैन्हां वापिस यरूशलेम अणनेरै तेईनी शाऊलानि बोलु।

फिरी शाऊलै दमिश्क गांहणेरी यात्रा शुरू की। तैस नगरा पुजणा किना पेहिले, तेसैरै चोऊवो पासै अक तैज प्रगड़ु चमकु, जां सै जमीनी पनि पैई गिया। शाऊलै केणुक्या बौलता शुणा, “हे शाऊल! हे शाऊल! तु मूं केईनी आ सतांता?” शाऊलै पुच्छु, “हे प्रभु, तु केणु आ?” यीशु जवाब दित्ता, “आंउ यीशु आ। जैस तु सतांता!”

जेख्णी शाऊल उठा ता तैस किछ बि ना थियु लेहिंथु। तेसैरै मित्र तैस दमिश्क मझ लै करि गियौरै थ्यै। शाऊलै त्रा धियाड़ी ना किछ खाउ ना पित्तु।

दमिश्क मझ हनन्याह नाँईयेरा अक चैला थ्या। परमेश्वरै तैस सिंउ बोलु, “तैस घरा मझ गा जेठि शाऊल रुकौरा। अपड़ा हत्थ तैस पनि रख ताकि तेसैरी नजर खुलि गहिया जां सै फिरी हैरी सकिया।” पण हनन्याहै बोलु, “हे प्रभु, मीं शुणोरू आ कि ऐनि मैहणु विश्वासी किहीं सताउरै अत्तै।” परमेश्वरै तैसनि जवाब दित्ता, “गा! मीं सैक्या यहूदिया मझ जां होरनियां जातिया केरै मैहणुवां मझ मिंडै नाँईयेरी घोषणा कांनेरै तेईनी चुणि लियौरा। तैस मिंडै नाँईयेरै तेईनी बड़ा कष्ट सैहन कांना।”

फिरी हनन्याह शाऊला किनि गिया, अपड़ा हत्थ तैस पनि रखा, जां बोलु, “यीशु मसीहै, जै इदि ऐईंतै टैंमा ताउनि बत्तै मझ प्रकट भुईथ्या, तेनि आंउ ताउ की भेईजौरा ताकि तु फिरी हैरि सकिया, जां पवित्र आत्माय ला तु पूरी रीति सिंउ भरि गहिया।” तेख्णी ऐ शाऊलैरी नजर दुबारै वापिस चलि यैई जां सै फिरी हैना लगि पेया, जां हनन्याह तैसनि बपतिस्मा दित्ता। तां शाऊलै रोट्टी खाई जां फिरी हट्टा-कट्टा भौ गिया।

तेख्णी ऐ किना शाऊलै दमिश्क मझ रींहणारै यहूदिया मझ प्रचार कांना शुरू करि दित्ता। तेनि बोलु, “यीशु ऐ परमेश्वरैरा पुत्र आ!” यहूदी मैहणु हैरान थ्यै, केईनी कि शाऊल ता हमेशा विश्वासी मैहणुवां मानेरी कोशिश करींथ्या, पण अबै तेनि यीशु मसीह पनि विश्वास केईथ्या। शाऊलै यहूदिया सेईतै वाद-विवाद केया। तेनि लुहाउ कि यीशु ऐ मसीह थ्या।

बड़ै धियाड़ी बाद, यहूदियै शाऊला मांनेरी सकीम बंणाय। तैन्हैं तैस मांनेरै तेईनी फाटका पनि मैहणु भेईजै, कि तेसैरी निगरानि करिया पण शाऊलै तैन्हेरी सकीमिरै बारै मझ शुणि लियु, जां तेसैरै मित्रै तैठां बचांणेरै तेईनी तेसैरी बड़ि मजत की। अक रात तैन्हैं सैक्या टोकरी मझ रखा जां नगरेरी चार दिवारी बतै सैक्या हैट उतारी दित्ता। दमिशक किना बचि करि निकूंहणा किना बाद शाऊलै यीशुरै बारै मझ प्रचार कांना जारी रखा।

शाऊल खास चैला सिंउ मिलणेरै तेईनी यरूशलेम मझ गिया, पण सैक्यै तैस हैरी डरींथ्यै। तां बरनबास नाँईयैरा अक विश्वासी शाऊला खास चैला किनि लै गिया। तेनि तैन्हांनि शुणांउ कि शाऊलै किहीं हिम्मति सिंउ दमिश्क मझ प्रचार केईथ्या। तैठां किना बाद, खास चैलै शाऊल साउगैरी लेया।

कुछ विश्वासी जै यरूशलेमेरै सतावेरी वजाहि सिंउ नशि थ्यै गियौरै ऐक्यै दूर अंताकिया नगरा मझ चलि गेईथ्यै जां यीशुरै बारै मझ प्रचार करींथ्यै। अंताकिया मझ रींहणार मैहणु ज्यादातर यहूदी ना थ्यै, पण पेहिली बारी, तैन्हां मझां बड़ै सारै मैहणु विश्वासी बंणि गेईथ्यै। बरनवास जां शाऊल ऐन्हां विश्वासियानि यीशुरै बारै मझ होरू जादु शिख्रांणेरै तेईनी तैठि गियै जां तैन्हैरा विश्वास होर पक्का केया। यीशु पनि विश्वास कांनारैनि पेहिली बार अंताकिया मझ “मसीही“ बोलु।

अक धियाड़ि, अंताकियेरै मसीही मैहणु उपवास करि करी प्रार्थना थ्यै कातै। पवित्र आत्माय तैन्हां सिंउ बोलु, “मिंडै तेईनी बरनवासा जां शाऊला सैक्या कम कांनेरै तेईनी अलग करि देया जैस कांनेरै तेईनी मीं सैक्यै शदाउरै अत्तै।” ऐठणीरै तेईनी अंताकियेरी विश्वासी मैहणुवें बरनवास जां शाऊलेरै तेईनी प्रार्थना की जां तैन्हां पनि अपड़ै हत्थ रखै। तां तैन्हैं सैक्यै होरिया बड़िया जगाईयानि यीशु बारै मझ शुभ संदेशेरा प्रचार कांनेरै तेईनी भेईजी दित्तै। बरनवासै जां शाऊलै अलग-अलग जातिया केरै मैहणुवंनी शिक्षा दित्ती जां बड़ै सारै मैहणुवें यीशु मसीह पनि विश्वास केया।