47. फिलिप्पी शहरा मझ पौलुस जां सीलास- कहानी

जेख्णी शाऊलै पूरै रोमी साम्राज्य मझ यात्राय की ता तेनि अपड़ु रोमी नाँ “पौलुस” रखि दित्तु। अक धियाड़ि, पौलुस जाँ तेसैरा मित्र सीलास फिलिप्पी शहरा मझ यीशुरै बारै मझ शुभ संदेश शुणांणेरै तेईनी गियै। सैक्यै नगरा भेईर नदिरै पासै एकि जगाईनि गियै जेठि मैहणु प्रार्थना कांनेरै तेईनी किट्टै थ्यै। तैठि सैक्यै लूदिया नाँईयेरी एकि जनानी सिंउ मिलै जै अक व्यापारी थी। सेकैयि परमेश्वरा सिंउ प्रेम करींथी जां तेसैरी आराधना करींथी।

परमेश्वरै लूदिया यीशुरे बारै मझ संदेशा पनि विश्वास कांनेरै तेईनी तैयार की। पौलुस जां सीलासै तैसनि जां तेसैरै पूरै परिवारानि बपतिस्मा दित्ता। तेनि पौलूस जां सीलासानि अपड़ै घरा मझ बेशणेरै तेईनी बोलु, ऐठणीरै तेईनी सैक्यै तैठि रुकि गियै।

पौलुस जां सीलास ज्यादातर तैस जगाय मिलींथ्यै जेठि यहूदी मैहणु प्रार्थना करींथ्यै। हर रौज जेख्णी सैक्यै तैठि गहींथ्यै ता अक दासी छोकरी जै बुरी आत्मायरै वशा मझ थी तैन्हैरा पीछा करियां करींथी। ऐस बुरी आत्मायरै सहारै सिंउ सेकैयि मैहणुवां केरै भविष्येरै बारै मझ शुणांईथी, ऐनि धन्धै ला सेकैयि अपड़ै मालिकानि बड़ा भारी पेईंसा कमोईयां करींथी।

पौलुसेरै जां सीलासेरै गांहथै टैमां ऐकैई दासी छोकरि जौरै-जौरै हक्कै दियां करींथी, “ऐक्यै मड़द परम प्रधान परमेश्वरेरै सेवक अत्तै। ऐक्यै तुहांनि उद्धारेरी बत्त शुणांतै अत्तै!” सैकेयि हर रौज ऐहिं कियां करींथी जेनि ला कि पौलुस नाराज भौ गेया।

लाष्टी, अक धियाड़ि जेख्णी तेनि दासी छोकरी जौरै- जौरै हक्कै दींणी शुरू की, तां पौलुसै तैस धेरै मुड़ि करि तैस अंतर जै बुरी आत्मा थी तैसनि बोलु, “यीशुरै नाँ किना ऐस छोकरी मझां निकोहि गा।” तेसै टैंमा सै बुरी आत्मा तैस मझां निकोहि करि चलि गैयि।

तैस दासी छोकरिरै मालिक बड़ै गुस्सै भौ गियै। तैन्हां पता लगि गिया कि बिना तेनि बुरी आत्माय सेकैई छौकरि मैहणुवां केरा भविष्य ना शुणां सकींथी। ऐठणीरा मतलब थ्या कि मैहणुवां अबै तेसैरै मालिकानि पेईंसै ना दींणै जियो तेईनी सेकैई तैन्हेरै भविष्येरै बारै मझ ना शुणांती कि तैन्हां सिंउ कितु भूंणु।

ऐठणिरै तेईनी तैस दासी छोकरिरै मालिकै पौलुस जां सीलास रोमी अधिकारिया किनि लै नियैं। तैन्हैं पौलुस जां सीलास मारै, जां सैक्यै जेलखानै मझ सुट्टि दित्तै।

तैन्हैं पौलुस जां सीलास जैल्हिरै ऐतियै हिस्सै मझ रखै जेठि सभनियां जादै सिपाहि थ्यै। यो तेईनी कि तैन्हैं तैन्हेरै पैयिड़ लकड़ेरै टुकड़ा सिंउ बन्हीं दित्तै। पण पौलुस जां सीलास अधरातै, परमेश्वरेरी स्तुतिरै गीत लांतै थ्यै।

तां अचानक, अक बड़ा भुन्जल भुवा! जैल्हिरै सारै दुवारै खुलि गियै, जां सारा केईदिया केरी जंजीरै खुलि करि छुड़खि गेई।

तां जैल्हिरा ठांणैदार बियुझि गिया। तेनि हैरू की जैल्हिरै दुवारै सारै खुल्लै अत्तै। तेनि सौचु कि सारै केईदी बचि करि नशि गियै। सैक्या डरि गिया कि तैन्हेरै नशि गांहणेरी वजाहि सिंउ रोमी अधिकारिया सैक्या मारी छडणा, ऐठणिरै तेईनी सैक्या आत्म हत्या कांनेरै तेईनी तैयार भौ गिया! पण पौलुसै तैस हैरी जौरै हक्क दित्ती, “रुकि गा! अपड़ि जानिनी चौट मेईं लायि। असै सारै ऐठि अत्तै।”

तेनि ठांणेदारै डरौरै पौलुसा जां सीलासा किना पुच्छु, “उद्धार पांणेरै तेईनी मूं कितु कांनु?” पौलुसै जवाब दित्ता, “प्रभु यीशु मसीह पनि विश्वास कर, ता ताउ जां तिंडै पूरै घरानेनी उद्धार मेईंणा।” तां सैक्या ठांणैदार पौलुसा जां सीलासा अपड़ै घरै लै गिया जां तैन्हेरै जख्म धोत्तै। पौलुसै तेसैरै घरेरै सारा मैहणुवंनी प्रभु यीशु मसीहरै बारै मझ शुभ संदेश शुणां।

ठांणैदारै जां तेसैरै पूरै परिवारे यीशु मसीह पनि विश्वास केया, ऐठणीरे तेईनी पौलुसै जां सीलासै तैन्हांनि बपतिस्मा दित्ता। तां ठांणैदारै पौलुस जां सीलासानि रोट्टी खलाई, जां सैक्यै यौकिया मझ बड़ै खुश भुवै।

दुईं धियाड़ी नगरेरै अगुवोऐ पौलुस जां सीलास जैल्ही किना आजाद करि दित्तै जां फिलिप्पी शहरा किना चलि गांहणानि बोलु। पौलुस जां सीलास लूदिया जां कुछ होरा मित्रा सिंउ मिलै जां तैठां किना बाद सैक्यै नगरा किना निकोहि गियै। यीशुरै बारै मझ शुभ संदेश फैलता गिया, जां कलीसिया बधति गैयि।

पौलुसै जां होरै बड़ै मसीही अगुवोऐ बड़ा सारा नगरा केरी यात्रा की। तैन्हैं मैहणुवंनी यीशुरै बारै मझ खुशखबरी शुणांय। तैन्हैं कलीसियेरै विश्वासियानि खुश कांनेरै तेईनी जां शिक्षा दींणेरै तेईनी केही चिट्ठी बि लिखि। ऐन्हां मझां किछ चिट्ठी बाइबलिरी किताबी बंणि गेई।