48. यीशुऐ वायदै बा मसीह आ- कहानी

जेख्णी परमेश्वरै संसार बंणा ता सभ किछ बधिया थियु। कोई पाप ना थ्या। आदम जां हव्वा योकिया सिंउ बड़ा प्रेम करींथ्यै। जां सैक्यै परमेश्वरा सिंउ प्रेम करींथ्यै। कोई बिमारी जां मोऊत ना थी। परमेश्वर ऐतियै संसारा बणांणा चांहथा थ्या।

शैतानै कीड़ेरै जरियै बगीचै मझ हव्वाय सिंउ गल्ल की, केईनी कि सै तैसनि धौखा दींणा चांहथा थ्या। तेख्णी हव्वाय जां आदमै परमेश्वरेरै खिलाफ पाप केया। केईनी कि तैन्हैं पाप केईथ्या ऐठणीरे तेईनी धरती पन रींहणारै सारै जणै मरि गांहथै।

केईनी कि आदम जां हव्वाय पाप कियौरा थ्या, ऐठणीरे तेईनी किछ होरू बि बुरू भू। सैक्यै परमेश्वरेरै दुश्मण बंणि गियै। जेठणिरी वजाहि सेईतै, तेख्णी किना हरेक मैहणु पाप केया। हरेक मैहणु जन्मा किना ऐ परमेश्वरैरा दुश्मण आ। परमेश्वरा जां मैहणुवां केरै बिच कोई शांति ना थी। पण परमेश्वर शांति स्थापित कांना चांहथा थ्या।

परमेश्वरै वायदा केया कि हव्वायरा वंश शैतानेरू मुंडका पायड़ा हैटां प्रिंचैला। तेनि ऐ बि बोलु कि शैतान तेसैरै पायड़ानि डंस दैला, पण परमेश्वरा सैक्या फिरी जींता करि दींणा। ऐठां किना बाद, मसीही शैतानेरी शक्ति हमेशा के लिए खत्म करि दींणी। केहिया साला बाद, परमेश्वरै लुहाउ कि सैक्या मसीह यीशु आ।

परमेश्वरै तेनि बाढ़ी ला अपड़ा परिवार बचा जैस सैक्या अंणनार थ्या। नूहा सिंउ अक किश्ती बंणाणनि बोलु, कि तैस ऐनि हिसाबै परमेश्वरेरै मैहणु बचांणै जै तैस पनि विश्वास करींथ्यै। ऐनि हिसाबै, सैक्यै सारै परमेश्वरेरै जरियै मारी दींणेरे काबिल थियै केईनी कि तैन्हैं पाप कियौरा थ्या। पण परमेश्वरै तैन्हां सभनियां बचांणेरै तेईनी यीशु भेईजा जै तैस पनि विश्वास कातै।

केहिया साला तेईनी, याजक परमेश्वरेरै तेईनी बलिदान चाढ़तै रिय्है। ऐ ऐठणीरै तेईनी करींथ्यै कि मैहणुवें पाप कियौरा थ्या, जां सैक्यै परमेश्वरा किना सजायरै काबिल थ्यै। पण सै बलिदान तैन्हेरै पाप माफ ना करी सकींथ्या। यीशु सभनियां बड्डा महायाजक आ। तेनि सै कियु जै कौ याजक ना करि सकींथ्या। तेनियें सिर्फ अक ऐतिया बलिदान दींणेरै तेईनी अपांणा दैयि दित्थिया जै हरेक मैहणुरै पापा माफ करी सकींथ्या। तेनि मनि लियु कि परमेश्वर सारा केरै पापा केरै तेईनी सिर्फ तैसनि ऐ सजा दिया। ऐनि कारणै, यीशु सिद्ध महायाजक बंणि गिया।

परमेश्वरै अब्राहमा सिंउ बोलु, “आंउ तिंडै जरियै संसारेरै सारा कुलानि आशीष दैला।” यीशु मसीह ऐसै अब्राहमेरा वंशज थ्या। परमेश्वर अब्राहमेरै जरियै सारा कुलानि आशीष दींता, केईनी कि जै यीशु मसीह पनि विश्वास कातै परमेश्वर तैन्हां सभनियां पापा किना बचांता। जेख्णी ऐक्यै मैहणु यीशु मसीह पनि विश्वास कातै, ता परमेश्वर तैन्हां अब्राहमेरै वंशज मनता।

परमेश्वरै अब्राहमा सिंउ बोलु कि तु अपड़ै सक्कै पुत्रा मिंडै तेईनी बलिदान करि दै। पण फिरी परमेश्वरै इसहाकेरी जगाय बलि कांनेरै तेईनी मेम्ना दी दित्ता। असै सारै अपड़ै पापा केरै तेईनी मारी छडणेरै काबिल थ्यै! पण परमेश्वरै असेड़ि जगाय मरनेरै तेईनी यीशु बलिदानेरै रूपा मझ दी दित्ता। ऐनि वजाहि ला असै यीशुनि परमेश्वरैरा मेम्ना बोलतै।

जेख्णी परमेश्वरै मिस्र देशा पनि मुसीबत भेईजी ता तेनि हर इस्राएली परिवारानि बोलु कि सै एकि मेम्नेरी बलि करिया। तैस मेम्ने मझ कोई दोष ना भूंणा चेहिंथा। फिरी अपड़ै दुवारा केरै चौखटा पनि जां अड्ढा-बड्ढा तेसैरा खून लांणा थ्या। जेख्णी परमेश्वरै सैक्या खून लधा ता सै तैन्हेरै घरा किना आघै चलि गिया जां तैन्हेरा जैठा पुत्र ना मारा। जेख्णी ऐहिं भूं ता परमेश्वरै ऐसनी फसहैरा त्यौव्हार बोलु।

यीशु फसहेरै त्यौव्हारेरै एकि मेम्ने सैयि आ। तेनि कदि बि पाप ना केया, ऐठणीरे तेईनी तैस मझ किछ बि गलत ना थियु। सैक्या फसहेरै त्यौव्हारा मझ मुआ। जेख्णी केणुक्या यीशु मसीह पनि विश्वास काता, तेख्णी यीशु मसीहरा खून तैस मैहणुरै पापा केरी कीमत चुकांता। ऐ ऐतियु आ कि परमेश्वर तैस मैहणु किना आघै चलि गिया, केईनी कि सै तैसनी सजा ना दींता।

परमेश्वरै इस्राएली मैहणुवां सिंउ अक वायदा केया, केईनी कि सैक्यै एतियै मैहणु थ्यै जै परमेश्वरै अपड़ै भूंणेरै तेईनी चुणौरै थ्यै। पण परमेश्वरै अक ऐतिया वायदा केयौरा जै कि सभनियां केरै तेईनी आ। अगर कौस बि जातिरा कौ बि मैहणु ऐस नाउवें वायदै मनि लींता, ता सैक्या परमेश्वरेरै मैहणुवां मझ शामिल भौ गांहथा। सैक्या ऐ ऐठणीरै तेईनी काता केईनी कि सैक्या यीशु पनि विश्वास काता।

मूसा अक ऐतिया भविष्यवक्ता थ्या जेनि परमेश्वरेरै वचनेरा बड़ी सामर्थ सिंउ प्रचार केईथ्या। पण यीशु सभनियां भविष्यवक्ता मझ सभनियां बड्डा आ। सैक्या परमेश्वर आ, ऐठणीरै तेईनी जै किछ बि तेनि कियु जां बोलु सै परमेश्वरेरै कंम जां वचन थ्यै। ऐठणीरै तेईनी पवित्र-शास्त्र यीशु मसीहनी परमेश्वरेरा वचन बौलता।

परमेश्वरै राजै दाऊदा सिंउ वायदा केईथ्या कि राजेरै रूपा मझ तेसैरा अक वंश परमेश्वरेरै मैहणुवां पनि हमेशा राज करैला। यीशु परमेश्वरेरा पुत्र जां मसीह आ, ऐठणीरै तेईनी सैक्या राजै दाऊदेरा वंशज आ जै हमेशा तेईनी राज करि सकता।

दाऊद ता इस्राएलेरा राजा थ्या, पण यीशु सारै संसारैरा राजा आ! तैस फिरी ऐईंणु जां हमेशा तेईनी सच्चाई जां शांति सिंउ अपड़ै राज्य पनि शासन कांना।