49. परमेश्वरेरा नवाँ वायदा- कहानी

एकि स्वर्गदूतै एकि जुआन छोकरी मरियमै सिंउ बोलु कि सै परमेश्वरेरै पुत्रानि जंन्म दैली। सै हालै तेईनी कुंवारी थी, पण पवित्र आत्मा तैस किनि या जां सैकेई दुपरांणी भुई। तेनि एकि पुत्रानि जन्म दित्ता जेसैरू नाँ तेनि यीशु रखु। ऐठणीरै तेईनी यीशु परमेश्वर जां मैहणु दोईयो आ।

यीशु मसीह बड़ै भारी चमत्कार कियै जै ऐ साबित कातै कि सै परमेश्वर आ। सै पांणी बेहीं चला जां पांणी शांत कियु। तेनि बड़ै सारै बिमार मैहणु ठीक कियै जां बड़ा सारा मैहणुवां मझां बुरी आत्माय कढी। तेनि मौरै मैहणु बि जींतै करि दित्तै, जां तेनि चमत्कार करि करी पंजा रोट्टिया जां दुवें मछलियै ला 5000 मैहणुवंनी भरपूर टोट्टी खलाईथी।

यीशु अक महान शिक्षक बि थ्या। जै किछ बि तेनि शिख्राउ, सै तेनि सिद्धताय सिंउ शिख्राउ। जै सै मैहणुवंनि कांनानि बौलता सै तैन्हां कांनु चेहिंथु केईनी कि सैक्या परमेश्वरैरा पुत्र आ। उदाहरण तौर पनि, तेनि शिख्राउ कि तुहां होरनियां मैहणुवां सिंउ बि तेनि ऐ हिसाबै सिंउ प्रेम कांनेरी जरूरत आ जिहीं तुवै अपांणै सिंउ प्रेम कातै।

तेनि ऐ बि शिख्राउ कि तुहां सारिया चीजा किना जादा जां अपड़ी संपत्ति किना बि जादा परमेश्वरा सिंउ प्रेम कांना चेहिंथा।

यीशु बोलु कि संसारा मझ कोई बि चीज हासिल कांना किना जादु बधिया आ परमेश्वरेरै राज्य मझ ऐईंणु। तेसैरै राज्य मझ तुवाड़ै ऐईंणेरै तेईनी जरूरी आ कि परमेश्वर तुहां तुवाड़ै पापा किना बचाईया।

यीशु बोलु कि कुछ मैहणुवां सै मनि लींणा। परमेश्वरा सैक्यै मैहणु बचांणै। पण होरनियां मैहणुवां सैक्या ना मनणां। तेनि ऐ बि बोलु कि कुछ मैहणु बधिया जमीनि सैयि अत्तै, केईनी कि सैक्यै यीशुरै बारै मझ शुभ संदेश मनिं लींतै, जां परमेश्वर तैन्हां बचा लींता। पण कुछ मैहणु बत्तेरी सैट्ट जमीनि सैयि अत्तै। परमेश्वरैरा वचन बीआ सैयि बत्तै पूंता, पण तैठि सै जमतुऐ ना। ऐतियै मैहणु परमेश्वरैरा वचन ना मनतै। सैक्यै तेसैरै राज्य मझ ऐईंणानि नमा करि दींतै।

यीशु शिख्राउ कि परमेश्वर पापिया सिंउ बड़ा प्रेम काता। सैक्या तैन्हांनि माफ कांना चांहथा जां तैन्हां अपड़ि आउलाद बणांणा चांहथा।

यीशु ऐ बि बोलु कि परमेश्वर पापा सिंउ नफरत काता, केईनी कि आदमै जां हव्वाय पाप केया, ऐठणीरै तेईनी तैन्हेरै सारै वंशै पाप केया। इस संसारा मझ रींहणार हरेक मैहणु पाप काता जां परमेश्वरा किना दूर आ। हर मैहणु परमेश्वरैरा दुशमण आ।

पण परमेश्वरै इस संसारा मझ रींहणारा हरेक मैहणु सिंउ ऐनि हिसाबै प्रेम केया: तेनि अपड़ा इकलौता पुत्र कुर्बान करि दित्ता ताकि परमेश्वर तैन्हांनि सजा ना दिया जै तैस पनि विश्वास कातै। ऐठणिरी बजाय, सैक्यै तैस सैईतै हमेशा रींहणै।

तुवै मरनेरै काबिल अत्तै, केईनी कि तुहैं पाप कियौरा। तुहां सिंउ परमेश्वरैरू गुस्सै भूंणु ठीकै आ, ऐठणिरी वजाय सै यीशु पनि गुस्सै भुवा। तेनि यीशुनि क्रूसेरी मोऊतिरी सजा दित्ती।

यीशु कदि पाप ना केया, पण तेनि ऐपु पनि ऐस सजाहिरै तेईनी परमेश्वरानि नमा ना केया। तेनि मरि गांहणु सवीकार कियु। ऐनि हिसाबै, तुवाड़ै पाप जां इस संसारा मझ रींहणारा हरेक मैहणुरै पाप चुकि लींणानि सैक्या अक सिद्ध बलिदान थ्या। यीशु अपांणा परमेश्वरेरै तेईनी बलिदान करि दित्ता, ऐठणीरै तेईनी परमेश्वर कौस बि पापा, यो तेईनी कि भयांकर पाप बि माफ काता।

बेशक तुवै बड़ै भारी अच्छै कंम कातै, ता ऐन्हैं ला परमेश्वरा तुवै ना बचांणै। तेसैरा मित्र बणनेरै तेईनी ऐतियु किछ बि ना जै तुवै करि सकतै। ऐठणिरी वजाय, तुहां विश्वास कांना कि यीशु परमेश्वरैरा पुत्र आ, जां सैक्या तुवैड़ै बदलै क्रूसा पनि मरि गिया, जां ऐ बि कि परमेश्वरै सैक्या फिरी जींता करि दित्ता। अगर तुवै ऐस पनि विश्वास करा ता परमेश्वरा तुहांनि तुवाड़ै पापा किना माफी दी दींणी।

परमेश्वरा सैक्या हर मैहणु बचांणा जै यीशु पनि विश्वास काता जां तैस अपड़ै प्रभु स्वीकार काता। पण तैस सैक्यै ना बचांणै जै तैस पनि विश्वास ना कातै। ऐ कोई मायनै ना रखतु कि तुवै शैठ अत्तै कि गरीब अत्तै, जनानी आ कि मड़द आ, या तुवै कोठि रींहथै। परमेश्वर तुहां सिंउ प्रेम काता जां सै चांहथा कि तुवै यीशुनि पनि विश्वास करिया कि सै तुवाड़ा मित्र बंणि सकिया।

यीशु तुहां शदांता कि तैस पनि विश्वास करा जां बपतिस्मा लिया। क्या तुवै विश्वास कातै कि परमेश्वरैरा पुत्र, यीशु ऐ मसीह आ? क्या तुवै विश्वास कातै कि तुवै पापी अत्तै जां ऐ कि तुवै परमेश्वरेरी तरफों सजाईरै काबिल अत्तै? क्या तुवै विश्वास कातै कि तुवाड़ै पाप मिटांणेरै तेईनी यीशु क्रूसा पनि मुआ?

अगर तुवै यीशु पनि जां जै तेनि तुवाड़ै तेईनी कियौरू आ तैस पनि विश्वास कातै, ता तुवै मसीही अत्तै! शैतान अपड़ै अंधकारेरै राज्य मझ अबै तुहां पनि शासन ना काता। अबै परमेश्वर अपड़ै प्रकाश बाऐ राज्य मझ तुहां पनि शासन काता। तेनि तुवै पाप कांना किना रौकि दित्तै, जैन्हां तुवै करींथ्यै। तेनि तुहांनि अक नवाँ सही जीवन दितौरा।

अगर तुवै मसीही अत्तै ता जै यीशु कियौरू आ तेनि कारणै परमेश्वरै तुवाड़ै पाप माफ करि दित्तै। अबै, परमेश्वर एकि दुशमणेरी वजहि तुहां एकि बड़ै खास मित्रा मनता।

अगर तुवै परमेश्वरेरै मित्र अत्तै जां प्रभु यीशुरै सेवक अत्तै ता तैन्हां गल्ला मंनणेरी ईच्छा करेलै जै यीशु तुहांनि शिख्रांता। भले ही तुवै मसीही किना भुईया, शैताना हालै बि पाप कांनेरै तेईनी तुवाड़ी परीक्षा कांनी। पण परमेश्वर हमेशा सेहै काता जै सै कांनानि बौलता जां सै काता। सै बौलता कि अगर तुवै अपड़ै पाप मनि लिया, ता तैस तुहांनि माफ करि दींणु। तैस तुहांनी पापेरै खिलाफ लड़नेरी शक्ति दींणी।

परमेश्वर तुहांनि प्रार्थना कांनानि जां तेसैरै वचन पढ़नेरै तेईनी बौलता। सै तुहांनि होरनियां विश्वासिया सिंउ मिलिकरी तेसैरी आराधना कांनेरै तेईनी बि बौलता। तुहां होरनियां मैहणुवंनी बि शुणांणु कि तेनि तुवाड़ै तेईनी कितु कियौरू आ। अगर तुवै ऐन्हां कंमा करिया ता तुवै तेसैरै पक्कै मित्र बंणि गांहणै।