50. यीशु वापस ऐईंता-कहानी

लगभग 2000 साला किना, संसारा मझ सारा जगाईया पनि मतै सारै मैहणु यीशु मसीहरै बारै मझ शुभ संदेश शुणतै अत्तै। जां कलीसिया बधति आ। यीशु ऐ वायदा कियौरा कि तैस संसारेरै अंत मझ वापिस ऐईंणु। केईनी कि सै हालै तेईनी वापिस ना या, तां बि तैस अपड़ा वायदा पूरा कांना।

जबकि असै यीशुरी वापस ऐईंणेरी भाय मझ अत्तै, परमेश्वर असु किना ऐनि हिसाबै जीवन जींणैरी ईच्छा काता जै पवित्र आ जां जै तेसैरा आदर काता। जेख्णी यीशु धरती पन रिहींथ्या तां तेनि बोलु, “मिंडै चैलै संसारा मझ सारा जगाईया केरै मैहणुवंनी परमेश्वरेरै राज्यरै बारै मझ खुशखबरिरा प्रचार करेलै, जां तेख्णी अंत आईछि गांहणा।”

बड़ि सारियै जातियै हालै तेईनी यीशुरै बारै मझ ना शुणोरू। स्वर्गानि गांहणा किना पेहिलै, यीशु मसीहिया मैहणुवां सिंउ तैन्हां मैहणुवंनी खुशखबरी शुणांणनी बोलु जैन्हैं ऐ कदि ना शुणोरी। तेनि बोलु, “गहा जां सारिया जातिया केरै मैहणुवां चेलै बंणा!” जां “कटाईरै तेईनी पट्टी बिल्कुल तियार भौ गियोरी अत्ती!”

यीशु ऐ बि बोलु, “कौस बि मैहणुरा सेवक तैस किना बड्डा ना भूंता। इस संसारेरै खास मैहणुवें मूं सिंउ नफरत की, जां मिंडि वजाहि सिंउ तैन्हां तुवै बि सतांणै जां मारी छडणै। इस संसारा मझ तुवै दुखी भूंणै, पण मजबूत बंणा, केईनी कि मीं शैतान हारियांणी छडौरा जै इस संसारा पनि राज्य काता। अगर तुवै अंत तेईनी मिंडै विश्वासेरै काबिल बणि रिय्हा, ता परमेश्वर तुहां बचाला!”

यीशु अपड़ै चैलानि ऐ समझांणेरै तेईनी अक कहानी शुणांई कि जेख्णी संसारैरा अंत भूंता ता मैहणुवां सिंउ कितु भुंणु। तेनि बोलु, “एकि मैहणु अपड़ि पट्टी मझ बधिया बी बाउ। जेख्णी सैक्या झुलौरा थ्या ता तेसैरा दुशमण या जां किणकेरू बीआ मझ जंगली बी बा छडु, जां फिरी सै चलि गिया।”

“जेख्णी सै बी लुंगि गियु ता सेवकै तैस मैहणु सिंउ बोलु, ‘हे स्वामी तीं ता अपड़ी पट्टी मझ बधिया बी थियु बाउरू, ता फिरी ऐस मझ जंगली बुट्टै किहीं लगै?’ तेनि मैहणु जवाब दित्ता, ‘सिर्फ मिंडै दुशमन ऐ ऐनि हिसाबै चांहथै। ऐक्या मिंडा कोई दुश्मण आ जेनि ऐहिं कियु।’”

“तैन्हैं सेवकै अपड़ै स्वामिनी जवाब दित्ता, ‘क्या असु जंगली बुट्टी पुटि छडणी चेहिंथी?’ तेनि स्वामी बोलु, ‘नहीं। अगर तुवै ऐहीं करेलै ता तुहां कुछ बुट्टी किणकिरी बि पुटि दींणी। बढतै तेईनी ऐन्हां रीहणा देया। फिरी जंगली बुट्टी पुटि करी किट्ठी करि-करी सैकेई दट्ठै बंणा करि तुवै फुकि छडै। पण किणक अंणि करी किट्ठी करि-करी मिंडी तूणियां मझ भरी दिया।’”

चैलै ऐस कहानिरा मतलब ना समझा, ऐठणीरै तेईनी तैन्हैं यीशुनि बोलु कि छंदै असुनि ऐस कहानिरा मतलब दुबारी समझाय दै। यीशु बोलु, “बधिया बी बांणै बा मैहणु मसीहरै बारै मझ शुणांता। पट्टी संसारेरै बारै मझ शुणांता। बधिया बी परमेश्वरेरै राज्यरै मैहणुवां केरै बारै मझ शुणांता।

“जंगली बी शैतानेरै मैहणुवां केरै बारै मझ शुणांतै। तैस मैहणुरा दुशमण, जेनि तैसेरी पट्टी जंगली बी बाईथियु सै शैतानेरै बारै मझ शुणांता। जां बढणार परमेश्वरेरै स्वर्दूता केरै बारै मझ शुणांतै।”

“जेख्णी संसारैरा अंत भूंणा तेख्णी स्वर्गदूता सैक्यै सारै मैहणु किट्ठै कांनै जै शैतानेरै अत्तै। तैन्हां स्वर्गदूता सैक्यै एकि बड़ी गर्म आगी मझ सुटि दींणै। तैठि तैन्हां मैहणुवां भयांकर सतावेरी वजाहि सिंउ लैरी दींणी जां दंत चापणै। पण जै मैहणु धर्मी अत्तै, जैन्हैं यीशु पनि विश्वास कियौरा, सैक्यै अपड़ै पिता परमेश्वरेरै राज्य मझ दिहा सैयि चमकणै।”

यीशु ऐ बि बोलु कि तैस संसारैरा अंत भूंणा किना पेहिलै धरती पनि वापस ऐईंणु। तैस तेनिऐं हिसाबै वापिस ऐईंणु जिहीं सैक्या गियौरा थ्या। मतलब, तैस किनि तेसैरा असली शरीर भूंणा, जां तैस असमांणा मझ बदआ पनि सवार भौकरी ऐईंणु। जेख्णी यीशु मसीह वापस ऐईंला, ता हर अक मसीही जै मरि गियौरै अत्तै तैन्हां मौरा मझां जींति गांहणु जां तैस सिंउ असमांणा मझ मिलणु।

तां जै मसीही हालै बि जींतै अत्तै सैक्यै असमांणा मझ चुकी गांहणै जां तैन्हां होरनियां मसीहिया सेईतै किठी गांहणु जै मौरा मझां दुबारै जींती गियौरै भूंणै। सै सारै तैठि यीशु सेईतै भूंणै। तैठां किना बाद, यीशु अपड़ै मैहणुवां सेईतै रींहणु। जेख्णी सैक्यै साउगा रींहथै ता तैन्हां किनी हमेशा के लिए पूरी शांति भूंणी।

यीशु तैस पनि विश्वास कांनारानि हरेक मैहणुनि अक मुकुट दींणैरा वायदा कियौरा। तैन्हां हमेशा के लिए परमेश्वरा सिंउ हरेक चीजै पनि शासन कांना। तैन्हां किनी सिद्ध शांति भूंणी।

पण परमेश्वरा तैन्हां सभनियां केरा न्याय कांना जै यीशु पनि विश्वास ना कातै। तैस सैक्यै नरका मझ सुटि दींणै। तैठि तैन्हां रूंणु जां अपड़ै दंत चापणै, जां सैक्यै हमेशा दुखी रींहणै। कदि ना हिशणै बाई आगी सैक्यै हमेशा फुकियां कांनै, जां कीड़ा सैक्यै ध्रड़ियां कांनै।

जेख्णी यीशु वापस ऐईंता, ता तैस पुरै तरीकै सिंउ शैतान जां तेसैरा राज्य खत्म करि दींणा। तैस शैतान नरका मझ सुटि दींणा। तैठि शैताना हमेशा तेईनी फुकियुंतै रींहणु, तैन्हां सभनियां सेईतै जैन्हैं परमेश्वरैरी गल्लै मनणेरी वजाय शैताना पिचोरै चलणैरा चुनाव केईथ्या।

केईनी कि आदम जां हवाय परमेश्वरेरी अज्ञायरा पालन ना केईथ्या जां पाप इस संसारा मझ लै करि येईथ्यै, परमेश्वरै तेसनी श्राप दित्ता जां तैस नष्ट कांनेरा फैसला केया। पण कौसक्यै धियाड़ी परमेश्वरा एकि नवें स्वर्गेरी जां एकि नवीं धरतिरी रचना कांनी जै सिद्ध भूंणै।

यीशु जां तेसेरै मैहणुवां तैस नवीं धरती पनि रींहणु, जां तैस हमेशा के लिए सभनियां चीजा पनि राज्य काना। तैस मैहणुवां केरै हर आशु पूंछी दींणै। अबै कोई बि दुखी जां परैशान ना भूंणा। तैन्हां रूंणु ना। सैक्यै बिमार ना भूंणै या मरने ना। जां तैठि किछ बि बुराई ना भूंणी। यीशु अपड़ै राज्य पनि न्यायपूर्वक जां शांति सिंउ शासन काना। तैस हमेशा के लिए अपड़ै मैहणुवां सिंउ रींहणु।