1. दुनिया बनास

हिना लेन्ही कि लच्यंग लरी परमेश्वर सै जम्मा बथौ बनास| उस टुगू ज्या ची दुनिया ग जइ खरी अतकू अनि अति जम्मा बथौ जा बनास। परमेश्वर चैन्तु थंगजा बनाम गै निमफन उ वम्बंग तीक्क कल्त निस, हंग खाली निस,खसुंग्य कि इता वास परमेश्वर सै दुनिया कू खरी बथौ जा मुबनास| हंग परमेश्वर गै ल्हेमे ती ग यरतो पसीग निस।

हजू परमेश्वर सै ल्यैस, “छन्त ल्है!” हंग छन्त कल्च। परमेश्वर सै तिन्स कि छन्त बुद अनि हंग उजा “निछ” ल्यैस| हंग उस उजा वम्बंग सै यकरो कस्युंग, जइजा उस “मुन्छ” ल्यैस। परमेश्वर सै दुनिया बनाम गै लरी ज्या कू छ्न्त जा बनास।

दुनिया बनाम गै न्युंगज्या परमेश्वर से ल्यैस, “ती गै यरतो तिग छक्का रायंग|” हंग ती तिग दूसरों यकरो ल्यंग हंग हिना ही लिच्च, परमेश्वर सै यकरो कसुंगद छु जा “तिम्भू” ल्यैस।

सुम ज्या ची परमेश्वर से ल्यैस, जम्मा ती तीग बं कू थूमसियंग, हंग छरत बं तियंग, परमेश्वर सै छरत बं जा थंगजा ल्यैस हंग ती जा “समुद्र” ल्यैस, परमेश्वर से तिन्स कि जई बथौ उस बनास, अति बुद निस।

हंग परमेश्वर से ल्यैस, थंग्जा कू जम्मारी स्यिन ग बौटू कजूस। हंग हिनाइ लिच्च। परमेश्वर से तिन्स कि जइ उस बनास अति बुद निस ।

दुनिया बनाम गै पी ज्या ची परमेश्वर से ल्यैस, “तिम्भू कू छन्त तिन्थ ल्है|” हंग नी, लाछन हंग कर्मा प्रकट लिच्च| परमेश्वर सै उसीजा थंगजा कू छन्त दाम दंची निछ हंग मूंछ, छैत्त-खत्त हंग यन कू यकरो स्युंग्म दंची बनास।

नाज्या ची परमेश्वर से ल्यैस, “टंग्द प्राणी ती जा तीक्क कल्च हंग तिम्मू कू निप्या कउडें। हिना दंची उस ती कू तैरते वाला जन्तु जा हंग निप्या बनास| परमेश्वर से तिन्स कि हिदी बुद निस, हंग उजा आशीर्वाद दास।

दुनिया बनाम गै दुगूज्या ची परमेश्वर सै ल्यैस, “थंग्जा कू स्योंगसिद वाला जम्मा छन-छन गै जानवर नियंग|” हंग परमेश्वर गै लैम्ह गै अनुसार हिना कल्च। दुमा जानवर ठुंग्द वाला निस, दुमा थंग्जा कू फैरसिदै वाला निस, दूमा सिर कुतु रोकसिद वाला जानवर निस| हंग परमेश्वर सै तिन्स कि हिदी बुद निस।

हंग परमेश्वर से ल्यैस, “रनि इन मि जा अफीग रूप रंग कू हंग अफी नारुकत बनाम| उसी मि थंगजा कू हंग जम्मा जानवर मंग ती राज स्युंग्यंग।

हिना दंची परमेश्वर सै सा कौरग मि बनास हंग उजा जीवन गै सॉस फिरस| हिदी मि गै मिन आदम निस| परमेश्वर सै आदम गै स्योंगसिम दंची, तीग पूद सवार जा बनास हंग उजा औंगम दंची आदम जा उग चिकू तास।

अति सवार मैं गुन्दा कू परमेश्वर सै निस्यी खास स्यिन यिब्स, तीग जीवन गै स्यिन हंग तीग बुद-यद गै ज्ञान दाद वाला स्यिन। परमेश्वर सै आदम जा ल्यैस कि उ अति सवार गै बुद हंग यद गै ज्ञान गै स्यिन जा होतिग जम्मा स्यिन गै फल जातरयंग। हंग उस अति स्यिन गै फल जाम च्यंग उ सिचियंग।

हजू परमेश्वर सै ल्यैस, “यूरासिरी गै दंची तौंग्मी स्योंगसिम बुद मुनी|” हंग खमि री टंग माला आदम गै साथौ मूल्हेतरन।

आदम हंग उग रिथिस्या परमेश्वर चैन्तु उसी दंची कस्युंग्द, वाला अति ढंग्त स्वार कू स्योगसिंग मत्त खुश निन्नस। उसी मंग खमि री खसै पुसै मुच्युकसिद निन्नस, हजूरी हिना कथा सै उसी मंग जा राम मुस्युंग्स, खस्युंग कि दुनिया कू पाप मुनीस। उसी ज्या ज्यारी अति स्वार कू फैरसि निन्नस हंग परमेश्वर जा कथा स्युंग तान्नस|

हंग आदम से उजा तिन्स ता उस ल्यैस, “अरे! हिदी ता जिगनई रुकत अनि! हिदी जा ‘मिनंसिरी’ लेयंग्न्न, खसुंग्य कि हिदी यूरासिरी कू खचि स्युंगस|” हिना दंची युरासिरी अफिग मुमा जी बूबा जा होतीग हंग अफिग रिथिस्या गै जरु तीग कल्च।

परमेश्वर सै यूरासिरी हंग मिनंसरी जा अफी नारूकत बनास। परमेश्वर सै उसीजा आर्शीवाद दास, हंग उसीस ल्यैस, “मत्त सन्मय खुई खुमै जा जन्म दा, हंग थंग्जा तीक्क स्युंग्ती!” हंग परमेश्वर सै तिन्स कि जइरी बथौ उस बनास अति मत्त बुद निस, हंग परमेश्वर उसी जम्मा स मत्त खुश निस। हिदी जम्मा री दुनिया बनाम गै टुगू ज्या ची कल्त निस।

हंग निसै ज्या रास, ता जइ खरी परमेश्वर स्युंग्तास उस अति जम्मा री लन पूज्यूस। उस निसै ज्या ची आर्शीवाद दास हंग उजा च्यंग रहाद बनास, खसुंग्य कि निसै ज्या ची उस जम्मा री लन पूरो कसुंग्य| हिना दंची परमेश्वर सै दुनिया जा हंग दुनिया कू जइ खरी बथौ अनि उसी जम्मा बथौ बनास।