2. पाप संसार कू पिरास

आदम हंग उग रिथिस्या परमेश्वर चैन्तु उसी दंची कस्युंग्द, वाला अति ढंग्त स्वार कू स्योगसिंग मत्त खुश निन्नस। उसी मंग खमि री खसै पुसै मुच्युकसिद निन्नस, हजूरी हिना कथा सै उसी मंग जा राम मुस्युंग्स, खस्युंग कि दुनिया कू पाप मुनीस। उसी ज्या ज्यारी अति स्वार कू फैरसि निन्नस हंग परमेश्वर जा कथा स्युंग तान्नस|

हंग अति स्वार कू तिग नबू निस। उ मत्त यद निस। उस अति मिनंसिरी जा रूस, "खै साचो परमेश्वर सै गनीजा हिदी स्वार कूची खरी स्यिन गै फल जाम सै मना कस्युंगसिद अनि?"

अति मिनंसिरी सै जवाब दास "परमेश्वर सै इन्जा ल्यैस कि इन अति बुद जी यद गै ज्ञान गै स्यिन गै च्यंग खमि री स्यिन ग फल जा तरनै परमेश्वर सै इन्जा ल्यैस कि हंग गनीस अति फल जाम च्यंग री उजा तम्म च्यंग री ता गनी सिचियंगनी|”

अति नबू सै मिनंसिरी जा जवाब दास, “हिदी साचो माद! गनी मुसिचियंग। परमेश्वर लाद अनि कि जसौई गनी अति फल जाम च्यंग,गनी परमेश्वर नारुक्त ल्हैयंगनी हंग उग नारुक्त बुद जी यद ग समझ रायंग|”

अति मिनंसिरी सै तिन्स कि उ फल मनरामना निस हंग नेम्दना तिन्ग निस। उरी लाद ल्हैम चिन्थ निस, हिना दंची उस फल थुग कज्जा। हजू उस अफिग रिथी जा जई उग जरु निस उ फल दास हंग उस री कज्जा|

उसीग मी झल्ल, कखुलस, हंग उसीजा पत्तो कचलस कि उसी नंगू निन्नश। उसीस पात तीग जरू रूबग उसीग खसै- पसै बनाग अफिग गौबरंग च्यांम ग कोशिश स्युंगस|

हंग यूरासिरी हंग उग रिथिस्या सै अति स्वार कू फैरसि लंग परमेश्वर ग हार यन्स। उसी निमी परमेश्वर ग नोंकू पकच्यासि। हंग परमेश्वर सै यूरासिरी जा हार स्युंगस, "गै उलौं अनि?" आदम सै जबाब दास, “जिस गजा स्वार कू फैरसिग यन्गस, हंग जी कजेरस, खस्युंग कि जी नंगो निस। हिना दंची जी च्यासियस| "

हंग परमेश्वर सै रूस,“गजा खमि स बतास कि गै नंगो अनि? खै गस अति फल जानस जइजा जाम दंची जिस गजा मना कस्युंगस?” युरासिरी से जवाब दास,“गस जिजा जइ हिदी मिनंसिरी दानस हिदीस जिजा अति फल दास।" हंग परमेश्वर सै मिनंसिरी जा रूस,"गस हिना खौंग स्युंगनस?” अति मिनंसिरी फाक्स, "नबू से जिजा धोखा दास।"

परमेश्वर सै नबू जा ल्यैस, "गै शापित अनि! गै अफिग दन स सिसियंग हंग सा लपच्यंग गै हंग हिदी मिनंसिरी तिग दूसरो सै रुसू स्युंगयंग, हंग नग सन्तान हंग उग सन्तान री तिग दूसरो सै रुसू स्युंग्यंग। हिदी मिनंसिरी गै वंशज नग पुस्या कितियंग, हंग गै उग लिकी छोंगतियंग।’’

हंग परमेश्वर सै मिनंसिरी जा ल्यैस, "जी नग सन्तान जन्माम दंची मत्त दुःखू दायंग| गै अफिग रिथी जा आशा तायंग, हंग उ नग यरतो राज स्युंगयंग ।"

परमेश्वर सै यूरासिरी जा ल्यैस, "गसै अफिग रिथिस्या गै यन्नस हंग जिग कथा मुमानस। हिना दंची थंगजा शापित लिच्च, हंग गजा जाम दंची मत्त लन स्युंगम परयंग थन गै सिचियंगन, हंग नग गोमरंग सा कू छूसियंग|” अति युरासिरी सै अफिग रिथिस्या ग मिन हव्वा तास, जइग अर्थ अनि “जीवन दाद वाला” खस्युंग कि उ जम्मा जाति ग मूमा ल्हैयंगन्न। हंग परमेश्वर सै आदम हंग हव्वा जा जानवर ग को खंगै खसै-पसै चुकसिस।

हंग परमेश्वर सै ल्यैस्, “थन बुद हंग यद पैमग निमफन मि इंग नारुक्त कलिच्च, हिना दंची उसीजा अति जीवन ग स्यिन गै फल मुजाम दाम निस कि उसी राज्यारी दंची टांग्द निस ल्है”। हिना दंची परमेश्वर सै आदम हंग हव्वा जा अति स्वार कू खचि छंगपंग कथिरस। हंग परमेश्वर सै खमि जा री अति जीवन गै स्यिन गै फल मुजाम दंची अति स्वार गै मारोंग चीकू कू तरत स्वर्गदूत जा कतास।