3. गौ

मत्त ज्या ची कथा,दुनिया कू मत्त मि मंग स्योंगसिद निन्नस| उसी मत्त यद हंग पापी कल्लैन्नस। हिदी हिलंग यद निस, कि परमेश्वर सै तिग पुद गौ स हिदी पूरो दुनिया जा नाश स्युंगम गै फैसला कस्युंग|

हंग परमेश्वर नूह जा खुशी कल्त निस। उ यद मि गै गुन्दा स्योंगसिद वाला तिग धर्मी मि निस। परमेश्वर सै नूह जा बतास कि उ तिग लच्यंग पूद गौ राद अनि। हिदी कारण, उस नूह जा तिग पुद नाव बनाम दंची ल्यैस।

परमेश्वर सै नूह जा लगभग तिग सय यरतो पीसा मीटर बुग्ध, नस्सा सुम मीटर परत हंग,चेसम.ड़ई मीटर थैद नाव बनाम दंची ल्यैस। नूह जा उजा स्यिन ग बनाम निस। हंग अतकु सुम तल, मत्त कमरा, तिग कयर, हंग तीग तैबारी बनाम निस। अति नाव नूह, उग मौमाल हंग थंगजा ची यकरो- यकरो जानवरों जा अति गौ कू खचि बचाग तायंग।

नूह सै परमेश्वर ग कथा मानस। उस हंग उग सिरि मंग सै हिनाई नाव बनास जसौ परमेश्वर सै बतास। खस्युंग कि अति नाव मत्त पूद निस हिना दंची उजा बनाम दंची उलंग यन कलगै। नूह सै मि मंग जा राद वाला गौ ग बारे कू चेतावनी दास ढंग उसीजा परमेश्वर गै चैन्तु राम दंची कल्यैस, हंग उसीस उजा विश्वास मुस्युंगस|

परमेश्वर सै नूह हंग उग मौमाल जा अफि दंची हंग जानवर गै दंची पूरो जाम ग फुल थुमग कतासिद ग आदेश री दास। हंग जम्मा री तैयार निस, हंग परमेश्वर सै नूह जा ल्यैस कि हिदी बकतर उ, उग रिथिस्या गै, उग सुम सिरी मंग गै, हंग उसीग रिथिस्या मंग गै, जम्मा जैद मि नाव कू दिम दंची निस।

परमेश्वर सै जम्मा जानवर हंग निप्या ग सिरी हंग चमे जा नूह गै न्योरो थिरस खस्युंग कि उसी नाव कू दि तरयंग हंग गौ रा लंग बक्तर टंग्द होसिन्न। परमेश्वर सै हिना जम्मा जानवरो मंग गै नीसे सिरी हंग नीसे चमे मंग जा थिरस जइजा बलि चढाम गै दंची लन स्युंगस तरयंग| हंग उसी नाव कू टोनभनेस हंग अफि परमेश्वर सै नाव गै मोरोंग कघरतिस|

हंग नम राम शुरू लिच्च, हंग नम रागइ निस, रागइ निस। तीज्या री नम मुरुकस पीसा ज्या हंग पीसा मुन्छ वास नम रागइ निस पूरो संसार ग जम्मा तिग बथौ, इता वास कि थैद स थैद दंगयैर री ती कु कचैकसी।

छरत बं कू स्योंगसिद वाला हर तिग बथौ पझयंगस, उसी मंग हंग ले लूक्च जा होतिग जइ नाव कू निन्नस। उ नाव ती कू दिगइ निस हंग नाव ग चीकू जम्मा बथौ जा च्याकसिम सै बचाग तास।

नम कधिन्स उग निमफन, नइ ला वास अति नाव ती कू तैरते निस, हंग अति बकतर ती चिथ कल्त निस| हंग तीज्या अति नाव तिग यैयर गै येरतो दिग स्योंगसिस, हिदी संसार इता री ती स कबिन्द अनि। सुम ला ग निमफन यैयर ग यरतो तिंग निस।

हंग हजू पिसा ज्या ची निमफन, नूह सै तिग का जा हिदी औंगम दंची छंगपंग थिरस कि खै ती छरत निस। अति का छरत बं औंगम दंची तिर-झिर उडेग निस, हंग उजा हिना खरी बं मुतिन्स।

हंग निंगकूती नूह सै तिग कबूतरी जा छंगपंग थिरस। हंग उजा री खरी छरत बं मुतिन्स, हिना दंची अति नूह ग न्योरो थोकसिग पिरास। तिग हप्ताह गै निमफन उस अति कबूतरी जा हजू थिरस, हंग उ अफिग आकू जैतून ग तिग स्यिन ग डाली चुमग थोकसिग पिरास। ती थिग निस, हंग बौटू हजू जुग निस।

नूह सै तिग हप्ताह हजू रिहनचिग निस हंग सुम चू अति कबूतरी जा छंगपंग थिरस इतापाली उजा स्योगसिम बं कतिनसिस हंग उ थोकसिग मुरास। ती थीग निस।

निस्यी ला निमफन परमेश्वर सै नूह जा ल्यैस, “थन गै हंग नग मौमाल हंग जम्मा ले लिंगै नाव कू खचि छंगपंग रनि। मत्त यम्बा सन्मग हंग खुइ-खुमे मंग जन्म दानी हंग थंगजा तीकक स्युंग्नी।" हिना दंची नूह हंग उग मौमाल नाव कू खचि छंगपंग वन्ग पिरन्नस।

नूह गै नाव कू खचि छंगपंग राम गै निमफन उस तिग दांगसीन बनास हंग बलि दंची लन राद वाला छनछन गै लुक्च गाजी कू खचि दूमा कोरग बलि चढ़ास। परमेश्वर अति बलि स खुश लिच्च हंग नूह हंग उग मौमाल जा आशीर्वाद दास|

परमेश्वर सै ल्यैस, “जि वादा स्यूंग्तू कि मि मंग ग चैन्तु खचि स्युंग वाला यद लन कू खचि जि हजू खज्या थंग्जा कू कुलू मुदायंग किता गौ चैन्तु संसार जा नाश मुसुग्यंग, खस्युंग कि मि अफिग सैनलं खची ही पापी निस।

हंग परमेश्वर सै अफिग वादा गै निशानी गै रूप कू लच्यंग लरी मैलागुच्छा बनास। हंग खज्यारी तिम्भू कू मैलागुच्छा कतिन्स, ता परमेश्वर चि स्युंगयंग कि उस खै वादा कस्युंगस हंग हिनाइ उसीग मि मंग री चि स्युंयंग|