4. अब्राहम गै जरू परमेश्वर गै वाचा

गौ रा लंग उलंग यन ग निमफन, संसार कू मथ मि मंग स्योंगसिद निन्नस, हंग उसी स हजू सै परमेश्वर गै हंग तीग दूसरो मि ग चैन्तु पाप कसयुंग। खसयुंग कि उसी जम्मा री तिगइ बोली फाक्क निन्नस, हिना दंची उसी तीग जरु थुमसि निस हंग तिग सौंग कबनास। हिदी दंची उसीस परमेश्वर गै कथा मुरुंगस जइ हिदी संसार तिक्क स्युंगम निस।

उसी मत्त सेकि निन्नस, हंग उसीजा हना जीवन टांग्म निस हिदी बारे कू परमेश्वर गै कथा मुस्यचिद निन्नस। हिदा वास कि उसीस तिग हिना थेदे चिम बनाम शुरू कस्युंग जइ स्वर्ग वास नभयंग। परमेश्वर सै तिन्स कि उसी तिग जरू स्योंगसिम यद कथा स्युंग तायंग, ता उसी मत्त पापी लन स्युंगतरयंगन्न।

हिना दंची परमेश्वर सै उसीग बोली जा मत्त सै यकरो-यकरो बोली कू कबदलस हंग उसी मंग जा जम्मा संसार कू हासीन्नस। जइ सौंग जा उसीस बनाम शुरू स्युंग निस अति बाबेल लेन्नस, जइ ग अर्थ ल्है “गड़बड़ी|”

सय यन गै निमफन, परमेश्वर सै अब्राम मिन गै तिग मि जा कथा स्युंगस। परमेश्वर सै उजा ल्यैस, “अफिग राजू हंग मौमाल जा होतीग अति राजू दी जइ जी गजा दिखायंग। जी गजा आशीर्वाद दायंग हंग गजा तिग पूद जात बनायंग। जी नग मिन महान स्युंगयंग। जइ गजा आशीर्वाद दायंग जी उजा आशीर्वाद दातू, हंग जइ गजा श्राप दायंग उजा श्राप दात। नग कारण संसार गै जम्मा मि जा आशीर्वाद मिलयंग”।

हिना दंची अब्राम सै परमेश्वर गै कथा मानस। उस अफिग जम्मा ढंग्मी हंग अफिग जम्मा जयजाद गै जरू अफिग रिथिस्या सारै कोरदिस हंग कनान राजू पिदिस जइ परमेश्वर सै उजा दिखास।

हंग अब्राम कनान नबस ता परमेश्वर सै उजा ल्यैस, “अफिग पि बं औंग। जी गजा हिदी जम्मा राजू दातू हंग नग वंश राज्यारी दंची हिदी कू अखतयार तायंग|” हंग अब्राम अति राज कू स्योंगसिस।

मलिकिसिदक मिन गै तिग युरासिरी निस जइ लच्यंग पूद परमेश्वर गै पुजारी निस। तिज्या अब्राम घीसिग लंग थोकसिग पिरास उ हंग अब्राम छिस। मलिकिसिदक सै अब्राम जा आशीर्वाद दास हंग ल्यैस, “लच्यंग पूद परमेश्वर जइ स्वर्ग हंग थंगजा गै रिथि अनि उ गजा आशीर्वाद दास|” हजू अब्राम सै घीसिग कज्जीत वाला जम्मा बथौ गै ची छु मलिकिसिदक जा कदास।

उलंग यन कल्च, इता री अब्राम हंग सारै गै खमीरी सिरी मुनिस। परमेश्वर सै अब्राम जा कथा स्युंगस हंग हजू वादा स्युंग्स कि उग तिग सिरी जन्म रायंग हंग जसौ तिम्भु कू कर्मा अनि अतनइ उग मत्त वंशज लेयंग। अब्राम सै परमेश्वर गै वादा कू विश्वास स्युंग्स। परमेश्वर सै ल्यैस कि अब्राम तिग बुद मि निस खस्युंग कि उस परमेश्वर गै वादा कू विश्वास स्युंग्स।

हंग परमेश्वर सै अब्राम जा तिग वाचा घिस। साधरण रूप कू, तिग वाचा निस्यी दलों गै गुंदा कू तिग दूसरो गै दंची लन स्युंगम समझौता लिन्ही। परमेश्वर सै अब्राम जा अति वाचा स्युंग्स हंग अब्राम लयक्त निस, हंग उ परमेश्वर जा यन्न तरसिग निस। परमेश्वर सै ल्यैस, “जी नग गोमरंग कू खची तिग सिरी दायंगनौ। जी नग वंशज जा हिदी कनान राजू दात|” हंग इता री अब्राम गै खमी सिरी मुनिस।