5. वादा गै सिरी

अब्राम जी सारै गै कनान नबम ग ची यन गै निंग्म, इता वास री उग खमि री संतान मुनिस। हिना दंची, अब्राम गै रीथिस्या सारै सै उजा ल्यैस, परमेश्वर सै इता वास जीजा संतान जनमाम कू लायक मुस्युंगसिद अनि हंग थन जी संतान जनमाम दंची मत्त स्यांगत अने, औंगयो, जिग ढांग्मि हाजिरा अतकू अनि। उजा री ढामी स्युंगयो कि उ जिग दंची तिग संतान उत्पन्न स्युंग तरयंग|

हिना दंची अब्राम सै हाजिरा जा ढामि कस्युंगस| हाजिरा गै तिग सिरी जरम रास, हंग अब्राम सै उग मिन इश्माएल तास| हंग सारै हाजिरा स रुसु स्युंग्स| हंग इश्माएल चेसम यन गै निस| परमेश्वर सै हजू अब्राम जा कथा स्युंग्स|

परमेश्वर सै ल्यैस, “जी अइलंग मत्त तरतै परमेश्वर ल्हीय। जी नगै जरु तिग वाचा घिसियंग|” हंग अब्राम सै थंग्जा कू करचिग ढोग दास। परमेश्वर सै अब्राम जा हिदि री ल्यैस, “गै मत्त जात गै बा ल्यंग्न। जी गजा हंग नग वंशज जा उसीग कोनमचिम बं ल्हैम दंची कनान राजू दायंग हंग जी राज्यारी दंची उसीग परमेश्वर ल्यंगये। नग अफिग चिम मौमाल गै जम्मा यूरासिरी गै खतना स्युंगयंगनि|”

नग रिथिस्या सारै तिग सिरी जन्म दायंग- उ वादा गै सिरी ल्यंग। उग मिन इसहाक तायंग। जी उग जरू अफिग वाचा बनाग तातू हंग उ तिग पूद जात बनयंग। जी इशमाइल जा री तिग पूद जात बनयंग, हंग जिग वाचा इसहाक गै जरू स्योंगसियंगन|” हंग परमेश्वर सै अब्राम गै मिन बदलग अब्राहम कस्युंग, जइ गै मतलब ल्है “मत्त मि गै बा”। परमेश्वर सै सारै गै मिन री बदलग सारा कस्युंग,जइ गै मतलब ल्है “जम्मा मि गै मूमा”।

अति ज्या अब्राहम सै अफिग मौमाल गै यूरासिरी गै खतना कस्युं। लगभग तिग यन गै निमफन, हंग अब्राहम सय यन ग उमर गै निस हंग सारा जैछांग ची यन ग निस, हंग सारा सै अब्राहम गै सिरी जा जन्म दास। जसौ परमेश्वर सै उजा ल्यैस उसीस उग मिन इसहाक तास।

हंग इसहाक ज्यूद कल्च ता परमेश्वर सै हिदी ल्यैग अब्राहम गै विश्वास गै छक्का खंस,“अफिग तिगलौता सिरी जा कोरसिन, हंग उजा जिग दंची बलि गै रूप कू पच्यंगस|” हजू री अब्राहम सै परमेश्वर गै कथा यन्स हंग अफिग सिरि जा बलि स्युंगम दंची तैयार कस्युंग।

हंग अब्राहम हंग इसहाक बलि चढ़ाम गै बं कू दिग निन्नस ता इसहाक सै रूस, “हे बा, इंग न्योरो बलि दंची स्यिन ता अनि, हंग बलि स्युंगम गै माला उलौ अनि?” अब्राहम सै जवाब दास, “हे जिग सिरि, परमेश्वर बलि स्युंगम दंची माला ग इंतजाम स्युंगयंग”।

हंग उसी बलि चढ़ाम गै बं कू टोनबस, ता अब्राहम सै इसहाक जा घीघ दंगसिन कू करचिस। उ अफिग सिरि जा पच्यंगम निस कि परमेश्वर सै ल्यैस, “रिनचिन! सिरि जा नुकसान मुस्युंगम! थन जीजा पत्तौ कचल्स कि गै जिग जेरक अनै खस्युंग कि गस अफिग तिगलौता सिरि जा री जीजा री च्याग मुतास।

न्योरोइ, अब्राहम सै तिग पूद माला गै तिन्स जइ झाडा कू कतोंगसिद निस। परमेश्वर सै इसहाक गै बदला कू बलि दंची तिग पूद माला गै इंतजाम कस्युंगस। अब्राहम सै खुशी- खुशी पूद माला गै बलि कचढ़ातिस।

हंग परमेश्वर सै अब्राहम जा ल्यैस, “खस्युंग कि गस जिग दंची जम्मा बथौ दाम दंची दुं निस, इता वास कि अपिग ति गलौता सिरि जा री, हिना दंची जी गजा आशीर्वाद दाम गै वादा स्युंगतो। नग वंशज तिम्भु गै कर्मा जा री मत्त ल्यंगन्न। खस्युंग कि गस जिग कथा रूंगसिस हिना दंची जी नग मौमाल गै चैन्तु संसार गै जम्मा मौमाल जा आशीर्वाद दायंग|”