14. सीर कू तू भटकैग निस

परमेश्वर सै इस्राएलियों मंग जा उ नियम जा बताम पूज्यूस| जइग उसीजा गिगतास उसिग वाचा गै कारण स्यरचीद स्युंगम अनि| हजू उस सीनै यैयर स लरी उसिग अगुवाई स्युंगस| उ उसिजा वादा गै राजू कू कोरग दिम चींथ निस| हिदी राजू कनान री लिगतास| परमेश्वर कस्सा गै खंबा कू उसिग लरी लरी दिस, हंग उसी उग निमफन निमफन दिस|

परमेश्वर सै अब्राहम, इसहाक हंग याकूब जा वाचा स्युंग निस कि उ वादा गै उ राजू उग संतान जा दायंग, हंग हिदी बकतर अतकू मत्तइ जाति स्योंगसिग निन्नस| उसी कनानी लिगतानन्स| हिदी कनानी मंग परमेश्वर गै आदर सम्मान मुस्युंगन्नस हंग उसीग आज्ञा जा मुरूंगन्नस| उसी झूठी सैमा गै पूजा स्युंगन्नस हंग मत्त स यद लन्न स्युंगन्नस|

परमेश्वर सै इस्राएलियों मंग जा ल्यैस, “हंग गनी अति वाचा गै राजू कू दिनी ता अतकू ची जम्मा कनानियों मंग स वानम स्योंगसिनी | उसिग जरू मेल मुस्युंगम हंग उसी ती ढामी मुस्युंगम| गनीजा उसिग जम्मा मूर्तियों जा पूरो दंची नाश स्युंगतीम| हंग गनी जिग आज्ञा मुरुंगसिम च्यांग,ता गनि जिग बदला उसिग सैमा गै भक्ति स्युंगयंगनी|”

हंग इस्राएली मंग कनान राजू कू टोनभन्नस, मूसा सै इस्राएल मंग गै जम्मा जाति कू खचि तिग तिग स्युंग चेन्नै यूरासिरी जा किलस| उस उसीजा दिग अति राजू गै छक्का कोरम गै दंची बतास कि अति हना राजू अनि| उसीजा अति कनानियों मंग गै छक्का री कोरम निस कि ओंग्यो कि उसी तरतै निन्नस ला मुतरतै निन्नस|

उसी चैनै यूरासिरी सै पुरोइ कनान राजू स रागइ निन्नस पीसा ज्या गै यात्रा स्युंगस हंग हजू उसी थोकसिग रन्नस| उसिस मि मंग जा ल्हैन्नस, “अति राजू मत्त मेलो अनि हंग ग्येरा मत्तइ कल्त अनि!” हंग ची भेदि मंग सै ल्यैस, “उसिग सोंग मत्त सारो अनि हंग उसी मंग बुंथ परत अनि! हंग इंग उसीजा घिसिने, ता पूरो रूप स उसी इंजा हरातीयंग हंग इंजा सतीयंग|”

छांटोइ कालेब हंग यहोशू हंग दूसरों निस्यी भेदि मंग सै ल्यैस, “हिदी साचो अनि कि कनान राजू ची मि बुंथ हंग बलशाली अनि, हंग पूरो रूप स इंग उसीजा हरातरयंगने! परमेश्वर इंग दंची घिसीयंग!”

हंग मि मंग सै कालेब हंग यहोशू गै कथा मुयंस| उसी मूसा हंग हारून जा रुसू पिरास हंग ल्यैस, “गनी इंजा हिदी जैरमना बं कू खोंग रैग रनिस? इंजा मिस्र कू ही स्योंगसिम चींथ निस| हंग इन अति राजू कू दिम अनि ता इन घिसीम बं कू सिचियंगनी, हंग कनान राजू गै मि मंग इंग रीथिस्या मंग हंग सन्मंग जा ढ़ग्मी बनायंग|”उसी मंग उसीजा थोकसिग मिस्र कू कोरम दंची तिग दूसरो प्रधान जा किलम चींथ निन्नस|

हंग उसी मि मंग सै हिना ल्यैस ता परमेश्वर मत्त रुसू पिराद निस| उ छिम वाला ढंगस कू रास हंग ल्यैस, “गनिस जिग दंची बलवा स्युंगस, हिना दंची गनी जम्मा जा हिदी सीर कूतु भटगैग नियंग| हर तिग मि जइ नस्सा यन किता अति च्यांग मत्त यन गै अनि उ सिचियंग हंग खज्यारी अति राजू कू दी मुतरयंग जइ जी गजा दाग तातू| तोंमि कालेब हंग यहोशू अतकू दी तरयंग|”

हंग मि मंग सै परमेश्वर जा हिना ल्यैम यंस,ता उसी दु;खु लीच्च खस्युंग कि उसिस पाप स्युंगस| हिना दंची उसिस कनान राजू गै मि मंग जा घिसीम दंची फैसला कस्युंग| मूसा सै उसीजा मुदिम दंची चैतावनी दास खस्युंग कि परमेश्वर उसी ती जरू मुदीयंग, हंग उसिस उसिग मुयंस|

परमेश्वर हिदी घिसीम कू उग जरू मुदिस,हिना दंची कनानियों मंग सै उसीजा हरातिस हंग उसी मंग स मत्त मि जा पचयंगन्नस| हंग इस्राएली मंग कनान राजू खचि थोकसिग पिरन्नस निग्म ची पीसा यन वास, उसी सीर कू ती झिर भटगयंगन्न|

इस्राएली मि मंग चैन्तू सीर कू भटकैम गै पीसा यन गै दौरान,परमेश्वर सै उसिग चींथ बथो जा पूरो स्युंगस| उस उसीजा स्वर्ग खचि “मन्ना” ल्हैम वाला कूटू दास| उस बटेरों गै यम्बा री [जइ कि गुन्दा ची आकार गै निप्या ल्हैग निस ] उसिग खास्या कू लायन्नस ताकि उसी निद कू जाम दंची स्या लयंग| अति पूरो बकतर,परमेश्वर सै उसिग खसै पसै हंग पोला जा पैम स बचाग तास|

इता वास कि परमेश्वर सै उसिग तुगम दंची चमत्कारी रूप स बियर कू खचि ती व्होंक रास| हंग हिदी जम्मा गै निमफन, इस्राएली मि मंग सै परमेश्वर गै विरुद्ध हंग मूसा गै विरुद्ध हासीनिस हंग मत्त फाग अनि हंग हजू री परमेश्वर विश्वासयोग्य निस| उस जइ वादा स्युंग निस कि अति अब्राहम, इसहाक, हंग याकूब गै संतान गै दंची स्युंगयंग उस अति स्युंगस|

तिग बकतर उसी मंग जा ती मुनिस, परमेश्वर सै मूसा जा ल्यैस, “ बियर जा कथा फाय, हंग उजा ती व्होंग रायंग| हंग मूसा सै बियर जा कथा मुस्युंगस| हिदी च्यंग री उस दुली स बियर कू निच्चू लूब्स| हिदी रीति स उस परमेश्वर जा हेला स्युंगस| जम्मा गै तुग्म दंची बियर खचि ती ता कव्होंस, हंग परमेश्वर मूसा स रुसू पिराद निस| उस ल्यैस, “खस्युंग कि गस हिना स्युंग अनि, हिना दंची ग्यै वादा गै सोंग कू दी मुतरयंग|”

हंग इस्राएली मंग पीसा यन वास सीर कू भटगेमग पुझूस, हंग जइमिसै परमेश्वर गै विरुद्ध बलवा स्युंगस उसी जम्मा पझयंगन्नस| हंग परमेश्वर उसी मंग जा हजू स अति वादा गै सोंग गै सिवाने वास कोर दिस| थन मूसा मत्त स्यांगत कल्च, हिना दंची परमेश्वर सै मि मंग गै अगुवाई स्युंम दंची उग सार स्युंगम दंची यहोशू जा किलस| परमेश्वर सै मूसा जा हिदी वादा री स्युंग निस कि तीज्या उसी मि मंग गै न्योरो मूसा नारूकत तिग भविष्य बताद मि थिरयंग|

हंग परमेश्वर सै मूसा जा तिग यैयर गै दंगयर कू दिदंची ल्यैस ताकि उ वादा गै सोंग जा ओंग तियंग| मूसा सै अति वादा गै सोंग जा तिन्स हंग परमेश्वर सै उजा अतकू दिम गै आज्ञा मुदास| हंग मूसा पझयंग, हंग इस्राएलियों सै सुमसा ज्या वास शोक मना| यहोशू उसिग नुद प्रधान कबनस| यहोशू तिग बुद प्रधान निस खस्युंग कि उस परमेश्वर जा विश्वास स्युंगस हंग उग कथा जा रुंगस|