13. इस्राएल ची मि मंग गै जरू परमेश्वर गै वाचा

इस्राएली मंग जा मंग्द समुद्र स तपो कोरग दिम गै निमफन, परमेश्वर उसीजा सीर खचि लिग सीनै लिह्द वाला येयर गै चैन्तु कोरग दिस| हिदी उहि येयर निस जइ बं कू मूसा सै लूत वाला झाड़ा कतिन्स| उसी मंग सै अति येयर गै छंकू आफिग ढंग्स तैयार स्युंगस|

परमेश्वर सै मूसा जा हंग इस्राएल गै जम्मा मि मंग जा ल्यैस, गनीजा ज्या-ज्यारी जिग कथा रुंगसिम परयंग हंग जइ वाचा जी गनिग जरू स्युंगतातू उजा बनाग ताम| हंग गनी हिना स्युंगम च्यंग ता गनी जिग इनाम लचयंग पूद सम्पति, परमेश्वर गै पुजारी मंग गै राज्य हंग तिग पवित्र जाति स्योंगसियंग्नी|”

परमेश्वर चैन्तू उसिग न्योरो राम दंची मि मंग सै सुम ज्या वास आफि जा तैयार स्युंगस| हंग परमेश्वर सीनै यैयर कू खचि युकू रास| हंग उ रास ता रूम्म रास, मिल्डोकच, खू रास, हंग धोतार गै लच्यंग पूद हार लिच्च| हंग मूसा आफि येरतो यैयर कू कचढ़स|

हंग परमेश्वर सै मि मंग गै जरू तिग वाचा घिस| उस ल्यैस, “जी नग परमेश्वर, यहोवा ल्हीये| जी ल्हिये जइस गनिजा मिस्र गै गुलामी ल्हैम स छुड़ान्नस| खमी दूसरो सैमा गै भक्ति मुस्युंगम|’’

“मूर्तियाँ मु बनाम हंग उसिग भक्ति मुस्युंम, खस्युंग कि जी यहोवा, गनिग तिगमात्र परमेश्वर ल्हिये| यद रीति स जिग मिन मूटोमो| सब्त गै ज्या ची शुद्ध मानम दंची ची ताम| दुसरो शब्द कू, टुगु ज्या ची आफिग जम्मा लन्न स्युंगम, निसै ज्या ची गनिग दंची आराम स्युंग्म हंग जीजा ची स्युंग्म गै ज्या अनि|’’

“आफिग मुमा हंग बूबा गै आदर स्युंग्म| हत्या मुस्युंगमो| यद लन्न मुस्युंगम| मु खुमो| झूठी मु फाम| आफिग पड़ोसी गै खुथिस्या,उसिग चिमजा, किता उसिग खरी बथो आंगम गै सुचा मुस्युंगम|’’

हंग परमेश्वर सै हिदी ची आज्ञाओ जा ऊँग गै निस्यी पटाल कू ऋग मूसा जा कददा| परमेश्वर सै स्यरचिद स्युंगम दंची मि मंग जा यकरो मत्त व्यवस्थाएँ दास| हंग उसिस हिदी व्यवस्थाओ गै स्यरचिद स्युंग्म च्यंग ता परमेश्वर सै उसी मंग जा आशीर्वाद दाम हंग उसिग सुरक्षा स्युंग्म गै वादा स्युंगस| हंग उस ल्यैस कि हंग उसिस हिदीग स्यरचिद मुस्युंगम च्यंग उ उसीजा सजा दायंग|

परमेश्वर सै इस्राएली मंग स तिग पूद ढाँगस बनाम दंची रि ल्यैस-छिम वाला ढाँगस| उस उसीजा ठीक-ठीक बतास कि हिदी ढाँगस जा हना बनाम अनि, हंग उग भीतरु खै बथो जा ताम अनि| उस उसीजा अति ढाँगस जा निस्यी चीकू कू यकरो स्युंग्म दंची तिग पूद पर्दा जा बनाम दंची री ल्यैस| परमेश्वर अति पर्दा गै निमफन वाला चीकू कू रायंग हंग अतकू स्योंगसियंग| जइ बं कू परमेश्वर निस अति चीकू दिम गै फिनस्यद तिगई यहूदी पूद पुजारी जा निस|

उसी मंग जा अति छीस वाला ढाँगस गै न्योरो तिग वेदी जा बनाम परयंग| खमी री जइ परमेश्वर गै व्यवस्था गै स्यरचीन मुस्युंगम च्यंग उ अति वेदी कू तिग जानवर रयैग रास| हंग यहूदी पुजारी उजा बलि स्युंगयंग हंग वेदी कू परमेश्वर गै दंची बलि गै रूप कू रूयंग| परमेश्वर सै ल्यैस कि अति जानवर गै सी अति मि गै पाप जा च्यायंग| हिदी रीति स,थन परमेश्वर अति पाप जा मुतिंगयंग | उ मि परमेश्वर गै मी कू “रहाद” ल्हैयंग| परमेश्वर सै मूसा गै पी हारून जा हंग हारून गै संतान जा आफिग पुजारी ल्हैम दंची किलस|

परमेश्वर सै उसी मि मंग जा जइ नियम दास उसी उग स्यरचिद स्युंग्म दंची रुंगसिस| उसी तिगई परमेश्वर गै मि मंग ल्हैम गै हंग तिगई उग भक्ति स्युंग्म दंची रुंगसिस|

उलंग ज्या वास, मूसा सीनै यैयर गै दंगयर कू स्योंगसिस| उ परमेश्वर जरू फाग निस| हंग मि उसिग न्योरो थोकसिग राम दंची रिंचिग रिंचिग पुरयंस| हिना दंची उसी हारून गै न्योरो झांग रयग रास हंग उजा तिग मूर्ति बनाम दंची ल्यैस ताकि उसी परमेश्वर गै बदला कू उग आदर स्युंग तरयंगनी| हिदी रीति स उसीस झेरमना रूप स परमेश्वर गै विरुद्ध पाप स्युंगस|

हारून सै लुक्च गै रूप कू झांग गै तिग मूर्ति बनास| उसी मंग सै अति मूर्ति गै पूजा स्युंगम शुरू कस्युंग हंग उग दंची बलि चढास! उसिग पाप गै कारण स परमेश्वर उसीजा मत्त रुसू पिराद निस| उ उसीजा नाश स्युंगम चींथ निस| हंग मूसा सै उसीजा मु सैम गै परमेश्वर जा होस्यी स्युंगस| परमेश्वर सै उग होस्यी जा यन्स हंग उसीजा नाश मुस्युंगस|

आखिरकार मूसा सिनै यैयर स यूकू पिरास| उ अति निस्यी ऊँग चूमग पिरसीद निस जइ ऊँग कू परमेश्वर सै ची आज्ञाओ जा करिसिद निस हंग उस अति मूर्ति जा तिन्स| उ हिलंग रुसू पिराद निस कि उस अति सयांग कूछयाकतीस|

हजू मूसा सै अति मूर्ति जा हिग लाग उग भूसु बनातीस, हंग अति भूसु जा ती कू छुग उसी मंग जा उ ती तुग्म दंची कदास| परमेश्वर सै उसी मंग जा तिग न्येला थिरस हंग उसी मंग जा खचि मत्त मि पझयंगन्नस|

जइ सयांग जा मूसा सै कूछयाकतीस उग बं कोरम दंची मूसा सै ची आज्ञाओ गै ऊँग गै नुद सयांग जा बनास| हंग उ हजू यैयर कू पिदिस हंग प्रार्थना स्युंगस कि परमेश्वर उसी मंग जा माफ स्युंगती| परमेश्वर सै मूसा गै यन्स हंग उसीजा माफ कस्युंग| नुद सयांग कू ची आज्ञाओ जा कोरग मूसा यैयर खचि यूकू पिरास| हंग परमेश्वर सै सिनै यैयर स कोरग वादा गै राजू वास इस्राएलीयो गै अगवाई स्युंगस|