21. परमेश्वर मसीह गै वादा स्युंगता|

हंग परमेश्वर सै दुनिया जा बनास, उजा पत्तो निस कि उजा निग्म खज्या निछ मसीह जा थिरम परयंग| उस आदम हंग हव्वा जा वादा स्युंगस कि उ हिना स्युंगयंग| उस ल्यैस कि हव्वा जा तिग संतान जन्म रायंग जइ नबू गै पूस्या कितियंग| जइ नबू सै हव्वा जा धोका दास उ साचो सीना निस| परमेश्वर गै अर्थ निस कि मसीह पूरोइ सीना जा हरातीस|

परमेश्वर सै अब्राहम जा वादा स्युंग तास कि उग चैन्तु दुनिया गै जम्मा जाति आशीर्वाद तियंगन्न| परमेश्वर निग्म खइ बकतर मसीह जा थिरम गै चैन्तु हिदि वादा जा पूरो स्युंगयंग| उ मसीह दुनिया गै जम्मा तिग जाति ची मि मंग जा उसिग पाप स छुटायंग |

परमेश्वर सै मूसा जा वादा स्युंग निस कि उ मूसा नारुक्त तिग गार भविष्य बताद मि जा थिरयंग| हिदि भविष्य बताद मि मसीह नियंग| हिदि रीति स, परमेश्वर सै हजू वादा स्युंगस कि उ मसीह जा थिरयंग|

परमेश्वर सै राजा दाऊद जा वादा स्युंगस कि उग तिग वंशज मसीह नियंग| हंग परमेश्वर गै मि मंग जा राज्या री दंची राज स्युंगयंग|

परमेश्वर सै यिर्मयाह भविष्य बताद मि जा कथा स्युंगस हंग ल्यैस कि तीज्या उ तिग नूद वादा घिसियंग| उ नूद वादा इस्राएल गै जरू सीनै कू घिघ तान्नस यीद वादा नारुक्त मूल्हैयंग| हंग मि मंग ती जरू उ आफि ग नुद वादा जा घिसियंग, ता उ उसिजा आफिग कोनमचिम रूप कू तियंग| हर तिग मि उजा प्रेम तायंग हंग उग व्यवस्था गै स्यरचिद स्युंगम गै इच्छा तायंग| परमेश्वर सै ल्यैस कि हिदि उग व्यवस्था गै उसिग मन कू रिमना रुक्त अनि| उ उसिग मि नियंगन्न, हंग परमेश्वर उसिग पापों जा माफ स्युंगयंग| उ मसीह नियंग जइ उसिग जरू अति नुद वादा जा गियंग|

परमेश्वर गै भविष्य बताद मि मंग सै हिदि री ल्यैस कि मसीह तिग भविष्य बताद मि नियंग| तिग भविष्य बताद उ मि अनि जइ परमेश्वर गै कथा यन्स हंग हजू मि मंग जा परमेश्वर गै फिन गै ऐलान कस्युंगस जइ जा थिरम दंची परमेश्वर सै वादा स्युंगस उ मसीह तिग सिद्ध भविष्य बताद मि नियंग| हजू री उ मसीह परमेश्वर गै फिन बुदस ययंग, हंग उ मि मंग जा अति फिन बुदस रिसिम|

इस्राएली यहूदी पुजारी मंग सै मि मंग दंची परमेश्वर गै लरी बलिदान चढ़ागइ तास| हिदि बलिदान मि मंग गै पापों गै दंची उसिजा परमेश्वर चैन्तु सजा दाम बं कू कचढ़ान्नस| पूद यहूदी पुजारी मंग सै मि मंग गै दंची प्रार्थना री स्युंगन्नस| हंग उ मसीह सिद्ध पूद यहूदी पुजारी नियंग जइ परमेश्वर जा दाम दंची तिग सिद्ध बलि गै रूप कू अपिजा चढ़ातियंग| मतलब हिदि कि उ खज्या पाप मुस्युंगयंग, हंग उ आपिजा बलि ल्हैम दंची दायंग ता दुनिया गै खमीरी गार बलि दाम गै जरूरत मुनियंग|

मि मंग गै यंबा कू राजा हंग प्रधान राज स्युंगन्नस, हंग खज्या खज्या उसी यद स्युंगतान्न| राजा दाऊद सै तिगइ इस्राएलियों मंग जा राज स्युंगस, हंग राजा दाऊद गै संतान मसीह पूरो दुनिया कू राज स्युंगयंग, हंग उ राज्या री दंची राज स्युंगयंग| हिदि गै च्यंग, उ राज्या री न्याय पूरो रीति स स्युंगयंग, हंग सांगद फैसला कोरयंग|

परमेश्वर गै भविष्य बताद मि सै मसीह गै बारे कू मत्त कथा जा ल्यैस| रक्त दंची, मलाकी सै ल्यैस कि मसीह गै राम्ह गै लरी तिग गार भविष्य बताद मि रायंग| उ भविष्य बताद मि मत्त खास नियंग| हिदि च्यंग, यशायाह भविष्य बताद मि सै रीस कि मसीह तिग कुँआरी चमै स जन्म कोरयंग| हंग मीका भविष्य बताद मि सै ल्यैस कि मसीह बैतलहम सोंग कू जन्म कोरयंग|

यशायाह भविष्य बताद मि सै ल्यैस कि मसीह गलील गै सोंग कू स्योंगसियंग| जइ मंग मत्त दु:खू अनि मसीह उसिजा शांति दायंग| उ कैदियों जा री आजाद स्युंगयंग| मसीह कांगत मंग जा हंग जइ यन्न मूतरद, ओंग मूतिन्द ,फा मूतरद, किता यन्सी मूतरद, उसीजा री बुद स्युंगयंग|

यशायाह भविष्य बताद मि सै हिदि री ल्यैस कि मि मसीह जा रुसू स्युंगयंग हंग उजा स्वीकार स्युंग दंची मना स्युंगयंग| गार भविष्य बताद मि मंग सै ल्यैस कि मसीह ग तिग साथो उग खिलाफ रचियंग| जकर्याह भविष्य बताद मि सै ल्यैस कि उग हिदि साथो हिना स्युंगम दंची गार मि मंग स हेली गै सुम सिक्का कोरयंग| हिदि च्यांगरी, दूमा भविष्य बताद मि मंग सै ल्यैस कि मि मसीह जा पच्यंगन्न, हंग हिदि कि उसिग खसै पसै गै दंची जुआ लाँगयंगन्न|

भविष्य बताद मि सै हिदि री बतास कि मसीह हना सिचियंग| यशायाह भविष्यवानी फाकस कि मि मंग मसीह जा खुति थूबयंगन्न उसिग बट्टा उड़ायंगन्न, हंग उसिजा लूब्यंगन्न| उसी उजा ढोंगठों स्युंगयंग हंग उ मत्त कंगत हंग मत्त दु:खु कू पझयंग, खस्युंग कि उस खरी यद मुस्युंग नियंग|

भविष्य बताद मि मंग सै हिदि री बतास कि मसीह पाप मुस्युंगयंग |उ सिद्ध नियंग| हंग उ हिना दंची सिचियंग परमेश्वर उजा गार मि मंग गै कारण सजा दायंग| उग सिचिम स मि मंग परमेश्वर गै जरू मेल स्युंगम कू तरत नियंग| हिना दंची परमेश्वर चींथ निस कि मसीह सिचिम|

भविष्य बताद मि सै हिदि री बतास कि परमेश्वर मसीह जा सीचीद कू खचि टागंद स्युंगयंग| हिना बताग अनि कि हिदि जम्मा नूद वाचा जा गिम ग परमेश्वर गै, योजना निस,ताकि उसी मि मंग जा बचा तरन्नस जइ मि सै उग विरुद्ध पाप स्युंगन्नस|

परमेश्वर सै भविष्य बताद मि मंग जा मसीह गै बारे कू मत्त कथा स्युंगस, हंग मसीह उसी भविष्य बताद मि मंग कू खचि खमी ग री जीवन काल कू मुरास| हिदि भविष्यवानी कदासिद गै पीसय स यंबा यन गै निग्म ठीक बकतर परमेश्वर मसीह जा हिदि दुनिया कू थिरयंग|