20. इस्राइल गै मि मंग ग गुलामी कू दिम हंग थोकसिग राम |

इस्राएल गै राज्य हंग यहूदा गै राज्य निमी सै परमेश्वर गै विरुद्ध पाप स्युंगस| उसिस अति वाचा जा कुछ्याकतिस जइ परमेश्वर सै उग जरू सीनै कू घिघतान्नस| परमेश्वर सै उसीजा पछताव स्युंगम हंग हजू स उसिग भक्ति स्युंगम दंची चेतावनी दाम दंची आफिग भविष्य बताद मि जा थिरस, हंग उसिस उग कथा जा मानम स मना कस्युंगस|

हिना दंची परमेश्वर सै उसिग बयरी मंग जा उजा नाश स्युंगम कू सफल स्युंगम गै चैन्तु निस्यी राज्यों जा सजा दान्नस| अश्शूर तिग गार राजू निस जइ मत्त तरत कल्त निस| उसी दुसरो राजू गै चैन्तु मत्त यद री निन्नस| उसिस राग इस्राएल गै राज्य जा नाश कस्युंगस| अश्शूरियों सै राग इस्राएल गै राज्य कू मत्त मि मंग पच्यंगन्नस,खइ चिन्स अति कलुटस, हंग राजू गै उलंग छू जा चिनतिस |

अश्शूरियों सै जम्मा प्रधानों स्यांगमी मि मंग, हंग हिना मि मंग जा जइ अकरो बथो स्युंगतरन्नस तिग जरू थुमगतान्नस हंग उसी उसीजा अश्शूर राजू कोरग दिन्नस| इस्राएल कू दूमा गरीब इस्राएली ही होसीन्नस |

हजू अश्शूरी ची मि मंग अति राजू कू स्योंगसिम दंची विदेशियों मंग जा रचिग रास| उसी विदेशियों मंग सै उसी सोंग हजू बनास| जइ इस्राएली अतकू होसीन्नस उजा उसिस ढामी स्युंगस हिदि मंग गै संतान सामरी ल्होन्नस |

यहूदा गै राज्य गै मि मंग सै तिन्स कि हना परमेश्वर सै उजा विश्वास मुस्युंगस हंग उसिग कथा मुयम्म गै कारण इस्राएल गै राजू ची मि मंग जा सजा दान्न्स | हंग हजू री उसिस कनानियों गै सेमाओं गै मूर्तियों गै पूजा स्युंगस| परमेश्वर सै उसीजा चेतावनी दाम दंची भविष्य बताद मि जा थिरस, हंग उसिस यम्म सै मना कस्युंग|

लगभग सय यन गै निग्म अश्शूरियों सै इस्राएल गै राजू जा नाश कस्युंग| परमेश्वर सै बेबीलोन गै राजा, नबूकदनेस्सर जा यहूदा गै राजू कू घिसिम दंची थिरस| बेबीलोन तिग तरत राजू निस| यहूदा गै राजा नबूकदनेस्सर गै गुलाम बनम हंग रा यन उजा मत्त धन गै पूरो स्युंगम दंची कथा करुंगस|

हंग दूमा यन गै निग्म, यहूदा गै राजा सै बेबीलोन गै विरुद्ध बलवा स्युंगस| हिना दंची बैबीलोनियों मंग सै थोकसिग राग यहूदा गै राजू कू घिसिस| उसिस यरूशलेम सोंग कू कब्जा कस्युंगस, मंदिर जा नाश कस्युंगतिस, हंग सोंग ची मंदिर गै बथो आंग पिकोरन्नस |

बलवा स्युंगम गै कारण यहूदा गै राजा जा सजा दाम दंची, नबूकदनेस्सर गै सिपाही मंग सै राजा गै सिरी जा उग नोकु पच्यंगन्नस हंग हजू उजा काना कस्युंगतिस| हिदि गै निग्म, उसी राजा जा पिकोरस ताकि उ बेबीलोन गै जेलखाने कू पझयंग|

नबूकदनेस्सर हंग उग सेना यहूदा गै राज्य गै जम्मा मि मंग जा बेबीलोन पिकोरस, तोंग्मी बुदस गरीब मि मंग जा निमफन होके ताकि उसी खेती कू लन स्युंगम दंची होतिन्नस ज्या गै हिदि काल जा बंधुआई ल्होन्नस जइ कू परमेश्वर गै मि मंग जा वादा गै राजू खचि दिम दंची गला रा फिन्नस|

बुद स परमेश्वर सै आफिग मि मंग जा उसिग पाप दंची बंधुआई कू कोरम दंची सजा दान्नस, हंग उ उसीजा किता आफिग वादाओ जा मुलोसिद निस| परमेश्वर सै आफिग मि मंग जा ओंग्म दंची कथा स्युंग तास हंग आफिग भविष्य ओंगद मि गै चैन्तु उसीजा कथा स्युंग तास| उस वादा स्युंगस कि निसैज्यांगछी यन गै निग्म, उसी हजू स वादा गै राजू कू थोकसीन्नस |

निसैज्यांग ची यन गै निग्म, फारस गै राजा कुस्रू सै बेबीलोन जा कहरातिस, हिना दंची बेबीलोन गै साम्राज्य गै बदला फारस गै साम्राज्य सै उलंग राजू कू राज स्युंगस| इस्राएली मंग थन यहूदी ल्होन्नस| उसी मंग जा मत्त मि सै आफिग पूरो जीवन बेबीलोन कू बितान्नस| तिगइ मत्त चीथ सयांगत यहूदियों जा ही यहूदा राजू ची निस|

फारसी मंग मत्त तरत निन्नस, हंग उसिस आफिग कजीत मि मंग जा स्योकंगत स्युंगस| फारसी मि मंग गै राजा बनम गै दूमा ज्या गै निग्म, कुस्रू सै तिग लैसिद दास कि खमी री यहूदी जइ यहूदा जा थोकसिम चींथ निस, उ फारस कू खचि थोकसिग यहूदा जा दि तरन| इता वास कि उस उसिजा मंदिर जा हजू बनाम दंची रुपया री दास| हिना दंची निसैज्यांग ची यन गै निमफन,यहूदियों ग चीथ मि मंग यरुशलेम सोंग कू थोकसीग पिरास |

हंग उसी मंग यरूशलेम नभस ता उसिस मंदिर जा हंग सोंग गै पी बं गै बंफल जा हजू बनास| फारसी मंग थन री उसी जा राज स्युंगन्नस हंग तिच्चू हजू स यहूदी लोग उसी वादा गै राजू कू स्योंगसिग निन्नस| हंग मंदिर कू भक्ति स्युंगतान्नस|