19. परमेश्वर गै चैन्तु भविष्य बताद मि जा थिरम

परमेश्वर राज्या री इस्राएलियों गै नीद कू भविष्य बताद मि जा थिरग तान्नस| भविष्य बताद मि परमेश्वर स फिन्न यंग निन्नस| हंग हजू उजा मि मंग जा बताग निन्नस| " हंग अहाब इस्राएल राज्य कू राजा निस ता अति ज्या एलिय्याह भविष्य बताद मि निस| अहाब तिग यद मि निस| उस झूठी बाल सैमा गै पूजा स्युंगम दंची मि मंग जा मजबूर स्युंग निस| हिना दंची एलीय्याह सै अहाब जा ल्यैस कि परमेश्वर उसी मंग जा सजा दाम दंची दिन्नस| उस उजा ल्यैस, “ जइ ज्या वास जी हजू नम राम दंची मु ल्हैयंग अति ज्या वास इस्राएल गै राज्य कू नम री मुरायंग हंग ओस री मुभुरयंग|” हिदि कथा सै अहाब जा हिलंग रुसू पिराद कि उस एलीय्याह जा सत्तीम गै फैसला कस्युंग| "

हिना दंची परमेश्वर सै एलिय्याह जा ल्यैस कि उ सीर कू दिग अहाब जा च्यासीस| एलीय्याह सीर कू अति ती वंत बं कू दिस जइ बं दिम दंची परमेश्वर सै उजा बतास| ज्या ज्या री बंखर हंग ज्या ज्या री मूंछ, निप्या एलीय्याह गै दंची कूटू हंग स्या रयग रन्नस| हिदि पूरो ज्या, अहाब हंग उग सेना एलिय्याह जा मासिग निस, हंग उसी उजा मासि मुतरस|

नम मुराम गै लरी ज्या गै निमफन उ ती कछर| हिना दंची एलिय्याह न्योरोइ गै तिग सोंग कू पिदिस अति सोंग कू तिग राड़ीस्या निस जइग तिग सिरी निस| उसिग न्योरो जामफुल लगभग पूजयुस खस्युंग कि अतकू खरी मूलित्तनिस| हंग हजू री, अति खुतिस्या सै एलिय्याह गै खबर स्युंगस, हिना दंची परमेश्वर सै उग हंग उग सिरी गै चींथ बथो जा पूरो स्युंगस, हिदि दंची उग आटो ग भंडु हंग उग जाम मरती गै कुप्पी खज्या खाली मुलिच्च | अति पूरो अकाल गै ज्या उग निद कू जाम फुल्ल निस | एलिय्याह सुम यन वास अतकू निस |

साढ़े सुम यन गै निमफन, परमेश्वर सै एलिय्याह जा ल्यैस कि उ हजू री नम रायंग| उस एलिय्याह जा थोकसिग इस्राएल गै राजू कू दिग अहाब जा कथा स्युंगम दंची ल्यैस| हिना दंची एलिय्याह अहाब गै न्योरो दिस| हंग अहाब सै उजा तिन्स ता उस ल्यैस, “गइ लिनो जिजा गला रा फिन्नस वाला!”एलिय्याह सै जबाब दास,“ गला रा फिन्नस वाला ता गइ लिनो! गस यहोवा जा होतिनस| उइ साचो परमेश्वर ल्है, हंग गै बाल गै गुनू स्युंग तातन| थन गजा इस्राएल राजू गै जम्मा मि मंग जा कर्मेल यैयर कू रकराम |”

हिना दंची जम्मा मि कर्मेल यैयर कू दिस| उसी यूरासिरी री रन्नस जइ ल्यैन्नस कि उसी बाल गै फिन्न फाक निन्नस| हिदि बाल गै भविष्य बताद मि निन्नस| उसी जम्मा पीसय नासा निन्नस| एलिय्याह सै मि मंग जा ल्यैस, “उलंग वास गनी आफिग चीस्यो जा फिराग तायंगन? हंग यहोवा परमेश्वर ल्हैम च्यंग ता उग गुनू स्युंगनी! हंग बाल परमेश्वर ल्हैम च्यंग ता उग गुनू स्युंगनि !”

हंग एलिय्याह सै बाल गै भविष्य बताद मि मंग जा ल्यैस , “ तिग लिंगे जा बलि स्युंग उग स्या जा बलिदान ल्हैम च्यंग तिग वेदी जा तायो, हंग मैं मुचिम| उग निग्म जी री हिनाइ स्युंगयंग, हंग तिग यकरो वेदी जा जी अति स्या तायंग| हंग परमेश्वर वेदी जा मैं चांगस ता गनीजा पत्तो चलयंग कि उ साचो परमेश्वर अनि|” हंग बाल गै भविष्य बताद मि सै तिग बलि जा तैयार कस्युंग हंग मैं मुचिस|

हंग बाल गै भविष्य बताद मि सै बाल जा प्रार्थना स्युंगस, “ हे बाल इंग रुगसिन!” पूरो ज्या उसिस प्रार्थना स्युंगस हंग यरछ हंग हिदा वास कि आफिजा खुइ स चेग तास, हंग बाल सै जबाब मुदास, हंग उस मैं मुचांगस|

बाल सेमा गै भविष्य बताद मि सै बाल जा प्रार्थना स्युंगम ग लगभग तीज्या पूरो कलगान्नस| हिना दंची उसिस प्रार्थना स्युंगम बंद कस्युंग| हंग एलिय्याह सै दुसरो लिंगे गै स्या जा परमेश्वर गै वेदी जा कतातिस| उग निग्म, उस मि मंग जा ती गै पूद भन्डू जा अति बलिदान कू अति वास पोंगतिम दंची ल्यैस अति वास कि स्या,स्यिन, हंग इता वास कि वेदी गै खास्या कुतू गै पूरो बं थित मुल्है वास ती पोंगताम|

हंग एलिय्याह सै प्रार्थना स्युंगस, “हे यहोवा ,अब्राहम, इसहाक, हंग याकूब गै परमेश्वर, इंजा होंय्यो कि गनी इस्राएल गै परमेश्वर ल्है हंग हिदि कि जी नग सेवक ल्हिय | जीजा जबाब दायो जइ स कि हिदि मंग जा पत्तो चलयंग कि गनीइ साचो परमेश्वर ल्है|”

छाटोई, तिम्भू स मैं बुरस हंग उस स्या, स्यिन, बियर, सा हंग हिदि वास कि वेदी गै खास्या कुतू ती री पुझिन| हंग मि मंग सै हिदि तिन्स, उसी बं कू करचिस हंग फानी, “यहोवा ही परमेश्वर अनि! यहोवा ही परमेश्वर अनि!”

हंग एलिय्याह सै ल्यैस, “ बाल गै तिग री भविष्य बताद मि बचगै मुदिम निस!” हिना दंची मि मंग सै बाल गै भविष्य बताद मि मंग जा कचुम्मस हंग उसीजा अतकू खचि यकरो कोरग दिन्नस हंग उसीजा पच्यंगन्नस|

हंग एलिय्याह सै अहाब राजा जा ल्यैस, “छाटो आफिग चिमजा फोंग दिनी, खस्युंग कि नम राद अनि छाटोइ कस्सा मत्त पिरास, हंग मत्त नम राम शुरू कल्च| यहोवा अति छरत पुझयूग निस| हिदीस पत्तो कचल कि यहोवा ही साचो परमेश्वर अनि|

हंग एलिय्याह सै आफिग लन पुझूस, ता परमेश्वर सै एलीशा मिन गै तिग यूरासिरी जा आफिग भविष्य बताद मि ल्हैम दंची किलस| परमेश्वर सै एलीशा गै चैन्तू खचि मत्त स चमत्कार कस्युंग| तिग चमत्कार नामान गै जरू लिच्च| उ तिग बयरी गै सेना गै सरदार निस, हंग उजा को गै तिग यद रोग कलीच्च| नामान सै एलीशा गै बारे कू यंग निस, हिना दंची उ एलीशा गै निद कू रास हंग उस उजा बुद स्युंगम दंची होस्यी स्युंगस| एलीशा सै नामान जा ल्यैस कि दिग यरदन यंगती गै ती कू निच्चू च्यागसिम |

नामान जा रुसू पिरास| उस हिना स्युंगम स मना कस्युंग, खस्युंग कि उजा हिदि लन उजा बुद मुलगैस | हंग निग्म उस आफिग मन कबदलस हंग दिग यरदन यंगती गै ती कू निच्चू च्यागसिस |हंग आखरी चू उ ती स छंगपंग वन्स ता परमेश्वर सै उजा बुद कस्युंग |

परमेश्वर सै इस्राएल गै मि मंग गै न्योरो गार मत्त स भविष्य बताद मि जा थिरस| उसी जम्मा सै मि मंग जा मूर्तियों गै पूजा स्युंगम बंद स्युंगम दंची ल्यैस| हिदि गै बदला, उसीजा निमी गै जरू बुद व्यवहार स्युंगम चिंखन हंग निमी जा स्योकांगम चिंखन| उसी भविष्य बताद मि सै मि मंग जा चेतावनी दास कि उसीजा यद लन जा स्युंगम बंद स्युंगती हंग हीदि गै बदला परमेश्वर गै कथा मानम परयंग| उसी मंग सै हिना मुस्युंगम च्यंग ता परमेश्वर उसिजा दोषी मानग उसिग न्याय स्युंयंग, हंग उसीजा सजा दायंग|

मत्त बक्तर, उसी मि मंग सै परमेश्वर गै आज्ञा मुस्यरचिस| राज्यारी उसिस भविष्य बताद मि मंग गै जरू यद व्यवहार स्युंगस हंग इता वास कि खज्या खज्या उसिजा पच्यंगन्नस| तीच्चू, उसिस यिर्मयाह भविष्य बताद मि जा छरत कुआ कू चांगतिन्न्स हंग उजा अतकू सिचिम दंची होतिन्नस| उ कुआ गै थंगजा कू थित बं कू कडूबस हंग राजा जा उजा स्योकांगस हंग उस आफिग सिपाही मंग जा फिनस्यद दास कि यिर्मयाह गै सिचिम गै लरी उजा कुआ कू खचि खंग पिरन्नस |

भविष्य बताद मि सै परमेश्वर गै चैन्तु खचि फागइ तास उलंग री मि मंग सै उजा रुसू स्युंगन्नस| उसिस मि मंग जा चेतावनी दास कि हिदि च्यंग री उसिस पछताव मुस्युंगम च्यंग ता परमेश्वर उसीजा नाश स्युंगयंग उसिस मि मंग जा हिदि री हैक्का स्युंगयो कि परमेश्वर सै उसिग न्योरो मसीह जा थिरम गै वादा स्युंगस |