18. इस्राएल राज्य ग यकरो – यकरो लेम

दाऊद राजा सै पीसा यन वास राज स्युंगस| हंग उ पझयंगस, हंग उग सिरी सुलैमान सै इस्राएल कू राज स्युंगम शुरू कस्युंग| परमेश्वर सै सुलैमान जा कथा स्युंगस हंग उजा रूस कि उ लच्यंग लरी खै चींथ अनि कि परमेश्वर उग दंची स्युंगयंग| सुलैमान सै परमेश्वर स थोस कि उ उजा मत्त बुद्धिमान स्युंगति| हिदि कथा सै परमेश्वर जा खुश स्युंगस, हिना दंची परमेश्वर सै सुलैमान जा दुनिया गै लच्यंग बुद्धिमान यूरासिरी बनास| सुलैमान सै मत्त स कथा जा कल्लासी हंग उ तिग बुद्धिमान राजा निस| परमेश्वर सै उजा मत्त स्यांगमी री कबनातिस|

यरूशलेम कू सुलैमान सै अति मंदिर जा बनास जइ गै दंची उग बा सै योजना बनाग तास हंग उ बथो जा तिग जरू तास| थन मि छिम वाला ढंगस गै बदला मंदिर कू परमेश्वर ग सेवा स्युंगतान्नस हंग उग दंची बलि चढान्नस| परमेश्वर राग मंदिर कू स्योंगसि निस, हंग अथूंग उ आफिग मि मंग गै जरू स्योंगसिद निस|

हंग सुलैमान सै मि मंग राजू ची मिनंसिरी जा प्रेम स्युंगस| उस मत्त स, लगभग तिग हजार मिनंसिरी जा ढामि स्युंग परमेश्वर गै कथा मुरुंगस! हिदि मंग सै मत्त स मिनंसिरी मंग मि मंग राजू खचि रास हंग आफिग जरू आफिग सैमा जा रयग रन्नस हंग उसिग पूजा स्युंगतान्नस| हंग सुलैमान स्यांगत क्लच ता उस री उग सैमा गै पूजा स्युंगस |

हिना वजह स परमेश्वर सुलैमान स रुसू पिरास| उस ल्यैस कि उ इस्राएल राजू जा निस्यी राजू कू यकरो स्युंग्म गै द्वारा उजा सजा दायंग| उ सुलैमान गै सिचिम गै निमफन हिना स्युंगयंग|

सुलैमान गै सिचिम गै निमफन, उग सिरी रहबाम राजा कबनस| इस्राएल राजू गै जम्मा मि मंग उजा आफिग राजा गै रूप कू स्वीकार स्युंग्म दंची तिग जरू जम्मा री निन्नस| उसिस रहबाम स यद कथा हासिग निस कि सुलैमान सै उजा मत्त मुतरत वाला सारो लन स्युंग निस हंग मत्त स ठल वसूल निन्नस| उसिस रहबाम स होस्यी स्युंगस कि उजा चीथ लन स्युंगयंग|

हंग रहबाम सै उसीजा पूद नासमझी स जबाब दास, “गनी ल्हेता कि जिग बा सुलैमान सै गनी जा मुतरत वाला लन दास| हंग जी गनिजा अति च्यंग री अछो मुतरत वाला लन दायंग हंग जी गनीजा अति च्यंग री अछो दु:खु दातु|

हंग मि मंग सै उजा हिना ल्हैम यन्स ता उसी मंग सै उलंग मंग सै उग विरुद्ध बलवा स्युंगस| ची जाति सै उजा होतीस उग जरू थन तोंगमी निस्यी जातिया ही कबचतै| हिदि निस्यी जातिया मंग सै आफी आफिजा यहूदा गै राजू ल्यैस|

बाकी गै ची जातियो मंग सै यारोबाम मिन गै तिग यूरासिरी जा आफिग राजा कबनास| हिदि जाति राजू गै उत्तर पूर्वी हिस्सा कू निन्नस| उसिस आफि जा इस्राएल ची राजू ल्यैस|

हंग यारोबाम सै परमेश्वर गै विरुद्ध बलवा स्युंगस हंग मि मंग जा पाप स्युंगयो ल्यैस| उस आफिग मि मंग गै चैन्तु पूजा स्युंगम दंची निस्यी मूर्तियों जा बनास| उसी थन यहूदा गै राज्य कू यरुशलेम कू परमेश्वर गै मंदिर कू उसिग भक्ति स्युंगम दंची मुदिनेस|

यहूदा हंग इस्राएल गै राज्य बयरी कबनस हंग खज्या खज्या निमि गै विरुद्ध घिसीन्नस|

इस्राएल गै नूद राज्य कू, जम्मा री राजा यद निन्नस| हिदि मंग स उलंग राजा उसिग बं कू राजा बनमगै आशा ताम वाला गार इस्राएलियों गै चेन्तु पझयंगन्नस|

इस्राएल राज्य गै जम्मा री राजाओं सै अछो बाकी मि मंग सै मूर्तियों गै पूजा स्युंगस| ता उसी खज्या खज्या वेश्याओं मंग गै जरू यागस हंग इता वास कि उलंग चू मूर्तियों गै लरी संमंग जा बलि री स्युंगस|

यहूदा राज्य गै राजा, दाऊद गै संतान निन्नस| हिदि राजाओं कू खचि उलंग बुद मि निन्नस जइ मि सै न्याय गै जरू राज स्युंगस हंग परमेश्वर गै तारीफ स्युंगस| हंग यहूदा गै मत्त राजा यद निन्नस| उसिस यद ठारसिग राज स्युंगस, हंग मूर्तियों गै पूजा स्युंगस| इता वास कि हिदि मंग सै दूमा राजाओं सै झूठी सैमा गै लरी आफिग संमंग जा री बलि कद्दा| यहूदा गै बाकी मि मंग सै री परमेश्वर गै विरुद्ध बलवा स्युंगस हंग गार सैमाओं गै पूजा स्युंगस|