17. दाऊद गै जरू परमेश्वर गै वाचा

शाऊल इस्राएल गै लरीची राजा निस| उ बुंग्थ हंग च्योसीद निस, जसो उसी मंग चींथ निस अतनाइ निस| इस्राएल जा आफिग शासन गै लरी उलंग यन ची शाऊल तिग बुद राजा निस| हंग निग्म उ तिग यद मि कबनस जइ मि सै परमेश्वर गै कथा मुमान्स, हिना दंची परमेश्वर सै तिग गार मि जा किलस जइ कि तीज्या ची उग बं कू राजा बनयंग|

परमेश्वर सै दाऊद मिन गै तिग ज्यूद इस्राएली यूरासिरी जा किलग तीज्या शाऊल गै बं कू राजा ल्हैम दंची तैयार स्युंगम शुरू कस्युंग| दाऊद बैतलहम सोंग गै तिग रोहकचा निस| उलंग ज्या ची, दाऊद सै व्हा हंग व्होम निमी जा पच्यंगनिस खस्युंग कि दाऊद चैंतू देखभाल स्युंगम गै बकत उग बा गै माला मंग जा उसिस घिसीन्नस| दाऊद तिग नग्त हंग धर्मी मि निस| उस परमेश्वर जा भरोसा स्युंगस हंग उग कथा जा मानस|

हंग दाऊद इता ज्यूद यूरासिरी निस, उस पूद-बुंथ गोलियत गै विरुद्ध घिसिस| गोलियत तिग मत्त बुद सिपाही निस| उ मत्त सारो हंग लगभग सुम मीटर बुंग्थ निस! हंग परमेश्वर सै गोलियत जा पच्यंगम हंग इस्राएली मंग जा बचाम दंची दाऊद गै सार स्युंगस| हिदीग निमफन, दाऊद सै इस्राएल गै बयरी मंग जा उलंग चू जीत गै रन्नस| दाऊद तिग पूद सिपाही कबनस, हंग उस मत्त स घिसीम कू इस्राएली सेना गै अगुवाई स्युंगस| मि मंग सै उग मत्त तारीफ स्युंगस|

मि मंग सै दाऊद जा हिलंग प्रेम स्युंगस कि शाऊल उजा चीड़ग निस| आखिरकार शाऊल उजा सतीम चींथ निस, हिना दंची दाऊद उजा हंग उग सिपाही मंग स च्यासिम दंची सीर कू फोंग दिस| तिज्या, ची शाऊल हंग उग सिपाही दाऊद जा मसीम कू निन्नस ता शाऊल तिग फू कू दिस| हिदी ऊई फू निस जइ बं कू दाऊद च्यासिद निस, हंग शाऊल सै उजा मुतिन्स| दाऊद शाऊल गै निमफन उग मत्त न्योरो दिस हंग उग खसै पसै स तिग टुकड़ा चेतीस| निग्म हंग शाऊल अति फू स छंगपंग वंस ता दाऊद सै उजा हार स्युंग अति कचूमसिद निस खसै पसै गै टुकड़ा जा दिखास| हीदी रीति स, शाऊल जा पत्तो क्लच कि दाऊद सै राजा बनम दंची उजा समौ दंची मना कस्युंगद अनि|

दुमा ज्या गै निमफन, शाऊल घिसिग लं पझयंग, हंग दाऊद इस्राएल गै राजा कबनस| उ तिग बुद राजा निस, हंग मि मंग सै उजा प्रेम तास परमेश्वर सै दाऊद जा आशीषित स्युंगस हंग उजा लायक बनास| दाऊद सै उलंग युद्ध घिसिस, हंग परमेश्वर सै इस्राएल गै बयरी मंग जा पराजित स्युंग्म कू उसिग सार स्युंगस| दाऊद सै यरूशलेम सोंग जा जीत गै उजा आफिग राजधानी बनास, जइ बं उ निस हंग राज स्युंगस| दाऊद पीसा यन वास राजा निस| हिदी बकतर गै दोरान, इस्राएल तरतै हंग स्यांगमी कबनस|

दाऊद तिग मंदिर बनाम चींथ निस जइ बं जम्मा इस्राएली परमेश्वर गै भक्ति स्युंग तरयंग हंग उग दंची बलिदान दा तरयंग| लगभग पिसय यन स, उसी मंग मूसा गै कबनासिद छिम वाला ढंगस कू परमेश्वर गै भक्ति स्युंगतान्नस हंग उग दंची बलि दाग तान्नस|

हंग अतकू नातान मिन गै तिग भाविष्य बताद मि निस| परमेश्वर सै उजा दाऊद जा हीदी ल्हैम दंची थिरस: “गस मत्त स युद्ध घिन्नस, हिना दंची गै जिग दंची हीदी मंदिर जा मुबनामों नग सिरी हीदी बनायंग| हंग जी गजा मत्त स आशीषित स्युंगयंग| नग तिग संतान राज्यारी दंची जिग मि मंग कू राजा गै रूप कू राज स्युंगयंग|”राज्यारी दंची राज स्युंगम वाला उ दाऊद गै तिगमात्र संतान मसीह निस| मसीह परमेश्वर गै किलसीद वाला मि निस जइ संसार गै मि मंग जा उसीजा पाप स बचायंग|

हंग दाऊद सै नातान गै फिन्न जा यंस ता उस परमेश्वर जा धन्यवाद स्युंगस हंग उग गुण गान स्युंगस| परमेश्वर उसिग मान सम्मान बढाग तास हंग उजा मत्त आशीष दाग तातू| साचो ल्ही दाऊद मुलासिद निस कि परमेश्वर हीदी कथा जा उलंग पाजा स्युंगयंग| हीदी बकतर इन्जा पत्तो निस कि इस्राएलियों जा तिग बूंथ ज्या वास, लगभग तिग हजार यन वास मसीह गै राम गै रिहनचिग निन्नस |

दाऊद सै उलंग यन वास न्याय गै जरू आफिग मि मंग जा राज स्युंगस| उस पुद निष्ठा स परमेश्वर गै कथा जा मानस हंग परमेश्वर सै उजा आशीषित स्युंगस| हंग, आफिग जीवन गै अंत कू उस परमेश्वर गै विरुद्ध झेरमना पाप कस्युंगस|

तीज्या ची दाऊद सै आफिग महल कू खचि छंगपंग ओंगस हंग तिग ढंगत रीथिस्या जा येरसिग तिन्स| उ उजा मुसित्त निस, हंग उस पत्तो कस्युंग कि उग मिन बतशेबा निस|

आफिग मी जा हटाम गै बदला दाऊद सै उजा आफिग न्योरो रमो दंची खमी जा थिरस| उ उग जरू यागस हंग उजा थोकसिग चिमजा कथिरस| दुमा ज्या गै निमफन बतशेबा सै हिदि ल्हेग दाऊद गै न्योरो फिन्न थिरस कि उ सैन्द लित्त अनि|

बतशेबा गै रीथि ऊरिय्याह मिन गै तिग मि निस| उ दाऊद गै बुद सिपाही कू खचि तिग निस| हिदि बकतर उ घिसिम दंची वथे पिददै निस| दाऊद सै ऊरिय्याह जा घिसिम स थोकसिग हुईग उजा आफिग रीथिस्या गै जरू स्योंगसिम दंची ल्यैस| हंग गार सिपाही घिसिम कू निन्नस हिना दंची ऊरिय्याह सै चिमजा दिम स मना कस्युंग |हिना दंची दाऊद सै ऊरिय्याह जा थोकसिग घिसिम बं कू थिरतिस हंग सेनापति स उजा घिसिम कू हिना बं कू ताम दंची ल्यैस जइ बं कू मत्त तरते बयरी ल्है ताकि उ सतयंगन्न| ता हिना लिच्च कि ऊरिय्याह घिसिम बं कू पझयंगस |

ऊरिय्याह गै घिसिम बं कू सिचिम गै निमफन दाऊद सै बतशेबा स ढामि कस्युंग|अति गै निमफन उस दाऊद गै सिरी जा जन्म दास| दाऊद सै जइ स्युंगस उजा परमेश्वर मत्त रुसू पिराद निस, हिना दंची उस नातान भविष्य बताद मि जा दाऊद जा हिदि बताम दंची थिरस कि उग पाप उलंग यद निस| दाऊद सै आफिग पाप गै पछताव स्युंगस हंग परमेश्वर सै उजा माफ कस्युंग| दाऊद सै आफिग पूरो जीवन कू, हिदूँग वास कि मुश्किल ज्या ची री परमेश्वर गै निमफन निमफन दियस हंग उग कथा जा मानस|

हंग दाऊद गै सैन्द पझयंग| हिदि रीति स परमेश्वर सै दाऊद जा सजा दास| हिदि च्यंग री, दाऊद गै सिचिम वास, उग आफिग मोमाल गै बाकी मि मंग सै उग विरुद्ध घिसीन्नस, हंग दाऊद गै आफिग शक्ति चिथ कल्त निस| हंग परमेश्वर विश्वासयोग्य निस हंग इता री उस उ स्युंगस जइ उस दाऊद स स्युंगम गै वादा स्युंग निस कि उ स्युंगयंग, बुद स दाऊद सै उग कथा मुरुंगस| निंकुति, दाऊद हंग बतशेबा गै दुसरो संतान पैदा लिच्च, हंग उसिस उग मिन सुलैमान तास|