23. यीशु गै जन्म

यूसुफ मिन गै तिग धर्मी मि गै जरू मरियम जा कथोचिन्नस| हंग उस यन्स कि मरियम गोबरंग कू अनि ता उजा पत्तो निस कि उ उग सैंद माद| हंग, उ मरियम जा बदनाम मुस्युंगम चींथ निस, हिना दंची उस उजा कृपा स्युंगम गै हंग उजा मुफाग होतिम दंची चिचिस हंग हिदि च्यंग लरी कि उ हिना स्युंगता, तिग स्वर्गदूत सै उग मं कू राग उजा कथा स्युंगस|

अति स्वर्गदूत सै ल्यैस, “ऐ यूसुफ, मरियम जा आफिग रिथिस्या गै रूप कू रतिग राम्ह दंची मुजेरम| उग भीतरु जइ सेंद अनि उ पवित्र ल्हेमे गै चैन्तू अनि| उ तिग सिरी सेंद जा जन्म दायंग| उग मिन यीशु ताम [जइग अर्थ अनि, ‘यहोवा बचायंग], खस्युंग कि उ मि मंग जा उसिग पापों स बचायंग|”

हिना दंची यूसुफ सै मरियम जा ढामि स्युंगस हंग उजा आफिग रीथिस्या गै रूप कू चिमजा पिरयस, हंग उग सेंद जा जन्म रा वास उ उग राक्त मुह्यागस|

हंग मरियम गै जन्म दाम गै ज्या न्योरो निस, ता उस हंग यूसुफ सै बेतलहम दिम गै तिग बुंग्थ यात्रा स्युंगस| उस अछै दिम निस खस्युंग कि रोमी अफसर इस्राएल कू स्योंगसिदै वाला जम्मा मि मंग गै गिनती स्युंगम चींथ निस| उसी चींथ निस कि जम्मा मि मंग अतकू दिनी जइ सोंग कू उसिग पूर्वज स्योंगसिद निन्नस राजा दाऊद गै जन्म बेतलहम कू लिच्च, हंग उ मरियम ची यूसुफ निमी गै पूर्वज निस|

मरियम हंग यूसुफ बेतलहम दिन्नस, हंग अतकू ले लुकच ताम वाला बं गै च्यंग उसिग स्योंगसिम दंची खरी बं मुनिस| अति बं निस जइ बं कू मरियम सै आफिग सेंद जा जन्म दास उस उजा दरफी कू करचिस खस्युंग कि अतकू उग दंची खइ पस्स लांगबे मुनिस| उसिस उग मिन यीशु तास|

अति मुंछ, अतकू न्योरो रिह कू दूमा रोहकचा आफिग माला गै यंबा जा खबर स्युंगतास| झल्ल स, तिग डोकत स्वर्गदूत उसीजा प्रकट लिच्च हंग उसी कजैरन्नस| अति स्वर्गदूत सै ल्यैस, “मुजेरम, खस्युंग कि जीग न्योरो गनी दंची बुद फिन्न अनि| बेतलहम कू मसीह, राजा गै जन्म कल्त अनि!”

दिग अति सेंद मासी दिनी, हंग गनी उजा लाडम कू कतूमसिद हंग दरफी कू लयकत तीयंग|” झल्ल स, तिमभू स्वर्गदूतों मंग स तीक्क कल्ले| उसी परमेश्वर गै गुनू स्युंग तान्नस| उसिस ल्यैस, जम्मा महिमा स्वर्ग कू स्योंगसिद वाला परमेश्वर जा मिलियंग| थंगजा कू उसी मि मंग कू शांति ल्हैयंग जइ ग उ झिरकों स्युंता!”

हंग स्वर्गदूत पिदिस| उसी रोहकचा री आफिग माला जा होतिग सेंद जा ओंगम दंची दिन्नस छाटोइ उसी अति बं कू टोनभन्नस जइ बं कू यीशु निस हंग उसीस उजा दरफी कू लयकत तिन्नस, जसों कि अति स्वर्गदूत सै कल्यैद निस उसी मत्त खुशी निन्नस| हंग उसी रोहकचा थोकसिग अति बं कू कन्नभस जइ बं कू उग माला निस| उसिस जइ खरी यन्स हंग तिन्स अति जम्मा दंची उसी परमेश्वर गै गुनू स्युंगतास|

पूर्व कू वथे तिग सोंग कू दूमा यूरासिरी निन्नस| उसिस कर्मा जा रिसिस हंग उसी मत्त लाद मि निन्नस| उसिस तिग खास कर्मा जा तिमभू कू तिन्स| उसिस ल्यैस कि हिदि ग अर्थ लिन्ही कि यहूदीयों गै तिग नुद राजा ग जन्म कलत अनि| हिना दंची उसिस अति सेंद जा ओंगम दंची आफिग राजू खचि यात्रा स्युंग गै फैसला कस्युंग| तिग बुंग्थ यात्रा गै निग्म, उसी बेतलहम रास हंग अति चिमजा तिन्नेस जइ बं कू यीशु हंग उग मुमा जी बूबा स्योंगसिग निन्नस |

हंग हिदि यूरासिरी मंग सै यीशु जा आफिग मुमा गै जरू तिन्स ता उसिस पै चुग उसिग आदर सम्मान स्युंगन्नस| उसिस यीशु जा अकरो नासो दास| हंग उसी चिमजा थोकसिग पिदिस