24. यूहन्ना यीशु जा पवित्र च्यागसिम दाग तास

एलीशिबा हंग जकर्याह गै सिरी यूहन्ना, पूद ल्हेग तिग भविष्य बताद मि कबनस| उ सीर कू स्योंगसिद निस, हंग सीर कुतू व्हा हंग माछ्या जाग निस, हंग ऊँट गै छम्म स कबंद वाला खसै -पसै चुकसीद निस|

मत्त स मि मंग यूहन्ना गै कथा यन्म दंची सीर कू खचि वंग पिरन्नस| उस हिदि ल्हेग उसीजा प्रचार स्युंगस, “पछताव स्युंगनी, खस्युंग कि स्वर्ग गै राज्य न्योरो अनि!”

हंग मि मंग सै यूहन्ना गै फिन जा यन्स ता उसी मंग स मत्त मंग सै आफिग पापों स पछताव स्युंगस, हंग यूहन्ना सै उसीजा पवित्र च्यागसिम दास| यूहन्ना जा ओंगम दंची मत्त स धार्मिक प्रधान मंग री रन्नस, हंग उसिस आफिग पापों गै पछताव किता अंगीकार मुस्युंगस|

यूहन्ना सै धार्मिक प्रधान मंग जा ल्यैस, “ऐ बिसूति नबू! पछताव स्युंगयो हंग आफिग व्यवहार बदलयों| परमेश्वर हर अति स्यिन जा चैतीयंग जइ बुद फल मुरयम, हंग उ उसीजा मैं कू चांगतीयंग|” जइ भविष्य बताद मि मंग सै कलैसद यद गुलाम ग कथा निस यूहन्ना सै उजा पूरो स्युंगस, “ओंगयों, छाँटोइ जी नग लरी आफिग फिन्न कवरद जा थिरयंग जइ नग दंची अम्म तैयार स्युंगयंग|

खमी धर्मिक प्रधान मंग सै यूहन्ना जा रूस कि खै उ मसीह ल्है| यूहन्ना सै जबाब दास, “जी मसीह मुल्हेय, हंग उ जिग निग्म राग अनि| उ हिलंग लाद अनि कि जी उग प्वला गै तन्ना ठूल्म गै री लायक मुनीय|”

न्यार ची, यीशु पवित्र च्यागसिम कोरम दंची यूहन्ना गै न्योरो रास| हंग यूहन्ना सै उजा तिन्स, ता उस ल्यैस, “ओंगयों! परमेश्वर गै माला जइ दुनिया गै पापों जा आंग कोरदीयंग|”

यूहन्ना सै यीशु जा ल्यैस, “ जी गजा पवित्र च्यागसिम दाम गै लायक मुनीय| बदला हिदि ग जरूरी अनि कि गै जीजा पवित्र च्यागसिम दायंगन| “ हंग यीशु सै ल्यैस, “गस जीजा पवित्र च्यागसिम दाम चिन्नी खस्युंग कि स्युंगम दंची बुद लन हिदि अनि|” हिना दंची यूहन्ना सै उजा पवित्र च्यागसिम दास,खस्युंग कि यीशु सै खज्या पाप मुस्युंगस|

पवित्र च्यागसिम कोरम गै निग्म हंग यीशु ती खचि छंगपंग रास ता परमेश्वर गै ल्हेमै कबूतर गै रूप कू प्रकट लिच्च हंग छंकू राग उजा स्योंगसिस| अति बकतर, परमेश्वर सै स्वर्ग ती कथा स्युंगसस| उस ल्यैस, “ गै जिग सिरी ल्हेन जी गजा प्रेम स्युंगता| हंग जी गजा खुशी इय्ये|”

परमेश्वर सै यूहन्ना जा ल्यैस, “पवित्र ल्हैमै छंकू राग खमी जा स्योंगसियंग जइजा गै पवित्र च्यागसीम दायंगन| “ऊई परमेश्वर गै सिरी अनि परमेश्वर तिगई अनि| हंग यूहन्ना सै यीशु जा पवित्र च्यागसीम दास, ता उस परमेश्वर बूबा जा कथा स्युंगम यंगस, सिरी परमेश्वर जा तिन्स, जइ कि यीशु अनि, हंग उस पवित्र ल्हैमै जा तिन्स|