46. शाऊल मसीही विश्वासी कबनस

शाऊल मिन ग तिग मि निस जइ सै यीशु जा विश्वास मुस्युंगस| हंग उ ज्यूद निस, हंग उस स्तिफनुस जा पच्यंगद वाला मि मंग गै खसै पसै ग निगरानी स्युंग निस| निंगकुती, उस विश्वासियों मंग जा सतान्नस| उस यरुशलेम कू चिमजा चिमजा दिग यूरासिरी हंग रीथिस्या निमी जा चुमग जेल भीतरु कमोकतिस| हंग यहूदी पूद पुजारी सै शाऊल जा दमिश्क सोंग कू दिम दंची आज्ञा दास, उस अछै ची मसीही मंग जा चुमग उसीजा थोकसिग यरुशलेम रयग राम दंची शाऊल जा ल्यैस|

हिना दंची शाऊल सै दमिश्क दिम ग यात्रा शुरू कस्युंग| अति सोंग कू नभग दूमाइ लरी, उग पी बं चेन्तू तिमभू खचि तिग मत्त प्रकाश छंत डोकस, हंग उ थंगजा कू गिन्स| शाऊल सै खमी जा फाकत यन्स, “हे शाऊल! हे शाऊल! गै जीजा खोंग सताग तातन?” “हे प्रभु, गै खमी ल्हैन?” यीशु सै उजा जबाब दास, “जी यीशु ल्हिय| गै जीजा सताग तातन!”

हंग शाऊल रचीस हंग उ मुतिंग निस| उग स्यासि उसीजा दमिश्क कोरग दिन्नस| शाऊल सै सुम ज्या वास खरी मुजास हंग ती री मुतुंगस|

दमिश्क कू हनन्याह मिन ग तिग चेला निस| परमेश्वर सै उजा ल्यैस, “अति चिमजा कू दि जइ बं शाऊल कस्योंगसिद अनि| आफिग ला उग चेन्तू तायो खस्युंग कि उ हजू मैं तिंग निस|” हंग हनन्याह सै ल्यैस, “हे प्रभु, जिस यन्गस कि हिदि मि सै विश्वासी मंग जा हना सताग तास|” परमेश्वर सै उजा जबाब दास, “दि! जिस उजा यहूदियों मंग कू हंग दुसरो जाति गै मि मंग कू जिग मिन ग कथा स्युंगम दंची किलग तास| उ जिग मिन गै दंची मत्त दु:खु सहयंग|”

हिना दंची हनन्याह शाऊल गै निद कू दिस, आफिग ला उजा तम्मस, हंग ल्यैस, “यीशु सै, जइ हिदा राम गै नग अम कू नग नोकु पिरास, जीजा नग न्योरो थिरस खस्युंग कि गै हजू मैं तिंग निस, हंग पवित्र ल्हेमे तीक्क लयंग|” अति बकतर शाऊल हजू मैं कतिन्स, हंग हनन्याह सै उजा पवित्र च्यासिम दास| हंग शाऊल सै दुकलंग कज्जा हंग हजू उ तरत कल्च|

अति ज्या स, शाऊल सै दमिश्क कू स्योंगसिद वाला यहूदियों मंग जा प्रचार स्युंगम शुरू कस्युंग| उस ल्यैस, “यीशु हि परमेश्वर ग सिरी ल्है!” यहूदी मंग हा कल्त निन्नस, खस्युंग कि शाऊल सै विश्वासी मंग जा पच्यंगम दंची कोशिश स्युंगस, हंग थन उस यीशु जा विश्वास स्युंग निस| शाऊल सै यहूदी मंग गै जरू झीसीग निन्नस| उस दिखास कि यीशु हि मसीह निस|

मत्त ज्या ची निमफन, यहूदी मंग सै शाऊल जा पच्यंगम दंची कथा स्युंगतान्नस| उसिस उजा पच्यंगम दंची सोंग गै मोरोंग कू मि मंग जा थिरस| उजा ओंगताम हंग शाऊल सै अति कथा गै बारे कू कयन्स, हंग उग स्यासी मंग सै बचग दिम दंची सहायता स्युंगस| तिग मुंछ उसिस उजा टोकरी कू स्योंगसिग सोंग ग बंगफल कू खचि छंकू कउतारस दमिश्क स बचग दिम गै निमफन शाऊल सै यीशु गै बारे कू प्रचार स्युंगइ तास|

शाऊल खास चेलों जा छिम दंची यरुशलेम दिस, हंग उ उजा खचि जेरक निन्नस हंग बरनबास मिन ग तिग विश्वासी शाऊल जा खास चेलों गै न्योरो कोरग दिस| उस उजा बतास कि शाऊल सै हना मुजेरक दमिश्क कू प्रचार स्युंगतास उग निग्म खास चेलों सै शाऊल जा आफिग कस्युंग|

दूमा विश्वासी जइ यरुशलेम गै सताव सै फोंग दिन्नस उसी वानम अंताकिया सोंग कू पिदिन्नस हंग यीशु गै बारे कू प्रचार स्युंगतान्नस| अंताकिया कू स्योंगसिद वाला मि मत्त मि मंग यहूदी मु निन्नस, हंग लच्यंग लरी उसी मंग जा खचि मत्त मि मंग यहूदी कबनस| बरनबास हंग शाऊल हिदि नुद विश्वासि मंग जा यीशु के बारे कू गार मत्त रिद दंची अतकू दिन्नस हंग कलिसिया मंग जा सारो स्युंगस| यीशु जा विश्वास स्युंगद वाला लच्यंग लरी अंताकिया कू हि “मसीही’’ ल्हेन|

तीज्या, अंताकिया गै मसीही मंग उपवास गै जरू प्रार्थना स्युंगतान्नस पवित्र ल्हेमे सै उजा ल्यैस, “जिग दंची बरनबास हंग शाऊल जा अति लन स्युंगम दंची यकरो स्युंगती जइ लन स्युंगम दंची जिस उसीजा हुईगस| “हिना दंची अंताकिया गै कलिसिया सै बरनबास हंग शाऊल गै दंची प्रार्थना स्युंगस हंग उसीजा आफिग ला तास| हंग उसिस उसीजा गार मत्त बं कू यीशु गै बारे कू बुद फिन ग प्रचार स्युंगम दंची कथिरस| बरनबास हंग शाऊल सै यकरो-यकरो जाति ची मि मंग जा शिक्षा दास, हंग मत्त स मि मंग सै यीशु जा विश्वास स्युंगस|