47. फिलिप्पी सोंग कू पौलुस हंग सीलास

हंग शाऊल सै पूरो रोमी साम्राज्य कू यात्रा स्युंगस ता उस आफिग रोमी मिन “पौलुस” ग उपयोग स्युंगम शुरू कस्युंग| तीज्या, पौलुस हंग उग स्यासि सीलास फिलिप्पी सोंग कू यीशु गै बारे कू बुद फिन सुनाम दंची दिस| उसी सोंग ग छंगपंग यंगती गै खास्या तिग बं कू दिस जइ बं मि मंग प्रार्थना स्युंगम दंची जम्मा री तिग बं कू निन्नस| अतकू उसी लुदिया मिन ग तिग मिंगसिरी जा छिस जइ तिग व्यापारी निस| उ परमेश्वर जा प्रेम स्युंग निस हंग उग कथा मानग निस|

परमेश्वर सै लुदिया जा यीशु गै बारे कू फिन जा विश्वास स्युंगम दंची पूरो कल्च| पौलुस हंग सीलास सै उजा हंग उग मौमाल जा पवित्र च्यागसीम दास| उस पौलुस हंग सिलास जा आफिग चिमजा स्योंगसिम दंची न्योता दास, हिना दंची उसी अति बं कू स्योंगसिन्नस|

पौलुस हंग सीलास मि मंग जा ज्या ज्यारी अति बं कू छिन्नस जइ बं यहूदी मंग प्रार्थना स्युंगतान्नस| ज्या ज्यारी उसी अतकू दिग निन्नस हंग तिग ढंगमी चमे जइजा यद ल्हेमे सै कचूमसीद निस उसिग निमफन निमफन दिग निन्नस| हिदि यद ल्हेमे गै चेन्तू खचि उ मि मंग जा भविष्य बताग तास, हिना दंची उ भविष्य बताद मि गै रूप कू आफिग रीथि मंग गै दंची मत्त धन कमाग तान्नस|

उसीग दिम बकतर हिदि ढंगमी चमै यरक निस, “हिदि यूरासिरी लच्यंग पूद परमेश्वर गै सेवक अनि| हिदि गनीजा मुक्ति तिम्म ग अम बताग तान्नस!” उ ज्या ज्यारी हिना स्युंगतास जइस कि पौलुस रुसू पिरास|

अंत कू, तीज्या अति ढंगमी चमे सै यरम शुरू कस्युंग, हंग पौलुस सै उग चेन्तू ओंग उग भीतरु ग यद ल्हेमे जा ल्यैस, “यीशु गै मिन स हिदूँग खचि गै दि|” अति बकतर अति यद ल्हेमे सै उजा कहोतिस|

अति ढंगमी चमे गै रीथि मत्त रुसू कल्च| उसीजा पत्तो कल्च अति ल्हेमे मून्द उ ढंगमी चमे मि मंग जा भविष्य मुबता तरद निस हिदिग अर्थ निस कि मि मंग थन उग रीथि मंग जा रुपया मुदायंग कि उ उसीजा भविष्य बताएंग कि उग जरू खै लयंग |

हिना दंची अति ढंगमी चमे गै रीथि पौलुस हंग सीलास जा रोमी अधिकारी मंग गै न्योरो कोरग दिस, उसिस पौलुस हंग सीलास जा धुंगस, हंग हजू उसीजा जेल कू कमोकतीस|

उसीसै पौलुस हंग सीलास जा जेलखाने गै हिना छू कू तास जइ बं कू मत्त सिपाही निन्नस| हिदा वास कि उसीस उसीग लिकी कू स्यिन गै बुंग्थ टुकड़ा कू कघिस| हंग पौलुस हंग सीलास फै मुंछ गै बकतर, परमेश्वर ग गुनू गै भयरा तुग निन्नस|

झल्ल स, तिग बुदस जेरमना रुम्म रास! जेल कू ची जम्मा मोरोंग कफोकस, हंग जम्मा कैदी मंग गै सांगली कूच्या टुभ्भर|

हंग दरोगा करचिस| उस तिन्स कि जेलखाने गै मोरोंग कफोकस्द निस| उस तैयस कि जम्मा कैदी बचैम दंची कफोंगन्नस| उ कजेरस कि उग फोंग्म गै कारण रोमी अधिकारी उजा पच्यांगयंग, हिना दंची उ अफीजा पच्यंगम दंची तैयार कल्च! हंग पौलुस उजा तिंग यरस, “रिनचिन! अफीजा नुकसान मुस्युंगम| इन जम्मा हिदूँगई अनि|”

अति दरोगा सै ढ़ंगतास पौलुस हंग सीलास गै न्योरो राग रूस, “मुक्ति तिम्म दंची जी खै स्युंगम?” पौलुस सै जबाब दास, “प्रभु यीशु जा विश्वास स्युंग, ता गै हंग नग मौमाल मुक्ति तियंग|” हंग उ दरोगा पौलुस हंग सीलास जा आफिग चिमजा कोरदिस हंग उग गैन्या यरस| पौलुस सै उग चिमजा ची जम्मा मि मंग जा यीशु गै बारे कू बुद फिन सुनास|

दरोगा हंग उग पूरो मौमाल सै यीशु जा विश्वास स्युंगस, हिना दंची पौलुस हंग सीलास सै उसीजा पवित्र च्यागसीम दास| हंग दरोगा सै पौलुस हंग सीलास जा दुकलंग खिलास, हंग उ तिगजरू खुशी निन्नस|

तीज्या लरी सोंग गै प्रधान मंग सै पौलुस हंग सीलास जा जेल कू खचि आजाद कस्युंगति हंग फिलीप्पी खचि दिम दंची ल्यैस| पौलुस हंग सीलास लुदिया हंग दूमा गार स्यासि मंग जा छिस हंग उग निमफन सोंग कू खचि पिदिन्नस| यीशु गै बारे कू बुद फिन कफेलस, हंग कलिसिया बढ़ेग दिस|

पौलुस हंग गार मसीही प्रधान मंग सै मत्त स सोंग ग यात्रा स्युंगस| उसिस मि मंग जा यीशु गै बारे कू बुद फिन सुनास| उसिस कलिसिया गै विश्वासियों मंग जा लरी बढ़ेम हंग शिक्षा दाम दंची उलंग चिट्ठी री रिस| हिदि मंग कू खचि दूमा चिट्ठी बाइबल ग लिबिन कबनस|