48. यीशु हि वादा कस्युंगद वाला मसीह ल्है

हंग परमेश्वर सै दुनिया जा बनास ता जम्मा बथो बुद निस| खरी पाप मुनिस| आदम हंग हव्वा तिग दुसरो जा बुदतेग निस, हंग उसी परमेश्वर जा बुदतेग निस| खरी काँगत री मुनिस हंग सिचिद री मुनिस, परमेश्वर हिनाई दुनिया चींथ निस|

सीना सै नबू गै चेन्तू खचि सवार कू हव्वा जा कथा स्युंगस, खस्युंग कि उ उजा धोखा दाम चींथ निस| हंग हव्वा हंग आदम सै परमेश्वर गै विरुद्ध पाप स्युंगस| खस्युंग कि उसिस पाप स्युंगन्नस हिना दंची थंगजा कू स्योंगसिद वाला जम्मा मि सिचियंगन्न|

खस्युंग कि आदम हंग हव्वा सै पाप स्युंग निस, हिना दंची खरी गार री यद लिच्च| उसी परमेश्वर गै बयरी कबनस| जइग परिणाम-स्वरूप, अति ज्या खचि जम्मा तिग मि सै पाप स्युंगस| जम्मा तिग मि जन्म कू खचि परमेश्वर ग बयरी अनि, परमेश्वर हंग मि मंग गै गूँदा कू शांति मुनिस| हंग परमेश्वर शांति दाम चींथ निस|

परमेश्वर सै वादा स्युंगस कि हव्वा ग तिग बंश सीना गै पूस्या कितियंग| उस हिना री ल्यैस कि सीना उग लिकी छोंगतियंग| दुसरो कथा कू, सीना मसीह जा पच्यंगयंग, हंग परमेश्वर उजा हजू टांगद स्युंगयंग| हिदिग निमफन मसीह सीना गै शक्ति जा राज्या री दंची पूझयूस| उलंग यन गै निमफन, परमेश्वर सै प्रकट स्युंगस कि उ मसीह यीशु ल्है|

परमेश्वर सै नूह जा तिग नाव बनाम दंची ल्यैस कि उ हिना दंची परमेश्वर सै उसी मंग जा बचास जइ उजा विश्वास स्युंग निस| हिना दंची, उसी जम्मा जा री परमेश्वर गै चेन्तू खचि सिचिम गै लायक निन्नस खस्युंग कि उसिस पाप कस्युंगद निस| हंग परमेश्वर सै उसी जम्मा जा बचाम दंची यीशु जा थिरस जइ उसीजा विश्वास स्युंगतान्नस |

सैकड़ों यन वास, यहूदी पुजारी परमेश्वर गै दंची बलि चढ़ागई तास| हिदि दिखाम कि मि मंग सै पाप स्युंगन्नस, हंग कि उसी परमेश्वर गै चेन्तू उसीजा सजा दामना लायक निन्नस| हंग उसी बलिदान उसीग पाप जा माफ मुस्युंग तरन्नस| यीशु लच्यंग पूद यहूदी पूद पुजारी अनि| उस उ स्युंगस जइ खमी यहूदी पुजारी मुस्युंगतर निस| उस तिगमात्र बलिदान ल्हैम दंची अफीजा कदा जइ जम्मा मि मंग गै पापों जा मिटा तरत निस| उस हाँ ल्यैस कि परमेश्वर उसी जम्मा मि मंग गै पाप गै दंची उजा सजा दायंग| हिना कारण यीशु सिद्ध यहूदी पूद पुजारी निस|

परमेश्वर सै अब्राहम जा ल्यैस, “जी नग चेन्तू दुनिया गै जम्मा जाति जा आशीर्वाद दायंग| यीशु हिदि अब्राहम गै बंश निस| परमेश्वर अब्राहम गै चेन्तू स जम्मा जाति जा आशीर्वाद दाद अनि, खस्युंग कि जइ यीशु जा विश्वास स्युंगन्न परमेश्वर उसी जम्मा मि मंग जा पाप स बचाग तास| हंग हिदि मंग यीशु जा विश्वास स्युंगन्न, ता परमेश्वर उसीजा अब्राहम गै बंश मानगतास|

परमेश्वर सै अब्राहम जा ल्यैस कि उ आफिग कोनमचिम सिरी इसहाक, उग दंची बलिदान स्युंगनि| हंग हजू परमेश्वर सै इसहाक गै बदला कू बलि स्युंगम दंची तिग माला दास| इन जम्मा आफिग पापों गै दंची सिचिम गै लायक निन्नस! हंग परमेश्वर सै इंग बं कू सिचिम दंची यीशु जा बलिदान गै रूप कू दास| हिदि कारण स इन यीशु जा परमेश्वर ग माला ल्हेतने|

हंग परमेश्वर सै मिस्र कू योंकती न्येला थिरस ता उस जम्मा तिग इस्राएली मौमाल जा ल्यैस कि उसी तिग माला ग बलि स्युंगनि| अति माला कू खमी दोष मुलेम चिन्नी| हंग परमेश्वर मोरोंग ग चलखै गै यरतों हंग खास्या कू उस उग सी तोम निस| हंग परमेश्वर सै अति सी तिन्स ता उ उसीग चिम खचि लरी कबढ़स हंग उसीग लच्यंग लरी ची सिरी मुसैनस| हंग हिना लिच्च ता परमेश्वर सै हिदि जा फसह गै त्यार ल्यैस|

यीशु फसह गै त्यार गै तिग माला नारुक्त अनि| उस खज्या पाप मुस्युंगस, हिना दंची उसिजा खरी यद मुनिस| उ फसह गै त्यार गै ज्या मून्द कल्च| जइ खमी यीशु जा विश्वास स्युंगता, ता यीशु ग सी अति मि ग मोलु पूरो स्युंगताता| हिदि हिना अनि जसो कि परमेश्वर अति मि गै खास्या कू खचि लरी कबढ़स, खस्युंग कि उ उजा सजा मुदास|

परमेश्वर सै इस्राएली मि मंग गै जरू तिग वाचा स्युंगस, खस्युंग कि उसी हिना मि निन्नस जइजा परमेश्वर सै आफिग ल्हैम दंची कचुन्द निस| हंग थन परमेश्वर सै तिग हिना वाचा स्युंगस जइ कि जम्मा दंची अनि| खमी री जाति ग खरी मि हिदि नुद वाचा जा हाँ ल्यैस, ता उ परमेश्वर गै मि मंग कू शामिल कल्लेन्नस| उ हिना हिदि दंची स्युंगता खस्युंग कि उ यीशु जा विश्वास स्युंगता|

मूसा तिग हिना भविष्य बताद मि निस जइ सै परमेश्वर गै जा पूद सामर्थ्य गै जरू प्रचार स्युंगनिस| हंग यीशु जम्मा भविष्य बताद मंग जा खचि लच्यंग पूद अनि| उ परमेश्वर ल्है, हिना दंची जइ खरी उस स्युंगस हंग ल्यैस उ परमेश्वर गै लन हंग बचन निन्नस| हिना दंची पवित्र -शास्त्र यीशु जा परमेश्वर ग बचन ल्हेता|

परमेश्वर सै राजा दाऊद जा वादा कस्युंगसिद निस कि राजा गै रूप कू उग तिग बंश परमेश्वर गै मि मंग जा ज्या ज्यारी दंची राज स्युंगयंग| यीशु परमेश्वर ग सिरी हंग मसीह अनि, हिना दंची उ राजा दाऊद ग बंश ल्है जइ ज्या ज्यारी दंची राज्य स्युंगतरयंग|

दाऊद ता इस्राएल ग राजा निस, हंग यीशु पूरो दुनिया ग राजा ल्है! उ हजू रायंग हंग ज्या ज्यारी न्याय हंग शांति गै जरू आफिग राज्य कू राज स्युंगयंग|