49. परमेश्वर ग नुद वाचा

तिग स्वर्गदूत सै तिग ज्यूद मिंगसिरी मरियम जा ल्यैस कि उ परमेश्वर गै सिरी जा जन्म दायंग| उ इता कुँआरी निस, हंग पवित्र ल्हैमै उग न्योरो रास हंग उ गोमरंग कू लिच्च| उस तिग सिरी जा जन्म दास जइग मिन उस यीशु तास| हिना दंची, यीशु परमेश्वर हंग मि निमी अनि |

यीशु सै मत्त स चमत्कार स्युंगस जइ दिखास कि उ परमेश्वर ल्है| उ ती कू गमचीस हंग नलन जा शांत स्युंगस| उस मत्त स कांगत मि मंग जा बुद स्युंगस हंग मत्त स मि मंग कू खचि यद ल्हेमे मंग जा खनस| उस पझयंगद मि मंग जा टांगद स्युंगस, हंग उस निई कुटु हंग निस्यी न्या जा नई हजार मि मग जा खिलाम दंची पूरो दुकलंग कू कबदलस|

यीशु तिग लच्यंग पूद शिक्षक री निस| जइ खरी उस सिखास, उ उस सिद्धता गै जरू सिखास| जइ उ मि मंग जा स्युंगम दंची ल्हेता उ उसीजा स्युंगम चिन्नी खस्युंग कि उ परमेश्वर ग सिरी ल्है| रुक्त दंची, उस सिखास कि गनीजा गार मि मंग जा अति रीति स प्रेम स्युंगम ग जरूरत अनि जसो गनी अफीजा प्रेम स्युंगतनी|

उस हिदि री सिखास कि गनीजा जम्मा बथो स अछो हंग आफिग सम्पति स री अछो परमेश्वर जा प्रेम स्युंगम चिन्नी|

यीशु सै ल्यैस कि दुनिया कू खरी बथो तिम्म स अछो बुद निस परमेश्वर गै राज्य कू ल्हैम| उग राज्य कू गनिग राम दंची जरूरी अनि कि परमेश्वर गनीजा गनिग पाप स बचायंग| ताकि गनी उग राज्य कू दि तरने|

यीशु सै ल्यैस कि खमी मि उजा आफिग स्युंगयंग| परमेश्वर उसी मि मंग जा बचायंग| परंतु दुसरो मि उजा आफिग मुस्युंगयंग| उस हिना री ल्यैस कि दूमा मि बुद बं नारुक्त अनि, खस्युंग कि उसी यीशु गै बारे कू बुद फिन जा हाँ लेन्नस, हंग परमेश्वर उसीजा बचाग तायंग| हंग खमी मि अम्म ग सारो बं नारुक्त अनि| परमेश्वर ग बचन पिजे नारुक्त अम्म कू टुभुरस, हंग अतकू खरी मुजूस| हिदि मंग यीशु गै बारे कू फिन जा हाँ मुलेन्नस| उसी उसीग राज्य कू राम दंची माद लेन्नस|

यीशु सै सिखास कि परमेश्वर पापी मंग जा मत्त बुदतैद निस| उ उजा माफ स्युंग्म चींथ अनि हंग उसीजा आफिग संतान बनाम चींथ अनि|

यीशु सै हिदि री बतास कि परमेश्वर पाप स बुदस यदतेम| खस्युंग कि आदम हंग हव्वा सै पाप स्युंगस, हिना दंची उसीग जम्मा वंश मंग सै री पाप स्युंगन्नस| हिदि दुनिया कू स्योंगसिद वाला हर तिग मि पाप स्युंगतान्न हंग परमेश्वर स वथे अने| हर तिग मि परमेश्वर ग बयरी अनि|

हंग परमेश्वर सै हिदि दुनिया कू स्योंगसिम वाला हर तिग मि स हिना रीति स प्रेम स्युंगस: उस आफिग तिगलौता सिरी जा दास ताकि परमेश्वर उसीजा सजा मुदायंग जइ उजा विश्वास स्युंगता हिदि गै बदला उसी उग जरू ज्या ज्यारी दंची स्योंगसियंग|

गनी सिचिम गै लायक अनि, खस्युंग कि गनिस पाप स्युंगयंग| गनी स परमेश्वर ग रुसू लेम साचोइ ल्है, हिदिग आशा, उ यीशु जा रुसू रास| उस यीशु जा क्रूस कू पच्यंगस हंग सजा दास|

यीशु सै खज्या पाप मुस्युंगस, परंतु उस परमेश्वर जा उजा सजा दाम दास| उस सिचिम दंची हाँ ल्यैस| हिदि रीति स, गनिग पाप जा हंग हिदि दुनिया कू स्योंगसिद वाला हर तिग मि जा आंगसिग पिकोरम दंची उ तिग सिद्ध बलिदान निस| यीशु सै अफी जा परमेश्वर गै दंची बलिदान कस्युंगस, हिना दंची परमेश्वर खमी री पाप जा, हिदूँग वास कि मत्त जेरमना पाप जा री माफ स्युंगयंग जइ यीशु जा विश्वास स्युंगता|

बुदस जइ गनी मत्त स बुद लन स्युंगनिस, ता हिदिग चैन्तु परमेश्वर गनीजा मुबचायंग| उग स्यासी ल्हैम दंची हिना खरी मुनि जइ गनी स्युंगतरनी| हिदिग आशा, गनीजा विश्वास स्युंग्म परयंग कि यीशु परमेश्वर ग सिरी अनि, उ गनिग बदला कू क्रूस कू पझयंगस, हंग हिना री कि परमेश्वर सै उजा हजू स टँगद कल्ले| जइ गनी हिदि जा विश्वास स्युंगनि, ता परमेश्वर गनिग पाप गै माफ स्युंगतियंग|

परमेश्वर अति जम्मा तिग मि जा बचायंग जइ यीशु जा विश्वास स्युंगता हंग उजा आफिग प्रभु स्वीकार स्युंगता| हंग उ उसीजा मुबचायंग जइ उजा विश्वास मुस्युंगतियंग| हिदि खमी सुचा मुस्युंगता कि गनी सयांगमी ल्है या गरीब ल्है, यरासिरी ल्है या मिंगसिरी ल्है, स्यांगत ल्है या ज्यूद ल्है, या गनी उलो स्योंगसिनी| परमेश्वर गनी प्रेम स्युंगता हंग चींथ अनि कि गनी यीशु जा विश्वास स्युंगनि कि उ गनिग स्यासि बनयंग|

यीशु गनीजा हुईग ताता कि उजा विश्वास स्युंगनि हंग पवित्र च्यागसिम कोरनी| खै गनी विश्वास स्युंगनि कि परमेश्वर ग तीगलौता सिरी, यीशु हि मसीह ल्है? खै गनी विश्वास स्युंगनि कि गनी तिग पापी ल्हिनी हंग हिदि कि गनी परमेश्वर चेन्तू गनीजा सजा दाम गै लायक अनि? खै गनी विश्वास स्युंगतनी कि गनिग पाप जा मिटाम दंची यीशु क्रूस कू सिचिस?

हंग गनी यीशु जा हंग जइ उस गनिग दंची स्युंगस उजा विश्वास स्युंगतन, ता गनी तिग मसीही ल्हिनी! सीना आफिग वमबंग गै राज्य कू थन गनीजा राज मुस्युंगयंग| थन परमेश्वर आफिग छंत गै राज्य कू गनी जा राज स्युंगयंग| उस गनीजा पाप स्युंगम स करुकातीस, जइजा गनी स्युंगतानी| उस गनीजा तिग नुद, बुद जीवन दास|

हंग गनी तिग मसीही ल्हिनि ता जइ यीशु सै स्युंगस उग कारण परमेश्वर सै गनिग पाप जा माफ कस्युंगतिस| थन, परमेश्वर तिग बयरी ग आशा गनीजा तिग बुद स्यासी मानगतास|

हंग गनी परमेश्वर गै स्यासि ल्हिनि हंग प्रभु यीशु गै सेवक अनि गनी अति कथा गै स्यरचिद स्युंग्म ग मन स्युंग्म परयंग जइ यीशु गनीजा सिखान्नस| बुदइ तिग मसीही ल्हिनि,सीना इता री पाप स्युंग्म दंची गनिग छक्का खइयंग| हंग परमेश्वर ज्या ज्यारी अति स्युंगता जइ उ ल्हैता कि उ स्युंगयंग| उ हंग गनी आफिग पाप जा मानेनी, ता उ गनीजा माफ स्युंगयंग| उ गनीजा पाप गै विरुद्ध घिसिम गै सामर्थ्य दायंग|

परमेश्वर गनीजा प्रार्थना स्युंग्म हंग उग बचन लबसीम गै दंची लैगताता| उ गनीजा गार विश्वासी मंग गै जरू छिग उग भक्ति स्युंग्म दंची री लेगतास| गनीजा गार मि मंग जा री बताम परयंग कि उस गनिग दंची खै स्युंगस| हंग गनी हिदि जम्मा लन स्युंग्म च्यंग, ता गनी उसीग तिग साचो स्यासी बनयंगनी|