50. यीशु थोकसिग राग अनि

लगभग निस्यी हजार यन स, दुनिया कू जम्मा बं कू मत्त स मत्त मंग मसीह यीशु गै बारे कू बुद फिन्न जा यंग तान्नस| कलीसिया उन्नति स्युंगतान्नस| यीशु सै वादा स्युंगस कि उ दुनिया गै अंत कू थोकसिग रायंग| हिना ल्हेग री उ इता थोकसिग मुराद अनि, हंग री उ आफिग वादे जा पूरो स्युंगयंग|

हिना अनि कि इंग यीशु गै थोकसिग रामग रिहनचिम स्युंगतातने, परमेश्वर इंग जा हिदि रीति स जीवन टांगम दंची इच्छा स्युंगता जइ पवित्र अनि हंग जइ उग इज्जत स्युंगता, हंग यीशु थंगजा कू स्योंगसी निस, हंग उस ल्यैस, “जीग चेले दुनिया कू जम्मा बं कू ची मि मंग जा परमेश्वर गै राज्य गै बारे कू बुद फिन प्रचार स्युंगयंग, हंग अंत रायंग|”

मत्तइ जाति मंग सै इता वास यीशु गै बारे कू मुयंग निस| स्वर्ग कू थोकसिग दिम ग लरी, यीशु सै मसीहियों मंग स उसी मि मंग जा बुद फिन सुनाम दंची ल्यैस जइ मि स हिदि खज्या मुयन्स| उस ल्यैस, “ दिनी हंग जम्मा जाति चि मि मंग जा चेला बनाम!“ हंग “जैम्म दंची खेती छत्त क्लच!”

यीशु सै हिदि री ल्यैस, “खमी मि ग ढंगमी आफिग रीथि च्यंग री पुद मुल्हैतरनी| हिदि दुनिया गै लच्यंग बुद मि मंग सै जीजा रुसू स्युंगस, हंग जिग कारण उसी गनीजा री सतायंगन्न हंग पच्यंगन्न| हिदि दुनिया कू गनी कांगत ल्यंगनी, हंग सारो ल्हीनी, खस्युंग कि जिस सीना जा कहरातीस जइ हिदि दुनिया कू राज स्युंगयंग हंग गनी अंत वास जीग विश्वासयोग्य बनेग निसिम, ता परमेश्वर गनीजा बचायंग!”

यीशु सै आफिग चेलों मंग जा हिदि संझाम दंची तिग कथा सुनास हंग दुनिया ग अंत ल्हैयंग ता मि मंग गै जरू खै ल्हैयंग, “खमी मि सै आफिग री कू बुद पिजे यिब्स| हंग उ लयकत निस ता उग बयरी रास हंग रजे गै पिजे गै गुन्दा कू सीर खचि पिजे रयग कयिबतिस, हंग हजू उ पिदिस|”

“हंग अति पिजे कजूस हंग ढंगमी मंग सै अति मि जा ल्यैस, ‘हे रीथि, गस ता आफिग री कू बुद पिजे यिब्स, हजू हिदूंग सीर ची पिजे खोंग जूस? ‘अति मि सै जबाब दास, ‘तिगई जीग बयरी उसीजा यिब्म चिंथ निस| हिदि जिग खमी बयरी अनि जइ मि स हिना स्युंगस|”’

उसी ढ़ंगमी मंग सै आफिग रीथि जा जबाब दास, ‘खै इंग्स सीर ची बोटू जा ठूग चांगतीम?’ अति रीथि सै ल्यैस, “माद| खस्युंग कि गनी हिना स्युंगनी ता गनी दूमा रजे री ठूंगतीयंग| चेतिम ज्या वास रिहनचिनी| हंग सीर ची बोटू जा किलग लाग फर स्युंगतानी खस्युंग कि गनी उसीजा मैं चितनी हंग रजे जिग बूंग कू रयग रा|’”

चेलों मंग सै हिदि कथा गै अर्थ मुसमझैस,हिना दंची उसिस यीशु स उसीजा संझाम दंची होस्यी स्युंगस| हंग,यीशु सै ल्यैस, “बुद पिजे यिब्द वाला मि मसीह अनि| री दुनिया अनि| बुद पिजे परमेश्वर गै राज्य गै मि मंग अनि |

“सीर ची बोटू अति यद मि, सीना गै मि मंग अनि, जइ सै सीर ची बोटू जा कयब्तीस| अति मि ग बयरी सीना अनि, चेतिम हिदि दुनिया गै अंत अनि|, हंग चेतिम स्युंगम वाला परमेश्वर गै स्वर्गदूतों अनि|”

“हंग दुनिया ग अंत ल्हैयंग हंग स्वर्गदूत उसी जम्मा मि मंग जा तिग जरू तीक्क स्युंगयंग जइ सीना ग अनि| उसी स्वर्गदूत उसीजा तिग मत्तइ लूंद मी कू चांगतीयंग| अतकू उसी मंग मत्त जेरमना दु:खु कू तीयंगन्न हंग आफिग सू घीयंग| हंग जइ मंग धर्मी अनि, जइ मि मंग सै यीशु ग स्यरचिद स्युंगस, उसी उसिग परमेश्वर बा गै राज्य कू नी नारुक्त चमकयंग|”

यीशु सै हिदि री ल्यैस कि उ दुनिया ग अंत ल्हैम स लरी थंगजा कू रायंग| उ हिना तरीका स थोकसिग रायंग जसो उ दिस| अर्थ, उग न्योरो उग गोमरंग नियंग, हंग उ तिम्भू कू कसा कू स्योंगसिग रायंग| हंग यीशु थोकसिग रायंग हंग, हर तिग मसीही जइ पझयंगद नीस| पझयंगद खचि टांगद ल्हैयंग हंग उजा तिम्भू कू छियंग|

हंग जइ मसीही इता री टांगद अनि उसी तिम्भू कू आंग कोरग दियंग हंग उसी गार मसीही मंग गै जरू नियंगन्न जइ सिचिम कू खचि टांगद कल्च| उसी जम्मा अतकू यीशु गै जरू नियंगन्न| उग निमफन, यीशु आफिग मि मंग गै जरू नियंगन्न| हंग उसी तिग जरू निसियंगन्न उसिग न्योरो राजयारी दंची पूरो शांति नियंग|

यीशु सै उसीजा विश्वास स्युंगद वाला हर तिग मि जा तिग मुकुट दाम ग वादा स्युंगस| उसी राजयारी दंची परमेश्वर गै जरू हर तिग बथो जा राज स्युंगन्न| उग न्योरो सिद्ध शांति ल्हैयंग|

हंग परमेश्वर उसी जम्मा ग न्याय स्युंगयंग जइ यीशु जा विश्वास मुस्युंगयंग| उ उसीजा नरक कू चांगतीयंग| अतकू उसी तीयंगन्न हंग आफिग सु घियंग, हंग उसी ज्या ज्यारी कांगत नियंगन्न| खज्या मुपुझूद वाला मी उसीजा लगाची कचिसीदीनियंग, हंग नबू उसीजा जाम स खज्या बंद मुलयंग|

हंग यीशु थोकसिग रायंग, हंग उ पूरो रीति स सीना जा हंग उसिग राजू जा नाश स्युंगतियंग| उ सीना जा नरक कू चांगतियंग| अतकू सीना ज्या ज्यारी दंची चिसीगनियंग, उसी जम्मा गै जरू जइ मि सै परमेश्वर ग कथा जा मानम गै बदला सीना गै निमफन दिमग चुनाव स्युंग निस|

खस्युंग कि आदम हंग हव्वा सै परमेश्वर ग आज्ञा मुमानस हंग पाप जा हिदि दुनीया कू रयग रास, परमेश्वर सै उजा श्राप दास हंग उजा नाश स्युंगम ग फैसला स्युंगस, हंग खज्या निछ परमेश्वर तिग नुद स्वर्ग हंग तिग नुद थंगजा ग रचना स्युंगयंग जइ सिद्ध ल्हैयंग|

यीशु हंग उसिग मि मंग अति नुद थंगजा कू स्योंगसियंग हंग उ राज्यारी दंची जम्मा बथों जा राज स्युंगयंग| उ मि मंग ग मैं स हर तिग मित्ती जा साफ स्युंगतियंग| थन खमी री कांगत री दुखु री मुलयंग| उसी मुतीयंगन्न|उसी मुकांगयंगन्न, हंग मुसिचियंगन्न, हंग अतकू खरी यद मुलयंग| यीशु आफिग राजू कू न्याय गै जरू, हंग शांति गै जरू राज स्युंगयंग| उ ज्या ज्यारी दंची आफिग मि मंग गै जरू स्योंगसियंग|