7. परमेश्वर याकूब जा आशीर्वाद दास

हंग उसी सैन्द पूद लिच्च, ता याकूब जा चिमजा स्योंगसिम बुद तैस, हंग एसाव जा जानवर जा सतिम बुद तैत| रिबका सै याकूब जा बुदतेस, हंग इसहाक सै एसाव जा बुदतेस|

तिज्या ची, एसाव सतिम स्युंग थौकसिग रास ता उ मत्त खिग निस। एसाव सै याकूब जा ल्यैस, “जइ गस दुकलंग कस्युंगद अनि उजा खची दुमा दुकलंग जीजा दा”। याकूब सै जवाब दास, “लरी जीजा हिदी वादा स्युंगयो कि लच्यंग पूद सिरि ल्हिम गै कारण स हर ति ग बथौ जइ गजा चींथ निस अति जम्मा गै जीजा दायंग|” हिना दंची एसाव सै अति जम्मा बथौ याकूब जा दाम गै वादा कस्युंग। हंग याकूब सै उजा दुमा दुक्लंग दास।

इसहाक एसाव जा आशीर्वाद दाम चींथ निस। हंग हिदी च्यंग लरी कि उस हिना स्युंगस, रिबका हंग याकूब सै याकूब जा एसाव लैम्ह गै ढोंग स्युंग उग जरू धोखा स्युंगस। इसहाक स्यांगत निस हंग थन औंग मुतरद निस। हिना दंची याकूब सै एसाव गै खसै-पसै चूकसिग हंग माला गै कौ खंगै अफिग बाना हंग लाकू घिस|

याकूब इसहाक गै नौंकू रास हंग ल्यैस, “जी एसाव ल्हिय। हिना दंची रयस कि गै जीजा आशीर्वाद दा|” हंग इसहाक सै माला गै छम्म जा महसूस स्युंगता हंग खसै-पसै जा निप्स, ता उस चिचिस कि उ एसाव अनि हंग उजा आशीष दास।

एसाव सै याकूब जा बैर तास खस्युंग कि याकूब सै उग लरी ची सिरि गै अख्तयार हंग जरूइ उग आशीर्वाद जा री खुग पिकोरस। हिना दंची उस उसीग बा गै सिचिम गै निमफन याकूब जा सतिम दंची चिचिग निस।

हंग रिबका सै एसाव गै कथा कयन्स। हिना दंची उस हंग इसहाक सै याकूब जा उग स्यासिमंग गै जरू स्योंगसिम दंची मत्त वथ कथिरस।

याकूब उलंग यन वास रिबका गै स्यासिमंग जरू निस। अति बक्तर उस ढामी कस्यूंगस हंग चैने सिरि मंग जा हंग तिग चमै जन्मास। परमेश्वर सै उजा मत्त स्यंगमी कबनास।

नस्सा यन वास कनान कू अफिग चिम जा खची वानम स्योंगसिम गै निमफन, याकूब अफिग मौमाल, अफिग ढंगमी मंग, हंग अफिग लै लुकच ग पूरो यम्बा गै जरू थोकसिग पिरास।

याकूब हिना दंची मत्त कजैरक निस खस्युंग कि उस चिचिस कि एसाव थन री उजा पच्यंगम चींथ निस। हिना दंची उस नासौ नारुक्त लै लुकच गै यम्बा एसाव गै निद कू थिरस। जइ ढंग्मी अति यम्बा कोरगदिस उसीस ल्यैस, “नग ढंग्मी याकूब, हिदी लै लूकच जा गजा दाति। उ छांटोइ राग निस|”

हंग एसाव थन याकूब जा नुकसान स्युंगम मुचिंथ निस। हिदी गै बदला, उ उजा तिच्चु हजू तिंग मत्त तख्ख निस। उग निमफन याकूब कनान राजू कू शांति स स्योंगसिस। हंग इसहाक पझयंगस हंग याकूब जी एसाव सै उजा सा कू कितांगस। वाचा ग वादा जइ परमेश्वर सै अब्राहम जा कस्युंगसिद निस उसी थन इसहाक स याकूब जा पिराद निस।