20. थामे लाअ्का कालाउ घुरिपाका

इस्राएलको राइजि कालाउ यहुदाको राइजि, न्हेमि दोङ परमेस्वरको बिरोधता पाप पाहि। परमेस्वर इम्बालाइ दोफा सिनाइ लाखता जिङका कारार भङग पाहि। परमेस्वर इम्बालाइहेङ पाप पालि लाअ्लि कालाउ पुरन: आरोङ वासेहेङ पुजिलि दोअ्तेङ चेताउनि पिलिको भाअ्सिङ ताइको आगमबक्तागेलाइहेङ दिङगिल्हि, कालाउ इम्बालाइ आग्याकारि जेङलि इन्कार पाहि।

ओदोङ भाअ्सिङ परमेस्वर न्हेनोङ दोङ राइजिगेलाइहेङ इम्बालाइको सतुरु पाहासो नासालि जेङलि पितेङ दन्ड पिहि। एनोङ सरबुङसाइका कालाउ क्रुर रास्ट आस्सुरि साम्राज्य इस्राएलको राइजि नासा पाहि। आस्सुरिगेलाइ इस्राएल रास्टको हेन्जा द्याङगेलाइहेङ मारा पाहि, ओबालाइको मेनाङ जाङका आमेनेगेलाइ गोताङ चुम्पुहि, कालाउ सारभिको हेन्जा भागगेलाइ ओपापिहि।

आस्सुरिगेलाइ झाराङ आगुवागेलाइ, हिकाचाका द्याङगेलाइ, कालाउ सिप हिका द्याङगेलाइहेङ जोम्पातेङ कालाउ ओबालाइहेङ आस्सुरको सारभिता चुम्पुतेङ हानिहि। खिनिङ मारा माजेङका आति गरिब इस्राएलिको राइता बाकि हि।

कालाउ आस्सुरिगेलाइ इस्राएलको राइजिता बिदेसिगेलाइहेङ चुमातेङ ताअ्हि। बिदेसिगेलाइ भाअ्पाका सहरगेलाइ आरोङ बानाइहि इस्राएलगेलाइ दोफा बिहु पाहि, जेथे इन्ता लाअ्धिका हिघाहि। बिदेसिगेलाइहेङ बिहु पाका इस्राएलि द्याङगेलाइहेङ ‘सामारि’ दोअ्हि।

यहुदाको द्याङगेलाइ परमेस्वर ह्रुता खाङधुरि मापाका कालाउ वाको आग्याकारि मान्थुकानाङ हेसा वा इस्राएलको राइजिहेङ दन्ड पिहि दोअ्का तिङहि। कालाउबुङ इम्बालाइ आझाइ कानानि दिरगेलाइता मुर्तिगेलाइ पुजिहि। परमेस्वर इम्बालाइहेङ चेताउनि पिलि आगमबक्ता पिगिल्हि, कालाउ इम्बालाइ हिङलि इन्कार पाहि।

आस्सुरिगेलाइ इस्राएलहेङ नासा पाका १०० बासार न्हुसो परमेस्वर बेबिलोनको राजा, नबुकदनेसरहेङ यहुदाको राइजिता झामिरिलि दिङगिल्हि। बेबेलोन एनोङ सारबुङसाइका साम्राज्य हिघाहि। यहुदाको राजा नबूकदनेसरको बान्धाइति जेङलि कालाउ गोताङ बासार वासेहेङ हेन्जा ताका तिरिलि सहमति जेङहि।

कालाउ आले बासार न्हुसो, यहुदाको राजा बेबिलोनको बिरोधता हुल्दुङगा पाहि। ओदोङ भाअ्सिङ, बेबिलोनिगेलाइ आरोङ लोहि कालाउ यहुदाको राइजिहेङ झामिरिहि। इम्बालाइ यरुसेलेमको सहर कब्जा पाहि, मुन्दिर ह्रापिहि, कालाउ सहर कालाउ मुन्दिरता हिका गोताङ सम्पतिगेलाइ चुम्पुहि।

हुल्दुङगा पाका कारन यहुदाको राजाहेङ दन्ड स्वरुप नबुकदनेसरको सिपालाइ वाको चानगेलाइहेङ वाकोङ आगाता सेअ्पिहि कालाउ वासेहेङ कान्हाँ

नबुकदनेसर कालाउ वाको फोउज बालि थिङलिको भाअ्सिङ गरिब खाङतेङ गरिबगेलाइ बाहेक यहुदाको राइजिको प्राय: झाराङ द्याङगेलाइहेङ बेबिलोनता चुम्पुहि्। सोमोइको इदोइ आबधिता जेता परमेस्वरको द्याङगेलाइ प्रतिग्याको मुलुक लाअ्लि बाध्या जेङहि, इदोइहोइहेङ दोङ थामे लाअ्का दोअ्खे।

परमेस्वर द्याङगेलाइहेङ इम्बालाइको पापको कारान थामे लाअ्काता दुरे चुम्पुतेङ दन्ड पिलाउ बुङ वा इम्बालाइहेङ कालाउ ताइको प्रतिग्यागेलाइ निल्का मान्थुघाखे। भरु परमेस्वर लागातार रुपता आगमबक्ता पाहासो ताइको द्याङगेलाइहेङ सामाराइलि कालाउ नुइ धुइका काम जारि ताअ्हि। सुम कुरि ते बासार न्हुसो इम्बालाइ आरोङ प्रतिग्याको मुलुकता घुरियाङ दोअ्तेङ वा प्रतिग्या पाहि।

माकुलाउ बुङ सुम कुरि ते बासार न्हुसो फारिसिगेलाइको राजा, कोरेस बेबिलोनहेङ हारिपाहि, ओदोङ भाअ्सिङ फारिसि साम्राज्य बेबिलोनि साम्राज्यहेङ आरोङ बानाइहि। एला इस्राएलिगेलाइहेङ यहुदिगेलाइ दोअ्घाहि कालाउ इम्बालाइ मध्ये हेन्जा जोसो ताइको पुराङ जिबन बेबिलोनता बितिपाका हिघाहि। आधिमि आराङ यहुदिगेलाइ खिनिङ यहुदाको मुलुकको ख्याल ताअ्हि।

फारिसि सम्राज्य एमि सरबुङसाइका सम्राज्य हिघाहि कालाउ इम्बालाइ ताइमि कब्जा पाका द्याङगेलाइ प्रति क्रिपालु हिघाहि। कोरेस फारिसिगेलाइको राजा जेङका आले सोमोइ न्हुसो, वा हासुलाउ बुङ यहुदिगेलाइ यहुदा घुरिलि भोखे पानु फारिसि सम्राज्य लाअ्तेङ यहुदा घुरिलि दोअ्का आदेस जारि पापिहि। वा इम्बालाइहेङ मुन्दिरको आरोङ धाम्लिको भाअ्सिङ ताका-पाइसा सुधाङ पिहि।

जेलाउ द्याङगेलाइ यरुसलेमता थुकालि लोहि, इम्बालाइ मुन्दिर कालाउ सहरको कोरपाहाङ बेरेम आरोङ धाम्हि। इम्बालाइ ह्रुता आझै बुङ आरु दोङ राइजि सासन पाअ्तेङ हिलाउ बुङ,एखे आरोङ इम्बालाइ प्रतिग्याको मुलुकता हिलि कालाउ इङको मुन्दिरता आराधाना पालि निङहि।