19. परमेस्वरको बक्तागेलाइ

इस्राएलिगेलाइको इतिहास भरि दोङ, परमेस्वर इम्बालाइकोता आगमबक्तागेलाइ दिङगिल्पिहि। परमेस्वरको आगमबक्तागेलाइ परमेस्वरसो सन्देसगेलाइ हिङघाखे कालाउ वाको सन्देसगेलाइ द्याङगेलाइहेङ दोअ्पिघाखे।

आहाब राजा इस्राएलता सासन पाअ्तेङ हिका बेला एलिया एमि परमेस्वरको आगमबक्ता हिघाहि। आहाब एमि दुस्ट द्याङ हिघाहि जाइ द्याङगेलाइहेङ बाल मिङ पाका दिरको मुर्ति पुजा पालि हाउसाइ पाघाहि। एलिया आहाबहेङ दोअ्हि, “काङको बचन बिना गोताङ इस्राएलको राइजि भरि ना ते सित परियावा ना ते वाइ दोङ ल्वावा।” इदोइहोइ आहाबहेङ हेन्जा क्रोधित बानाइहि।

परमेस्वर एलियाहेङ आहाबसो म्होलि चाका-मान्दा थामेता एनोङ खोल्सा हिका थामेता हानिलि दोअ्हि, जाइ वासेहेङ मारा पालि खाङघाखे। दिनाङ ह्रिमा कालाउ दिनाङ बेलालाउ, कावा वासेहेङ तोले कालाउ बिहा चुमा पिघाहि। आहाब कालाउ वाको सिपालाइ एलियाहेङ भोहि कालाउ इम्बालाइ वासेहेङ निङलि मादोहि। इन्ताको सेङकापन ओथे उग्र हिघाहि कि इङको खोल्साको चि बुङ आखिरता सिइतेङ हानिहि।

ओदोङ भाअ्सिङ एलिया एमि भेरपाको सारभिता हानिहि। इङको सारभिता एमि के सिका बेबाल कालाउ वाको चान आनिकालहोइ चाका-आम्का चालिसो होइका हिघाहि। कालाउ इम्बालाइ एलियाहेङ ख्याल ताअ्हि, कालाउ परमेस्वर इम्बालाइको भाअ्सिङ चाका-आम्का आमेनेगेलाइ जुराइ पापिहि। इम्बालाइको आरिको तोले कालाउ ढोङग्रोको चुइति हेलाउ बुङ माओताहि। पुराङ आनिकालको सोमोइ भरि इम्बालाइ दोफा चाका-आम्का हिघाहि। एलिया इन्ता आले बासार थेकापा हि।

सुम बासार आधा न्हुसो, परमेस्वर एलियाहेङ इस्राएलको राइजिता घुरितेङ हानिलि कालाउ आहाब दोफा काथा पालि दोअ्हि हाइपालिपानु वा आरोङ वाइ पिगिल्लि तेङका हिघाहि। जेलाउ आहाब एलियाहेङ तिङहि, वा दोअ्हि, “नाअ् दोङ हिना इदोइ गोताङ समस्या चुमाका द्याङ।

इस्राएल राइजिको द्याङगेलाइ, कालाउ बालको ४५० झाना आगमबक्तागेलाइ सुधाङ चुम्पुतेङ झाराङ कर्मेल लाखता लोहि। एलिया द्याङगेलाइहेङ दोअ्हि, “नेलाइ हेलाउ थेकापा ताइको मन बदलितेङ हिस्वाना? जेसापा यहोवा परमेस्वर हि पानु, वाको सेवा पासु।”

कालाउ एलिया बालको अगमबक्तागेलाइहेङ दोअ्हि, “एनोङ साढे पिया सेअ् कालाउ इङकोहेङ भोगको रुपता तियार पासु, कालाउ इङकोहेङ मेता माओपासु। का बुङ एन्साङ पाङका। जेदोङ परमेस्वर मे होइ जोबाफ प्याङ, ओदोङ परमेस्वर सत्ये हि।” ओदोङ भाअ्सिङ बालको पुजारिगेलाइ भोग पिलि तियार पाहि कालाउ मे चाहि मालागाइहि।

कालाउ बालको आगमबक्तागेलाइ एसा दोअ्काताङ प्रार्थाना पाहि, “हे बाल, केलाइको काथा हिङपि।”

दिनाको आन्तिमता, एलिया परमेस्वरको भाअ्सिङ एनोङ भोग तियार पाहि। कालाउ वा द्याङगेलाइहेङ तेन्हे बार्का घाल्सेता चि चुमातेङ भोगको बिहा हुता, मिसिङको जेङग्रागेलाइ कालाउ भोनोइ सुधाङ कालाउ वेदिको वरिपरिको गोताङ भाग पुर्न रुपहोइ माझा भरि चि हुलि लागाइ हि।

कालाउ एलिया प्रार्थाना पाहि, “यहोवा आब्राहाम, इसाहाक कालाउ याकुबको परमेस्वर, नानि केलाइहेङ नाअ् दोङ इस्राएलको परमेस्वर हिना कालाउ का नाङको बान्धाइति हिघा दोअ्तेङ तिङपापि। कासेहेङ उत्तरा पि कालाउ कि इदोइ द्याङगेलाइ या ग्याको कि नादोङ एनोङ खिनिङ सत्ये परमेस्वर हिना।”

कालाउ एन्सालाउ दोङ, आकाससो मे हुलहि कालाउ बिहा, मिसिङको धेङग्रागेलाइ,उन्ठुइगेलाइ,भोनोइ कालाउ बेदि वरिपरि हिका चि सुधाङ ओपापिहि। जेलाउ द्याङगेलाइ या तिङहि, इम्बालाइ भोनोइता तुघुरहि कालाउ दोअ्हि, “यहोवे परमेस्वर हि।”

कालाउ एलिया दोअ्हि, “बालको हासु बुङ आगमबक्तागेलाइहेङ खाअ्लि मापिसु।”

कालाउ एलिया राजा आहाबहेङ दोअ्हि, “ओदोङ घुरि सहरता घुरितेङ हानिसु, हाइपालिपानु वाइ लोदोङखे।” ए घुरिङता आकास दा:का जेङतेङ लोहि, कालाउ बारका वाइ लोलि तेङहि। यहोबा खारा लाअ्काको आन्ता पाका हिघाहि कालाउ वा दोङ एमि खिनिङ सत्ये परमेस्वर हि दोअ्तेङ प्रमानित पाहि।

एलियाको सोमोइ न्हुसो, परमेस्वर एलिसा मिङ पाका द्याङहेङ वाको आगमबक्ताको रुपता साल्हि। परमेस्वर एलिया पाहासो थुप्रङ भारबुसाइका कामगेलाइ पाहि। इङको मध्ये एमि भारबुसाइका नामानकोता जेङलि लोहि, जाइ सतुरुगेलाइको एमि सिपाइ बारका आधिकारि हिघाहि कालाउ एनोङ थिलि गोइका धालेको रोगहोइ थाला जेङका हिघाहि। वा एलिसाको बारेता हिङका हिनाङ वाकोता हानिहि कालाउ ताइमिहेङ एल्पा पिलि दोअ्तेङ सेउपाहि। एलिसा नामानहेङ न्हि पोल्टि थेकापा ताइमिहेङ यर्दन झोराता डुबिलि दोअ्हि।

लाम्फा ते नामान चेरताम्पाका हिघाहि कालाउ एन्सा पालि राजि मान्थुघाहि हाइपालिपानु या ते एनोङ आनाइ भाइकाङ तिङका हिघाहि। कालाउ न्हुसो वा ताइको मन भाङघाइ हि कालाउ ताइमिहेङ न्हिखे यर्दन झोराता डुबि पाहि। जेलाउ नामान आन्तिम पोल्टि ह्रुता लोहि, वाको धाले पुर्न रुपता एल्लि दोका हिघाहि।

परमेस्वर आरु हेन्जा आगमबक्तागेलाइ दिङगिल्हि। इम्बालाइ झाराङ द्याङगेलाइहेङ मुर्तिपुजाहेङ लाअ्लि कालाउ बो ह्रुता न्याय कालाउ दाया तिङपालि सेउपाहि। आगमबक्तागेलाइ द्याङगेलाइहेङ जेसापा ओबालाइ दुस्ट काम पालि माअ्लानु कालाउ परमेस्वरको आनाग्याकारि जेङहि पानु, परमेस्वर ओबालाइहेङ दुसियाङ, कालाउ ओबालाइहेङ दन्ड प्याङका दोअ्तेङ चेतावनि पिहि।

हेन्जा जोसो सोमोइ, द्याङगेलाइ परमेस्वरको काथा माहिङपिहि। इम्बालाइ जेलाउ बुङ आगमबक्तागेलाइहेङ मारेम्का ब्यभार पाहि कालाउ जेलाउ सेलाउ ते इम्बालाइहेङ मारा बुङ पाहि। एखे, यर्मिया आगमबक्ताहेङ चि सि:का च्वाता ह्वाहि कालाउ सिलि इन्ताङ लाअ्पिधिइ। वा च्वाको लिताता हिका दाल्दालिता भासिहि, कालाउ राजा वा ह्रुता दाया तिङपाहि कालाउ ताइको चाकारियागेलाइहेङ यार्मिया सिलि खान्तेङ लाम्फा च्वासो ओल्लेपालि लागाइ हि।

द्याङगेलाइ आगमबक्तागेलाइहेङ मन्दा मातालाउ बुङ ओबालाइ परमेस्वरको भाअ्सिङ नुइ धुइतेङ हि। परमेस्वर भारि माघुरिनु द्याङगेलाइहेङ नासा पावा दोअ्तेङ ओबालाइ चेतावनि पितेङदोङहि। ओबालाइ द्याङगेलाइहेङ परमेस्वरको मसिह ल्वाङ दोअ्का प्रतिग्याको बुङ फोम पापाहि।