18. खेङन्हाका राइजि

हेन्जा बासार न्हुसो दाउद सिहि कालाउ वाको चान सोलोमन इस्राएललि ह्रुता सासन पालि तेङहि। परमेस्वर सोलोमन दोफा नुइ धुइहि कालाउ वासेहेङ झाराङ खान्तेङ लाम्फा हाइ काथाको चाहाना हि दोअ्तेङ हिअ्हि। कालाउ सोलोमन चाहि ग्यान बुद्दि ह्रेहि कालाउ परमेस्वर खुसि जेङहि कालाउ वासेहेङ सुमिङकोङ झाराङ खान्तेङ बुद्दिमान द्याङ बानाइहि। सोलोमन हेन्जा काथागेलाइ धिरहि कालाउ एनोङ बुद्दिमान न्याय कारता जेङहि। परमेस्वर वासेहेङ हेन्जा हिकाचाका बानाइहि।

यरुसलेमता, सोलोमन इङको मुन्दिर बानाइहि जेदोङ वाको आबा दाउद बानाइलि योजाना पाका हिघाहि कालाउ इङकोको भाअ्सिङ आमेनेगेलाइ जोम्पाका हिघाहि। द्याङगेलाइ एला परमेस्वरहेङ पुजिका कालाउ भेतिका खोपाराको साट्टाता मुन्दिरता भोगगेलाइ चाढाइहि। परमेस्वर मुन्दिरता हिघाहि। कालाउ वा ताइको द्याङगेलाइ दोफा हि।

कालाउ सोलोमन बो सारभिको बेजानगेलाइ दोफा प्रेम पाहि। वा माकुलाउ बुङ १,००० झाना बेजानगेलाइ दोफा बिहु पाहि कालाउ वा परमेस्वरको आनाग्याकारि जेङहि। इदोइ बेजानगेलाइ मध्ये हेन्जा झाना बो सारभिगेलाइसो लोका हिघाहि कालाउ ताइमि दोफा ताइको दिरगेलाइ बुङ चुमाका हिघाहि जाइहेङ इम्बालाइ पुजितेङ हि। जेलाउ सोलोमन वाराङ जेङहि, वा बुङ इम्बालाइको दिरगेलाइहेङ पुजिलि तेङहि।

परमेस्वर सोलोमन दोफा चेरताम्पाका हिघाहि कालाउ वाको खाङधुरि मापाका को कारन दन्डको स्वरुप, वा सोलोमन सिका न्हुसो इस्राएल रास्टहेङ न्हे राइजिता खेङलि प्रतिग्या पाहि।

सोलोमन सिकाको न्हुसो वाको चान, रहोवाम, इस्राएलका राजा जेङहि। रहोवाम एमि आनाइ द्याङ हिघाहि। इस्राएल रास्टको गोताङ द्याङगेलाइ वासेहेङ राइजि आभिसेक पालि एदोफाङ जोम्हि। इम्बालाइ रहोवामहेङ सोलोमन राजा थाङका परिस्रोम पालि लगाइका कालाउ हेन्जा पोत तिरिलि लागाइका दोअ्तेङ गुनासो पाहि।

रहोबाम आनाइ पुर्वक इम्बालाइहेङ जोबाफ पिहि, “काङको आबा थाङका परिस्रोम पालि लगाइका दोअ्तेङ नेलाइ सोचिका हिसुना, कालाउ का नेलाइहेङ वाको खान्तेङ हेन्जा बढि परिस्रोम पालि लगायाङका कालाउ वा खान्तेङ हेन्जा सजाइ प्याङका।”

इस्राएल रास्टको कुलगेलाइ मध्ये तेलोङ कुलगेलाइ रहोबामको बिरोधता हुलदुङका पाहि। खिनिङ न्हे कुल खिनिङ वा प्रति खाङधुरि योग्य जेङहि। या न्हे कुलगेलाइ दोङ यहुदाको रास्ट जेङहि।

रहोबामको बिरोधता हुलदुङगा पाका इस्राएलको आरु तेलोङ कुल, यरोबाम मिङ पाका एमि द्याङहेङ ताइको राजा जेङलि नियुक्त पाहि। इम्बालाइ ताइको राइजि सारभिको माहेको भागता बानाइहि कालाउ इङकोहेङ इस्राएलको राइजि दोअ्न्हाहि।

यरोबाम परमेस्वरको बिरोधता हुलदुङगा पाहि कालाउ द्याङगेलाइहेङ पाप पालि लागाइहि। यहुदाको राइजिता हिका मुन्दिरता हानितेङ परमेस्वरको आराधाना पापलिको साट्टा वा द्याङगेलाइको भाअ्सिङ आराधाना पालि न्हेलोङ मुर्तिगेलाइ बानाइहि।

यहुदा कालाउ इस्राएलको राइजिगेलाइ दुस्मन जेङहि कालाउ घुरिघुरि एमिसो-भेनेङको बिरोधता धुम पाअ्तेङ हि।

इस्राएलको नावा राइजिता, झाराङ राजागेलाइ दुस्ट हिघाहि। इदोइ राजागेलाइ मध्ये हेन्जा झाना आरु इस्राएलिगेलाइ पाहासो सेअ्न्हाका जाइ ओबालाइको थामेता राजा जेङलि भोगाखे।

इस्राएल राइजिको गोताङ राजागेलाइ कालाउ हेन्जा जोसो द्याङगेलाइ मुर्ति पुजा पाहि। ओबालाइको मुर्ति पुजाको कामगेलाइता हेन्जा जोसो कासिबिरि कालाउ जेलाउ- सेलाउ ते जामालको भोग सुधाङ झ्वाइनापाहि।

यहुदाको राजागेलाइ दाउदको सान्तानगेलाइ हिघाहि। इदोइ राजागेलाइ मध्ये आधेमि आसल द्याङगेलाइ हिघाहि जाइ न्याय पुर्बक सासन पाहि कालाउ परमेस्वरहेङ पुजिहि। आधेमि राजागेलाइ ते धाताइका दिरगेलाइको भाअ्सिङ ताइकोङ जामालाइ सुधाङ भोग पिहि। यहुदाको हेन्जा जोसो द्याङगेलाइ बुङ परमेस्वरको बिरोधता हुलदुङगा पाहि कालाउ आरु दिरगेलाइहेङ पुजिहि।