17. दाउद दोफा परमेस्वरको कारार

साउल इस्राएलको लाङति राजा हिघाहि। वा द्याङगेलाइ भोका कोनिङ झाउका जारा-राउका कालाउ कोइनाका द्याङ हिघाहि। लाम्फाको आले बासार साउल इस्राएलि ह्रुता सासन पाका एमि आसल राजा हिघाहि। कालाउ न्हुसो वा एनोङ दुस्ट द्याङ जेङतेङ परमेस्वरको आनाग्याकारि जेङहि, ओदोङ भाअ्सिङ परमेस्वर भेनेङ द्याङहेङ चुनिहि जाइ एनि वाको साट्टाता राजा जेङदोङघाहि।

परमेस्वर दाउद मिङ पाका एमि वाजान इस्राएलिहेङ साउल न्हुसो राजा जेङलिको भाअ्सिङ चुनिहि। दाउद बेथलेहेम मिङ पाका देराता हिका एमि लाखुरिया हिघाहि। ताइको आबाको भेडागेलाइ घोकाताङ पालाउ हेन्जा खेप वा ताइको भेडागेलाइ ह्रुता झामिरिलि भोका खुवा कालाउ नाइबेरि भाइका गुपुसहेङ सेअ्हि। दाउद मोनोइ कालाउ धर्मि द्याङ हिघाहि जाइ परमेस्वरता भरोसा पाघाखे कालाउ वाको आग्या किघाखे।

दाउद एमि माहान सिपाइ कालाउ आगुवा जेङहि। जेलाउ दाउद धाना वाजान हिघाहि, वा गोल्यत मिङ हिका एमि आराराका द्याङ दोफा धुम पाहि। गोल्यत एमि तालिम प्राप्त, कालाउ हेन्जा बलियाका माकुलाउ बुङ सुम मिटर झोको झाउका द्याङ हिघाहि।

साउल दाउद दोफा द्याङगेलाइको प्रेमको डाहि जेङहि। हेन्जा पोल्टि साउल दाउदहेङ सेअ्लि खाङहि, ओदोङ भाअ्सिङ वा साउलसो म्होहि। एनि साउल दाउदहेङ सेअ्लि वासेहेङ भोतेङ हिघाहि। साउल एनोङ आरदाङ लिता दुल्हि जेता दाउद साउलसो म्होतेङ योम्तेङ हिघाहि, कालाउ साउल वासेहेङ मातिङहि। एन्सालाउ दाउद साउलको भेरपाङ हिघाहि कालाउ वासेहेङ सेअ्लि बुङ दोधाङ, कालाउ वा एन्सा मापाहि। भरु दाउद, वासेहेङ मारा पाअ्तेङ ताइमि राजा जेङलि माभोघाखे दोअ्का प्रमानित पालिको भाअ्सिङ साउलको लोखोनको आधे भाग पोतेङ चुमाहि।

आन्तिमता, साउल धुमता सिहि, कालाउ दाउद इस्राएलको राजा जेङहि। वा एमि आसल राजा हिघाहि, कालाउ द्याङगेलाइ वासेहेङ प्रेम पाघाखे। परमेस्वर दाउदहेङ आसिस पिहि कालाउ वासेहेङ सफल बानाइहि। दाउद हेन्जा धुमगेलाइ पाहि कालाउ परमेस्वर वासेहेङ इस्राएलको सतरुगेलाइहेङ हारिपालि साघाइहि। दाउद यरुसलेम कब्जा पाहि कालाउ इङकोहेङ वाको राजधानि सहर बानाइहि। दाउदको सासन कालता इस्राएल एनोङ सरबुङ साइका कालाउ हिकाचाअ्का रास्ट जेङहि।

दाउद एनोङ मुन्दिर बानाइलि भोघाखे जेता गोताङ इस्राएलिगेलाइ परमेस्वरको आराधाना पलि दोधाङ कालाउ वासेहेङ भोगगेलाइ चढाइलि दोधाङ। माकुलाउ बुङ ४०० बासार थेकापा द्याङगेलाइ परमेस्वरको आराधाना पाका कालाउ भोगगेलाइ चढाइका काम भेतिका खोपाराता पाकाताङ लोका हिघाहि, जेदोङ मोसा बानाइका हिघाहि।

कालाउ परमेस्वर नातान मिङ हिका एमि अगमबक्ताहेङ दाउदकोता इदोइ बानाल पिगिल्हि, “नाअ् धुमको द्याङ हिनाङ, काङको भाअ्सिङ नाअ् इदोइ मुन्दिर बानाइयाना। नाङको चान यासेहेङ बानाइयावा। कालाउ, का नासेहेङ नुगामारि आसिस प्याङका। नाङको सान्तानगेलाइ मध्ये एमि चाहि जेलाउलाउको भाअ्सिङ राजाको रुपता काङको द्याङगेलाइ ह्रुता सासन पावा।”

जेलाउ दाउद या काथागेलाइ हिङहि, एन्सालाउदोङ परमेस्वरहेङ धन्यबाद पिहि कालाउ वाको बाखानाइ पाहि हाइपालिपानु वा दाउद हेङ इङको माहान आदार कालाउ हेन्जा आसिसगेलाइको प्रतिग्या पाका हिघाहि। दाउदहेङ इदोइ काथा हेलाउ जेनाङ दोअ्तेङ थाहा मान्थुघाहि कालाउ जेलाउ इदोइ काथागेलाइ जेङहि, इस्राएलिगेलाइ मसिह लोलि खान्तेङ लाम्फा माकुलाउ बुङ १,००० बासार सोमोइ ह्रुम्लि गोइका हिघाहि।

दाउद हेन्जा बासार थेकापा न्याय कालाउ खाङधुरि योग्यतासोङ सासन पाहि,कालाउ परमेस्वर वासेहेङ आसिस पिहि। कालाउ बुङ, ताइको जिबन कालको आन्त्य भारि वा परमेस्वरको बिरोधता थिलि गोइका पाप पाहि।

एनि, जेलाउ दाउदको गोताङ सिपाइगेलाइ धुम पालिको भाअ्सिङ ताइको साअ्सो दुरे हानिका हिघाहि, वा ताइको दरबारसो बाहार खाङहि कालाउ एमि कोइनाका बेबालहेङ चिउतेङ हिका तिङहि। वाको मिङ बेतसेबा हिघाहि।

बोसोङ खाङलिको सट्टा, दाउद हासुहेङ बुङ उङको बेबालहेङ वाकोता चुमालि द्याङगेलाइ दिङगिल्हि। दाउद वाको दोफा जिम्हि कालाउ वासेहेङ वाको साअ्ता घुरि पागिल्हि। आले सोमोइ न्हुसो बेतसेबा दाउदहेङ ताइमि गान्धि तेअ्काको सन्देस पिगिल्हि।

बेतसेबाको के, उरियाह मिङ पाका द्याङ, दाउदको सिपालाइ मध्येको एमि उत्तम सिपाइ हिघाहि। दाउद उरियाहेङ धुमसो घुरि पाअ्तेङ चुमालि काइहि कालाउ वासेहेङ ताइको बे कोता हानिलि सेउपाहि कालाउ बुङ उरिया धुमता बाकि हिका ताइको सिपालाइ लाअ्तेङ ताइको साअ् हानिलि इन्कार पाहि। ओदोङ भाअ्सिङ दाउद उरियाहेङ धुमसो सिता घुरिपाहि कालाउ प्रधान सेनापतिगेलाइ जेता सतरुगेलाइ झाराङ खान्तेङ बलियाका हि, इन्ता वासेहेङ ताअ्लि आदेस पिहि कालाउ कि वा सेअ्न्हाको।

उरियाहा सेअ्न्हातेङ न्हुसो दाउद बेतसेबाहेङ बिहु पाहि। न्हुसो, वा दाउदको भाअ्सिङ चान जोलोम पिहि। दाउदको पाका कामको परमेस्वर हेन्जा चेर ताम्पाहि, ओदोङ भाअ्सिङ वा नातान आगमबक्ताहेङ वाको पाप हेथे दुस्ट हिघाहि दोअ्तेङ बाताइपिलि दाउदकोता हानिहि। दाउद ताइको पापको भाअ्सिङ पाप लाअ्तेङ परमेस्वर भारि घुरिहि कालाउ परमेस्वर वासेहेङ स्यामा पिहि। ताइको बाकि जिबन भरि दाउद कस्टको घाडिता बुङ परमेस्वरहेङ पिताइतेङ कालाउ आग्याकारि जेङहि।

कालाउ दाउदको पाका पापको दन्ड स्वरुप, वाको जामाल सिहि। दाउदको बाकि जिबन भरि वाको जाहानता कलह जेङतेङ हि कालाउ दाउदको तागत बुङ राम्हि जाइको कारान वा ओसारापा हुइहि। दाउद परमे्वरता खाङधुरि योग्य माहिलाउ बुङ परमेस्वर ताइको प्रतिग्यागेलाइता आझाइ खाङधुरि योग्य हिघाहि। न्हुसो,दाउद कालाउ बेतसेबाको भेनेङ चान जेङहि कालाउ इम्बालाइ वाको मिङ सोलोमन ताअ्पिहि।