16. लाअ्पाकालाइ

यहोसु सिकाको न्हुसो, इस्रालिगेलाइ आनाग्याकारि जेङहि कालाउ बाकि हिका कानानिगेलाइहेङ ना ते इन्तासो दिगिल्हि ना ते परमेवरको आग्यादोङ केम्हि। इस्राएलिगेलाइ याहोबे, एनोङदोङ सत्ये परमेस्वरहेङ पुजिलिको सातो कानानि दिरगेलाइहेङ पुजिलि तेङहि। इस्राएलिगेलाइको हिदोइबुङ राजा मान्थुघाहि, ओदोङ भाअ्सिङ झाराङ ताइमिहेङ जेदोङ ठिक लागिखे, ओदोङ पाहि।

परमेस्वरहेङ मातेरितेङ हिका नाङ वा सतुरुगेलाइहेङ इस्राएलिगेलाइ ह्रुता बिजोइ पितेङ दन्ड पिहि। इदोइ सतुरुगेलाइ इस्राएलिगेलाइको आनेमानेगेलाइ लुतिहि, इम्बालाइको सम्पतिगेलाइ हान्ति पापिहि कालाउ हेन्जाङहेङ सेअ्पिहि। हेन्जाङ बासार थेकापा परमेस्वरको आनाग्याकारि जेङनाङ कालाउ ताइको सतुरुगेलाइ पाहासो थिचोमिचोता परिकानाङ, इस्राएलिगेलाइ पाप लाअ्हि कालाउ लाअ्पालिको भाअ्सिङ परमेस्वर दोफा प्रार्थाना पाहि।

कालाउ परमेस्वर इम्बालिको भाअ्सिङ लाअ्पाका द्याङ पिगिल्हि, जाइ इम्बालाइहेङ सतुरुगेलाइसो बान्चिपातेङ सारभिता सान्ति चुमाहि। कालाउ आरोङ द्याङगेलाइ परमेस्वरहेङ निल्हि कालाउ मुर्तिगेलाइ पुजिलि तेङहि। अओदोङ भाअ्सिङ परमेस्वर मिधानिगेलाइहेङ( भेरपाङ हिका एनोङ जाति इस्राएललिगेलाइको सतुरु हिघाहि) इम्बालाइ ह्रुता बिजोइ जेङलि पिहि।

न्हि बासार थेकापा मिधानिगेलाइ इस्राएलिगेलाइको गोताङ आन्नाबालि चुम्पुहि। इस्राएलिगेलाइ इदोइ झोको थिका हिघाहि कि मिधानिगेलाइ ताइमिहेङ मदुसुताको दोअ्तेङ आरदाङगेलाइता म्होघाखे। आखिरिता इम्बालाइ ताइमिहेङ बान्चिपालिको भाअ्सिङ परमेस्वरहेङ सेउपाहि।

एनि, गिदोन मिङ हिका इस्राएलको एमि द्याङ सिकापा आन्ना झातिघाखे कालाउकि मिधानिगेलाइ लोतेङ आन्ना लुतिलि मानिनाको। ओदोङ बेला याहोबेको एमि दुत गिदोनकोता लोतेङ दोअ्हि, “ परमेस्वर नाअ् दोफा हि, बिर योद्दा। हाने कालाउ इस्राएलिहेङ मिधानिगेलाइको खुरसो बान्चिपा।”

गिदोनको आबाकोता मुर्तिहेङ आर्पन पालि धाम्का बेदि हिघाहि। परमेस्वर दोङ गिदोनहेङ इङको मुर्तिहेङ ह्रालि लागाइहि। कालाउ गिदोन द्याङगेलाइसो थिका हिघाहि, ओदोङ भाअ्सिङ माबेला भरि वा ह्रुम्तेङ दोङ हि। कालाउ वा दोङ इङको बेदिहेङ ह्रापिहि कालाउ चानाचुना पापिहि। वा मुर्तिको भाअ्सिङ धाम्का बेदिको भेरपाङ परमेस्वरको भाअ्सिङ एनोङ नावा बेदि धाम्हि कालाउ परमेवरको भाअ्सिङ भोग चढाइहि।

भेनेङ दिनाको ह्रिमा हासु बुङ इम्बालाइको बेदि ह्रापिका द्याङगेलाइ तिङहि कालाउ ओबालाइ हेन्जाङ चेर ताम्पाहि। गिदोनहेङ सेअ्लिको भाअ्सिङ इम्बालाइ वाको साअ् हानिहि, कालाउ वाको आबा इम्बालाइहेङ दोअ्हि, “ नेलाइ हाइपालि ताइको दिरगेलाइहेङ साघाइलि भोसुखेना? जेसापा वा दिरनुते, वा ताइमिहेङ बान्चिपाको।

कालाउ न्हुसो मिधानिगेलाइ आरोङ इस्राएलिगेलाइहेङ लुतिलि लोहि। इम्बालाइ ओथे हेन्जा हिघाहि कि इम्बालाइहेङ गान्दिलि बुङ साध्ये मान्थुघाहि। इम्बालाइ दोफा धुम पालिको भाअ्सिङ गिदोन इस्राएलिगेलाइहेङ एदोफाङ जोम्पाहि। गिदोन परमेस्वर दोफा न्हेनोङ चिन्हागेलाइ ह्रेहि कालाउकि इस्राएलिहेङ बान्चिपालिको भाअ्सिङ परमेस्वर वासेहेङ चालाइका दोङ हि दोअ्तेङ वा निसित जेङलि द्वाको।

लाङति चिन्हाको भाअ्सिङ, गिदोन एनोङ धाबा भोनोइता दाअ्हि कालाउ परमेस्वरहेङ ह्रिमाको न्याइरि भोनोइता माजेङसिङ खालिङ इङको धाबा खिनिङ झापापिलि दोअ्तेङ सेउपाहि। परमेस्वर एन्साङ पापिहि। भेनेङ खेप चाहि भोनोइ झापापिलि कालाउ धाबाहेङ चाहि सेङपापिलि दोअ्तेङ परमेस्वरहेङ सेउपाहि। परमेस्वर इङको बुङ पापिहि। इदोइ न्हेनोङ चिन्हागेलाइ गिदोनहेङ मिधानिगेलाइसो इस्राइलिगेलाइहेङ बान्चिपालिको भाअ्सिङ परमरस्वर दोङ वासेहेङ चालाइका हि दोअ्तेङ खाङधुरि पापाहि।

३२,००० इस्राएलि सिपालाइ गिदोनकोता लोहि, कालाउ परमेस्वर वासेहेङ इदोइ सङख्या ओसारापाङ हेन्जा जेङहि दोअ्हि। ओदोङ भाअ्सिङ गिदोन धुम पालि थिहि २२,००० झानाहेङ सिता दिङगिल्हि। परमेस्वर गिदोनहेङ द्याङगेलाइको सङख्या आझाइ हेन्जा जेङका दोअ्हि। ओदोङ भाअ्सिङ गिदोन ३०० सिपालाइ बाहेक बाकि झाराङहेङ सिता दिङगिल्हि।

इङको न्हिसिनता परमेस्वर गिदोनहेङ दोअ्हि, “ मिधानिगेलाइको खोपाराता हाने कालाउ नाअ् इम्बालाइको दोअ्का काथा हिनाना नाअ् आरोङ माथियाना।” ओदोङ भाअ्सिङ इङको न्हिसिनता गिदोन लेता खोपाराता खुउहि कालाउ एमि मिधानि सिपाइ ताइको सानाइतिहेङ सोपोनता तिङका आधे काथागेलाइ दोअ्काताङ पाका हिङहि। इङको द्याङ एसा दोअ्काताङ पाका हिघाहि, “ इदोइ सोपोनको आर्था हि कि, गिदोनको फाउजि मिधानि फाउजिहेङ जितियाङ।

कालाउ न्हुसो गिदोन ताइको सिपालाइकोता घुरिहि कालाउ झाराङहेङ एनोङ- एनोङपा सानाइ,म्होहि, भोनोइको घाल्से कालाउ राँको पिहि। इम्बालाइ मिधानिगेलाइ जिम्तेङ हिका सिबिरहेङ गोह्राइहि। गिदोनको ३०० द्याङगेलाइ ता-ताइको राँकोगेलाइ घाल्से लिता ताअ्का हिघाहि कालाउकि मिधानिगेलाइ राँकोको फाइसालामका तिङलि माद्वाको।

कालाउ गिदोनको गोताङ सिपालाइ एखेताङ राँको तिङपाकाताङ ताइको घाल्सेगेलाइ भोइहि।इम्बालाइ ताइको सानाइ म्होहि कालाउ ह्रिकाइहि, “ याहोबे कालाउ गिदोनको भाअ्सिङ कात्ति।

परमेस्वर मिधानिगेलाइहेङ आवाइ तुअ्पापिहि, ओदोङ भाअ्सिङ इम्बालाइ झाअ्मिरिलि तेङहि कालाउ एमिसो-भेनेङहेङ सेअ्लि तेङहि। एन्सालाउ दोङ इस्राएलिगेलाइहेङ इम्बालाइको साअ्गेलाइसो मिधानिगेलाइहेङ गिल्लि काइहि। इम्बालाइ हेन्जाङहेङ सेअ्हि कालाउ बाकि हिकालाइहेङ इस्राएलिगेलाइको मिलिङसो बाहार दिगिल्पिहि। इङको दिना १,२०,००० मिधानिगेलाइ सिहि। इस्राएलिगेलाइहेङ परमेस्वर बान्चिपाका हिघाहि।

परमेस्वर गिदोनहेङ इम्बालाइको राजा बानाइलि भोका हिघाहि। गिदोन इम्बालाइहेङ इन्सापालि मापिहि, भरु इम्बालाइ मिधानिगेलाइसो चुमाका सोनाको आधे आङखुतिगेलाइ ह्रेहि। द्याङगेलाइ गिदोनहेङ हेन्जाङ जोसो सोना पिहि।

कालाउ गिदोन इङको सोनाहेङ प्राधान पुजारि गिइका भाइकाङ एनोङ बिसेस धाबा पुइलिको भाअ्सिङ प्रयोग पाहि। कालाउ द्याङगेलाइ इङकोहेङ पुजिलि तेङहि जेसाङ कि इङको एनोङ मुर्तिदोङ हिघाहि। ओदोङ भाअ्सिङ परमेस्वर आरोङ इस्राएलिगेलाइहेङ दन्ड पिहि हाइपालिपानु इम्बालाइ मुर्तिहेङ पुजिहि। परमेस्वर इम्बालाइको सतुरुगेलाइहेङ ओबालाइ ह्रुता बिजोइ पिहि। आखिरिता इम्बलाइ परमेस्वर दोफा साघाइ निङलिको भाअ्सिङ सेउपाहि, कालाउ परमेस्वर इम्बालाइहेङ भेनेङ एमि लाअ्पापिका द्याङ दिङगिल्हि।

इदोइ खाल्को हेन्जाङ जेङहि इस्राएलिगेलाइ पाप पाघाखे, परमेस्वर इम्बालाइहेङ दन्ड पिहि, इम्बालाइ पाप पालि लाअ्घाखे कालाउ परमेस्वर इम्बालाइहेङ बान्चिपालिको भाअ्सिङ लाअ्पाका द्याङगेलाइ दिङगिल्हि। हेन्जाङ बासारको आन्तारालता, परमेस्वर हेन्जा लाअ्पाकाइ दिङगिल्हि जाइ इस्राएलिगेलाइहेङ इम्बालाइको सतुरुगेलाइसो बान्चिपाहि।

आम्तिता,द्याङगेलाइ बो राट्गेलाइता हिका कोनिङ परमेस्वर दोफा एमि राजा ह्रेहि। इम्बालाइ इसिका राजा भोगाखे कि जाइ झाउका कालाउ बलियाका ह्याको, कालाउ इम्बालाइहेङ धुमता आगुवा पालि द्वाको। परमेस्वर इदोइ आनुरोध मनदाङ ताअ्का मान्थुघाहि कालाउ बुङ वा इम्बालाइको भोका भाइकाङ राजा पिहि।