10. परमेश्‍वर मिस्त्र देश 10 ची मुसिबत पाड़ंसु।

परमेश्‍वर सू मूसा अज्यु हारुन जो चेतावनीं दासु कि राजा जिद्धि ली तरनी। जब इदु राजा धबो धीसू उदू सू लीसू इस्राएल कू परमेश्‍वर यों लिदा जिघु मीजन धीमु दा खलन इदू सू राजा सू इदूकू काड़ंथे मुयनसु अज्यु इस्राएलियों कू धीमू हन्दू आजाद घाम हन्दू इदुजो उइजो अज्यु कठिन मेहनत घाम हन्दू मजबूर घासू।

राजा उइ मीजन जो धीम हन्दू ज्यारी ना मना घा निजू इदू हन्दू परमेश्‍वर सू मिस्र देश रु ची खतरनाक मुसिबत पाड़ंसु। इदू मुसिबत हन्दू परमेश्‍वर सू राजा जो थेसू इदू राजा अज्यु मिस्र देश कू देवता सू दल शक्तिशाली झी ली।

परमेश्‍वर सू नील यांगती रु शी रु की खिदुसू , इदू हन्दू राजा सू इता ले इस्राएलियों मीजन धीम मूधासू।

परमेश्‍वर सू भीर मिस्र देश रु भेघनो पांगसू। राजा सू भेघनो हानम घाम हन्दू मूसा सू विनती घासू। खलन कि भीर भेघनो सिजमु कू नोगोन्दी राजा सू अफी कू सिस्यो सारु कूघासू अज्यु इस्राएलियों मीजन जो मिस्र देश सू धीमू मूधासू।

इदु हन्दू परमेश्‍वर सू छकचु कू मुसिबत पाड़ंसु। इदू कु नोगोन्दी इदसु डॉसों कू मुसिबत पाड़ंसु। राजा सू मूसा अज्यु र् हारुन कु हुइसु अज्यु उदूसू लिसू कि अलड़ं मुसिबत रुकोया इदू इस्राएली मीजन मिस्र देश सिलन दि तरयाड़ं। इदू हन्दू मूसा सू प्रार्थना घासू परमेश्‍वर सू मिस्र रु डॉसों तिदाड़ं किघादुसू। इदू हन्दू राजा सू अफी सिस्यो सारु घासु। अज्यु इदू जन आजाद घालन धिमु मूदासु।

इदू कू तुकतू परमेश्‍वर सू मिस्रि देश रू भीर कुढुयमनु रे माला काडंलन सु सिजम दासु। खलन राजा कू सिस्यो सारु कलचू अज्यु उदूसू इस्राएलियों मीजन जो धीमु मूदासू।

तब परमेश्‍वर सु मूसा सू राजा कू लगांन्दी हुई रु फा चाड़ंमु हन्दु लिसू। इदूसू अनमा घासू मिस्र देश कू मीजन कू घुराड़ं रु काड़ंलन घुराड़ं रु झिना लिलन राजु खलन इस्राएलियों मी खैरी मूलिजू। परमेश्‍वर सू राजा कू सिस्या सारु कूघासू अज्यु राजा सू इस्राएलियों मीजन रु आजाद लिलन दिमु मूघादसू।

इदू हन्दू नोगोन्दी परमेश्‍वर सू ढाल किगिचेसू अज्यु र् मिस्र देश कू दलना घेरा बरबाद कूघादूसू अज्यु खमरी ले भांगरु राजै इदु सेदसु। राजा सू मूसा अज्यु हारुन ये वियसू अज्यु उदूजो लिसू जीसू पाप घायो। घनी जन धी तरनी। इता मूसा सू प्रार्थना घासू अज्यु तूंखू सू ढाल थीमु कुरोकदीसु।

खलन राजा सू अज्यु र् पाप घासू अज्यु अफी कू सिस्यो सारु किघासू। इदूसू इस्राएलियों कू मीजन आजाद लिलन धीमु मूधासू।

इदू हन्दू परमेश्‍वर सू मिस्र देश रु दलना भु राम धासू। इदू भु सू दलना घेरा कूझादसू जो ढाल सु नाश मूघासु।

इदू सू परमेश्‍वर सू हुमाड़ं कूघासू जो सूम ज्या होना लिजू। अलांग हुमाड़ं निजू कि मिस्री जन अफी कू सूंगरु सू भांगरु मूरा तरसु। खलन जो इस्राएली मीजन सूंड़ं निजू इदोड़ं भांड़ं नी निजू।

इदू 9 गूई मुसिबत नोगोन्दी ले राजा सू इस्राएलियों मीजन कू आजाद लिलन दिमु हन्दु महा लिसु। खलन राजा सू मूयन्सु इदू हन्दू परमेश्‍वर सू ताकू लास्ट ज्या रु मुसिबत पांगमू हन्दू योजना घासू। इदू राजा कू सिस्यो खिदङदा।